ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ສປປ ລາວ ພົບປະ ລັດຖະມົນຕີຕ່າງປະເທດ ສ. ຕວັກກີ

ຕອນແລງຂອງ ວັນທີ 26 ກຸມພາ 2024, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ທ່ານ ຮາກັນ ຟີດານ, ລັດຖະມົນຕີ ກະຊວງການຕ່າງປະເທດ ແຫ່ງ ສາທາລະນະລັດ ຕວັກກີ ພ້ອມຄະນະ ໃນໂອກາດ ເດີນທາງມາເຂົ້າຮ່ວມກອງປະຊຸມ ລັດຖະມົນຕີຕ່າງປະເທດ ອາຊຽນ ຄັ້ງທີ 57, ທີ່ນະຄອນຫຼວງວຽງຈັນ.

ໃນໂອກາດການພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສ. ຕວັກກີ ຕະຫຼອດໄລຍະ 66 ປີຜ່ານມາ ໂດຍໄດ້ດຳເນີນໄປດ້ວຍບັນຍາກາດອັນດີ ແລະ ເຫັນພ້ອມຮ່ວມກັນວ່າ ສອງປະເທດ ຈະໄດ້ຮ່ວມກັນຊຸກຍູ້ການພົວພັນຮ່ວມມືດ້ານເສດຖະກິດ-ການຄ້າໃຫ້ຫຼາຍຂຶ້ນໃນຕໍ່ໜ້າ ໂດຍຜ່ານຂອບການຮ່ວມມື ຄະນະກຳມະທິການ ຮ່ວມມື ເສດຖະກິດ-ການຄ້າ ລາວ-ຕວັກກີ. ໃນໂອກາດດຽວກັນນີ້, ທ່ານ ຮອງນາຍົກລັດຖະມົນຕີ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ຂອງລັດຖະບານ ຕວັກກີ ໃນໂອກາດທີ່ເດີນທາງຢ້ຽມຢາມທາງການ ຢູ່ ສ. ຕວັກກີ ໃນຕົ້ນເດືອນ ກຸມພາ 2024 ທີ່ຜ່ານມາ, ພ້ອມທັງ ຂອບໃຈຕໍ່ການສະໜັບສະໜູນ ຂອງ ຕວັກກີ ໃນວຽກງານສາທາລະນະສຸກ, ກະສິກຳ, ແມ່ຍິງ ແລະ ຊາວໜຸ່ມ ໃນໄລຍະຜ່ານມາ. ໂອກາດນີ້, ຝ່າຍຕວັກກີ ໄດ້ຢືນຢັນທີ່ຈະໃຫ້ການສະໜັບສະໜູນ ລາວ ໃນວຽກງານປ້ອງກັນໄພພິບັດທາງທຳມະຊາດ ກໍຄືວຽກງານຊ່ວຍເຫຼືອຜູ້ທີ່ໄດ້ຮັບຜົນກະທົບຈາກລະເບີດບໍ່ທັນແຕກ ຜ່ານອົງການຮ່ວມມື ແລະ ປະສານງານ ຂອງ ຕວັກກີ (Turkish Cooperation and Coordination Agency – TIKA) ແລະ ອົງການ ສປຊ. ນອກນີ້, ສອງຝ່າຍ ຍັງໄດ້ປຶກສາຫາລື ກ່ຽວກັບ ການຮ່ວມມືໃນຂອບອາຊຽນ-ຕວັກກີ ແລະ ເຫັນພ້ອມໃນການຊຸກຍູ້ສົ່ງເສີມການພົວພັນຮ່ວມມື ອາຊຽນ-ຕວັກກີ ທີ່ມີມາແລ້ວນັ້ນ ໃຫ້ຂະຫຍາຍຕົວຍິ່ງໆຂຶ້ນໄປໃນຕໍ່ໜ້າ ແລະ ໄດ້ມີການແລກປ່ຽນຄໍາຄິດເຫັນຕໍ່ບັນຫາສະພາບພາກພື້ນ ແລະ ສາກົນທີ່ສອງຝ່າຍມີຄວາມສົນໃຈ.

ການເດີນທາງມາ ສປປ ລາວ ໃນຄັ້ງນີ້ ຖືເປັນຄັ້ງທຳອິດ ຂອງ ທ່ານ ຮາກັນ ຟີດານ, ອັນໄດ້ເປັນຂີດໝາຍອັນສຳຄັນແຫ່ງການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ລາວ-ຕວັກກີ ກໍຄື ອາຊຽນ-ຕວັກກີໃຫ້ມີບາດກ້າວອັນໃໝ່. ການພົບປະ ສອງຝ່າຍ ໄດ້ດໍາເນີນໄປພາຍໃຕ້ບັນຍາກາດອັນດີ, ສ້າງສັນ ແລະ ເຂົ້າອົກເຂົ້າໃຈເຊິ່ງກັນແລະກັນ.