ອິດສະລາແອນຊີ້ ແຮັດໂບລາຍິງຈະຫລວດຖະຫລົ່ມເດີ່ນເຕະບານຢູ່ໂກລັນ ເຮັດໃຫ້ເດັກນ້ອຍ-ໄວລຸ້ນເສຍຊີວິດ 12 ຄົນ
ທາງການອິດສະລາແອນລາຍງານວ່າ: ມີເດັກນ້ອຍ ແລະ ໄວລຸ້ນຢ່າງໜ້ອຍ 12 ຄົນ ເສຍຊີວິດຈາກເຫດການຈະຫລວດຫລາຍລູກໂຈມຕີໃສ່ເດີ່ນເຕະບານພາຍໃນໝູ່ບ້ານແຫ່ງໜຶ່ງຢູ່ບ່ອນຮາບສູງໂກລັນ ເຊິ່ງເປັນພື້ນທີ່ປົກຄອງຂອງອິດສະລາແອນ.
ເບື້ອງຕົ້ນອິດສະລາແອນລະບຸວ່າ: ຈະຫລວດທີ່ຍິງໂຈມຕີໃສ່ບ້ານດັ່ງກ່າວມີປະມານ 30 ລູກ ໂດຍຍິງຂ້າມມາຈາກລີບັງ ແລະ ກ່າວຫາກຸ່ມແຮັດໂບລາວ່າຢູ່ເບື້ອງຫລັງການໂຈມຕີດັ່ງກ່າວ. ຂະນະທີ່ກຸ່ມແຮັດໂບລາຢືນຢັນປະຕິເສດວ່າບໍ່ໄດ້ເປັນຝ່າຍຍິງຈະຫລວດ.
ທັງນີ້, ພາຍຫລັງເກີດເຫດ ກອງທັບອິດສະລາແອນໄດ້ສົ່ງເຮືອບິນຮົບປະຕິບັດການໂຈມຕີທາງອາກາດຖະຫລົ່ມເປົ້າໝາຍຂອງກຸ່ມແຮັດໂບລາໃນຫລາຍຈຸດ ລວມທັງສາງອາວຸດ ແລະ ໂຄງລ່າງພື້ນຖານຕ່າງໆຂອງແຮັດໂບລາ, ແຕ່ບໍ່ມີລາຍງານຜູ້ເສຍຊີວິດ ຫລື ບາດເຈັບ.
ໂດຍຄວາມເຄັ່ງຕຶງລະຫວ່າງອິດສະລາແອນ ແລະ ກຸ່ມແຮັດໂບລາຢູ່ລີບັງເພີ່ມຂຶ້ນ ແລະ ມີການໂຈມຕີຂ້າມຊາຍແດນເປັນໄລຍະ ນັບແຕ່ສົງຄາມອິດສະລາແອນ-ກາຊາເລີ່ມຂຶ້ນໃນເດືອນຕຸລາປີຜ່ານມາ ທ່າມກາງຄວາມກັງວົນວ່າສະຖານະການອາດຮຸນແຮງຈົນຂະຫຍາຍເປັນສົງຄາມອີກແນວຮົບຂອງອິດສະລາແອນ.
ອ້າງອີງ:
- https://edition.cnn.com/2024/07/27/middleeast/lebanon-israel-golan-strikes-intl-latam/index.html
- https://www.bbc.com/news/articles/c29dydz84ngo
