ສປປ ລາວ ເປັນເຈົ້າພາບຈັດກອງປະຊຸມລັດຖະມົນຕີຕ່າງປະ ເທດຂອບການຮ່ວມມືຄູ່ຮ່ວມແມ່ນໍ້າຂອງ-ຍີ່ປຸ່ນ ຄັ້ງທີ 15
ວັນທີ 26 ກໍລະກົດ 2024, ສປປ ລາວ ແລະ ຍີ່ປຸ່ນ ໄດ້ເປັນເຈົ້າພາບຮ່ວມຈັດກອງປະຊຸມລັດຖະມົນຕີຕ່າງປະເທດຂອບການຮ່ວມມືຄູ່ຮ່ວມແມ່ນໍ້າຂອງ-ຍີ່ປຸ່ນ ຄັ້ງທີ 15 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ເຊິ່ງໄດ້ຈັດຂຶ້ນຄຽງຄູ່ກັບກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ພາຍໃຕ້ການເປັນປະທານຮ່ວມຂອງ ທ່ານ ສະເຫຼີມໄຊ ກົມມະສິດ, ຮອງນາຍົກ ລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ນາງKamikawa Yoko, ລັດຖະມົນຕີກະຊວງ ການຕ່າງປະເທດ ແຫ່ງ ຍີ່ປຸ່ນ, ຊຶ່ງມີບັນດາລັດຖະມົນຕີ ແລະ ບັນ ດາຫົວໜ້າເຈົ້າໜ້າທີ່ອາວຸໂສປະເທດສະມາຊິກແມ່ນໍ້າຂອງ ຄື: ກຳ ປູເຈຍ, ມຽນມາ, ໄທ ແລະ ຫວຽດນາມ ເຂົ້າຮ່ວມ.
(ທ່ານ ນາງKamikawa Yoko, ລັດຖະມົນຕີກະຊວງ ການຕ່າງປະເທດ ແຫ່ງ ຍີ່ປຸ່ນ)
ກອງປະຊຸມລັດຖະມົນຕີຕ່າງປະເທດຂອບການຮ່ວມມືຄູ່ຮ່ວມແມ່ນໍ້າຂອງ-ຍີ່ປຸ່ນ ຄັ້ງທີ 15 ໄດ້ຮ່ວມກັນທົບທວນຄືນ ໝາກຜົນຂອງການຮ່ວມມື ລະຫວ່າງ ບັນດາປະເທດສະມາຊິກແມ່ນ້ຳຂອງ ແລະ ຍີ່ປຸ່ນ ໃນໄລຍະຜ່ານມາ ໂດຍສະເພາະປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນ, ປະກອບສ່ວນເຂົ້າໃນການຈັດຕັ້ງປະຕິບັດແຜນແມ່ບົດເຊື່ອມຈອດຂອງອາຊຽນ ແລະ ແລວເສດຖະກິດຕາເວັນອອກ-ຕາເວັນຕົກ ໄດ້ເປັນຢ່າງດີ.
ພ້ອມດຽວກັນນັ້ນ, ກອງປະຊຸມ ຍັງໄດ້ຮ່ວມກັນວາງທິດ ທາງແຜນການໃນຕໍ່ໜ້າ ເຊິ່ງໄດ້ກຳນົດເອົາ 3 ເສົາຄ້ຳການຮ່ວມມືໃໝ່ຄື: 1. ການຟື້ນຟູ ແລະ ເຊື່ອມຈອດສັງຄົມພາຍຫຼັງໂຄວິດ -19 ໂດຍແນໃສ່ສ້າງຄວາມເຂັ້ມແຂງດ້ານການພັດທະນາພື້ນຖານໂຄງລ່າງ, ຕ່ອງໂສ້ການສະໜອງ, ການແລກປ່ຽນລະຫວ່າງປະຊາ ຊົນ ແລະ ວຽກງານສາທາລະນະສຸກ; 2. ການຫັນເປັນດີຈີຕອນ; 3. ຮັບປະກັບຄວາມໝັ້ນຄົງໃນຮູບແບບໃໝ່ ສຸມໃສ່ຄວາມໝັ້ນຄົງດ້ານເສດຖະກິດ, ການຄຸ້ມຄອງ ແລະ ບໍລິຫານນ້ຳ, ການຫັນເປັນສີຂຽວ, ການປ່ຽນແປງຂອງສະພາບອາກາດ ແລະ ການຈັດ ຕັ້ງປະຕິບັດແຜນປະຕິບັດງານຕ່າງໆທີ່ນອນໃນຂອບການຮ່ວມມືພາກພື້ນ ແລະ ສາກົນ.
ກອງປະຊຸມຄັ້ງນີ້ ໄດ້ຮັບຮອງເອົາເອກະສານສໍາຄັນຂອງກອງປະຊຸມ 1 ສະບັບ ຄື: ຍຸດທະສາດການຮ່ວມມືແມ່ນ້ຳຂອງ -ຍີ່ປຸ່ນ 2024 ເພື່ອເປັນບ່ອນອີງໃຫ້ແກ່ການສືບຕໍ່ເພີ່ມທະວີການຮ່ວມມືໃນການພັດທະນາເສດຖະກິດ-ສັງຄົມ ລະຫວ່າງບັນ ດາປະເທດສະມາຊິກແມ່ນໍ້າຂອງ ແລະ ຍີ່ປຸ່ນ ໃນຕໍ່ໜ້າ.
ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ຕີລາຄາສູງຕໍ່ໝາກຜົນຂອງການຮ່ວມມືພາຍໃຕ້ຂອບການຮ່ວມມືແມ່ນ້ຳຂອງ-ຍີ່ປຸ່ນ ຕະຫຼອດໄລຍະຜ່ານມາ ເຊິ່ງໄດ້ປະກອບສ່ວນຢ່າງຕັ້ງ ໜ້າເຂົ້າໃນການພັດທະນາເສດຖະກິດ-ສັງຄົມ ໃນພາກພື້ນແມ່ນໍ້າຂອງ ເວົ້າລວມ, ເວົ້າສະເພາະ ກໍ່ຄືຂອງ ສປປ ລາວ. ພ້ອມດຽວກັນ, ກໍ່ໄດ້ຍົກໃຫ້ເຫັນເຖິງໜຶ່ງໃນຄວາມຄືບໜ້າສຳຄັນ ຂອງການພັດທະນາພື້ນຖານໂຄງລ່າງທີ່ມີຄຸນນະພາບ, ເຊິ່ງມີຄວາມສຳຄັນຕໍ່ການຫັນ ສປປ ລາວ ຈາກປະເທດທີ່ບໍ່ມີຊາຍແດນອອກສູ່ທະ ເລ ໃຫ້ກາຍເປັນປະເທດເຊື່ອມຈອດພາກພື້ນ, ທັງເປັນການອຳ ນວຍຄວາມສະດວກທາງດ້ານການຄ້າການລົງທຶນ ແລະ ການເຂົ້າເຖິງຕະຫຼາດພາກພື້ນ ແລະ ທົ່ວໂລກ.
