ທ່ານ ມາດູໂຣ ປະກາດໄຊຊະນະ ກຽມດໍາລົງຕໍາແໜ່ງປະທານາທິບໍດີເວເນຊູເອລາຕໍ່ອີກສະໄໝ
ປະທານາທິບໍດີ ນິໂຄລັສ ມາດູໂຣ ຂອງເວເນຊູເອລາ ກຽມດໍາລົງຕໍາແໜ່ງຕໍ່ອີກ 1 ສະໄໝ ພາຍຫລັງຜົນການເລືອກຕັ້ງບໍ່ເປັນທາງການຂອງຄະນະກໍາມະການການເລືອກຕັ້ງທີ່ນັບໄປໄດ້ 80% ຊີ້ວ່າ: ທ່ານມີຄະແນນນໍາໜ້າຄູ່ແຂ່ງຄືທ່ານ ເອັດມຸນໂດ ກອນຊາເລ 51.20% ຕໍ່ 44.02%.
ເຖິງຢ່າງໃດກໍຕາມ, ຝ່າຍຄ້ານລະບຸວ່າ: ຜົນການເລືອກຕັ້ງຄັ້ງນີ້ເປັນເລື່ອງຂີ້ຕົວະ ເພາະສວນທາງກັບຜົນສໍາຫລວດກ່ອນໜ້ານີ້ທີ່ຊີ້ວ່າ: ທ່ານ ກອນຊາເລ ຈະຊະນະການເລືອກຕັ້ງດ້ວຍຄະແນນສຽງ 70%. ພ້ອມຢືນຢັນວ່າ: ທ່ານ ກອນຊາເລ ເປັນວ່າທີ່ປະທານາທິບໍດີທີ່ໄດ້ຮັບເລືອກໂດຍຍຸຕິທໍາ.
ສ່ວນທ່ານ ມາດູໂຣ ປະກາດໄຊຊະນະຕໍ່ຜູ້ສະໜັບສະໜູນໃນນະຄອນຫລວງກາຣາກັສວ່າ: ຜົນການເລືອກຕັ້ງຄັ້ງນີ້ເປັນໄຊຊະນະຂອງສັນຕິພາບ ແລະ ສະຖຽນລະພາບ ແລະ ຍົກຍ້ອງລະບົບການເລືອກຕັ້ງວ່າມີຄວາມໂປ່ງໃສ. ຂະນະດຽວກັນ ກໍວິຈານຝ່າຍຄ້ານວ່າ: ເອົາແຕ່ຕອບໂຕ້ວ່າທ່ານສໍ້ໂກງການເລືອກຕັ້ງທຸກຄັ້ງ.
ກ່ອນໜ້ານີ້ຝ່າຍຄ້ານສົ່ງຄົນຫລາຍພັນຄົນລົງໄປສັງເກດການການນັບຄະແນນຢູ່ສູນເລືອກຕັ້ງທົ່ວປະເທດ ແລະ ນັບຄະແນນດ້ວຍຕົນເອງ. ເຖິງຢ່າງໃດກໍຕາມ, ໂຄສົກຝ່າຍຄ້ານລະບຸວ່າ: ກຸ່ມຜູ້ສັງເກດການເຫລົ່ານີ້ຖືກກັນອອກຈາກສູນເລືອກຕັ້ງໃນຫລາຍເຂດ.
ທ່ານ ແອນໂທນີ ບລິງເຄນ ລັດຖະມົນຕີວ່າການກະຊວງການຕ່າງປະເທດອາເມລິກາ ສະແດງຄວາມກັງວົນຕໍ່ຜົນການເລືອກຕັ້ງທີ່ປະກາດໂດຍຄະນະກໍາມະການການເລືອກຕັ້ງວ່າ: ບໍ່ໄດ້ສະທ້ອນເຈດຈໍານົງ ແລະ ການໂຫວດແທ້ຈິງຂອງປະຊາຊົນເວເນຊູເອລາ.
ທັງນີ້, ຜົນສໍາຫລວດຄວາມຄິດເຫັນເຮັດຂຶ້ນກ່ອນການເລືອກຕັ້ງຊີ້ວ່າ: ປະຊາຊົນຈໍານວນຫລາຍຕ້ອງການການປ່ຽນແປງ ພາຍຫລັງປະເທດຢູ່ພາຍໃຕ້ການປົກຄອງຂອງພັກ PSUV ຍາວນານ 25 ປີ ນັບແຕ່ສະໄໝທ່ານ ຮູໂກ ຊາເວ ຕໍ່ເນື່ອງມາຈົນຮອດທ່ານ ມາດູໂຣ ທີ່ຄອງອໍານາດມາ 11 ປີ.
ທ່ານ ກາບຽວ ບໍຣິກ ປະທານາທິບໍດີຊິລີ ກ່າວວ່າ: ທ່ານເກືອບບໍ່ເຊື່ອໃນຜົນການເລືອກຕັ້ງຄັ້ງນີ້ ແລະ ຮຽກຮ້ອງໃຫ້ເກີດຄວາມໂປ່ງໃສໃນຂະບວນການເລືອກຕັ້ງ.
ຂະນະທີ່ປະທານາທິບໍດີກູບາສະແດງຄວາມຍິນດີຕໍ່ທ່ານ ມາດູໂຣ ໂດຍລະບຸວ່າ: ສັກສີ ແລະ ຄວາມກ້າຫານຂອງປະຊາຊົນເວເນຊູເອລາຊະນະແຮງກົດດັນ ແລະ ການຖືກຄອບງໍາ.
ອ້າງອີງ:
