ເປີດຫ້ອງໂຄສະນາອຸປະຕິເຫດຢູ່ບຸນນະມັດສະການພະທາດຫລວງ
ວັນທີ 1 ພະຈິກນີ້, ພະແນກຈະລາຈອນນະຄອນຫລວງວຽງຈັນ, ໄດ້ເປີດຫ້ອງໂຄສະນາອຸປະຕິເຫດໃນງານບູນນະມັດສະການພະທາດຫລວງວຽງຈັນ, ເພື່ອໃຫ້ມວນຊົນໄດ້ມີຢ້ຽມຊົມ ແລະ ຍົກສູງສະຕິເຄົາລົບກົດລະບຽບຈະລາຈອນສູງຂຶ້ນ ແລະ ເພື່ອໂຄສະນາຫລຸດຜ່ອນອຸປະຕິເຫດນໍາດ້ວຍ, ໂດຍການເຂົ້າຮ່ວມຂອງທ່ານ ພັນໂທ ຈັນຫອມ ແກ້ວສຸລະໄຊ ຫົວໜ້າຫ້ອງຕຳຫລວດນະຄອນຫລວງວຽງຈັນ.
ທ່ານຫົວໜ້າຫ້ອງຕຳຫລວດ ໃຫ້ຮູ້ວ່າ: ປັດຈຸບັນ, ສະພາບການສັນຈອນຕາມເສັ້ນທາງຂ້ອນຂ້າງສັບສົນ ແລະ ມີນັກຂັບຂີ່ຈຳນວນໜຶ່ງບໍ່ປະຕິບັດຕາມກົດລະບຽບຈະລາຈອນ, ອັນເປັນສາເຫດພາໃຫ້ມີສະພາບລົດຕິດ ແລະ ເກີດອຸປະຕິເຫດ, ສະເພາະປີຜ່ານມາ, ຢູ່ນະຄອນຫລວງວຽງຈັນມີອຸປະຕິເຫດເກີດຂື້ນຫລາຍກວ່າ 1.570 ກໍລະນີ, ມີຜູ້ເສຍຊີວິດ 266 ຄົນ ແລະ ຊ່ວງໄລຍະບຸນພະທາດຫລວງປີກາຍນີ້ເຫັນວ່າມີສະພາບລົດຕິດອັ່ງອໍຢູ່ຕາມເສັ້ນທາງໂດຍສະເພາະແມ່ນຖະໜົນໄກສອນ, ຖະໜົນໜອງບອນ, ຖະໜົນກຳແພງເມືອງ ແລະ ອື່ນໆ, ສະນັ້ນ ເພື່ອເຮັດໃຫ້ນັກຂັບຂີ່ມີຄວາມເຂົ້າໃຈກົດລະບຽບຈະລາຈອນຫລາຍຂຶ້ນ, ພະແນກຈະລາຈອນນະຄອນຫລວງວຽງຈັນ ຈຶ່ງໄດ້ເປີດຫ້ອງໂຄສະນາອຸປະຕິເຫດໃຫ້ກັບມວນຊົນທີ່ມາທ່ຽວບຸນ ໂດຍຈຸດປະສົງຄື: ໃຫ້ມວນຊົນຮັບຮູ້ ແລະ ປະຕິບັດກົດລະບຽບຈະລາຈອນຢ່າງເຂັ້ມງວດ, ເຮັດໃຫ້ການສັນຈອນຕາມເສັ້ນທາງມີຄວາມເປັນລະບຽບ ແລະ ໄດ້ສົມທົບກັບ ຍທຂ ນະຄອນຫລວງເຄື່ອນໄຫວໂຄສະນາກົດລະບຽບຈະລາຈອນໃຫ້ກວ້າງຂວາງກວ່າເກົ່າ, ຊຶ່ງພາຍໃນງານຈະໄດ້ມີການຈັດກິດຈະກຳຖາມຕອບຊິງລາງວັນ ແລະ ອື່ນໆ, ຊຶ່ງຄາດວ່າຈະມີມວນຊົນມາຮ່ວມຊົມ ແລະ ຫລີ້ນກິດຈະກໍາເປັນຈຳນວນຫລາຍ.
