ເຈົ້າແຂວງຈໍາປາສັກ ລົງເຄື່ອນໄຫວ-ຕິດຕາມ ແລະ ຊີ້ນຳແກ້ໄຂບັນຫາ ນໍ້າຖ້ວມຂັງ

ວັນທີ 26 ກໍລະກົດ 2024, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມຄະນະ ແລະ ພາກສ່ວນກ່ຽວຂ້ອງ ລົງເຄື່ອນໄຫວ-ຕິດຕາມ ແກ້ໄຂບັນຫາ ນໍ້າຖ້ວມຂັງເສັ້ນທາງ ຢູ່ຂ້າງກອງບັນຊາການທະຫານແຂວງ ຢ່າງຮີບດ່ວນ, ເຊິ່ງ ເຈົ້າແຂວງຈໍາປາສັກ ໄດ້ຊີ້ນໍາການແກ້ໄຂຄື:

1. ໃຫ້ນະຄອນປາກເຊ ລຸລ່ວງ ສົມທົບການຮ່ວມມື ກັບອົງການປົກຄອງບ້ານ, ເພື່ອນໍາພາປະຊາຊົນພາຍໃນບ້ານຮ່ວມກັນປະຕິບັດການເຈາະຄອງລະບາຍນໍ້າແກ້ໄຂ ພື້ນທີ່ ທີ່ມີນ້ຳຖ້ວມຂັງ.

2. ໃຫ້ປະຕິບັດຢ່າງຮີບດ່ວນ ໃນວັນທີ 27 ກໍລະກົດນີ້, ໂດຍໃຫ້ ພະແນກໂຍທາທິການ ແລະ ຂົນສົ່ງ ສົມທົບກັບພາກສ່ວນກ່ຽວຂ້ອງ ເພື່ອກວດກາດ້ານເຕັກນິກ ໃນການສຳຫລວດເຈາະຄອງ, ຈົກຮ່ອງລະບາຍນໍ້າ ແລະ ເຮັດສັນຍາລັກໝາຍ ເພື່ອຮັບປະກັນຄວາມປອດໄພການສັນຈອນ.

3. ⁠ສ່ວນຕິດພັນກັບກຳແພງໂຮງຮຽນກິນນອນຊົນເຜົ່າໃຫ້ ນະຄອນປະສານພົວພັນເພື່ອລຸລວງໃຫ້ຮັບຊາບ ໃນການລ່ວງຄອງເບື້ອງໃນຮົ້ວຂອງໂຮງຮຽນ.

ຂໍ້ມູນ: ສູນຂ່າວຊາວພາກໃຕ້