ເບຣຊິນຢືນຢັນຜູ້ເສຍຊີວິດສອງຄົນທໍາອິດຂອງໂລກ ຈາກເຊື້ອໄວຣັສໂອໂຣປູເຊ

      ໜ່ວຍງານສາທາລະນະສຸກເບຣຊິນຢືນຢັນ ການພົບຜູ້ເສຍຊີວິດຈາກການຕິດເຊື້ອໄວຣັສໂອໂຣປູເຊຄັ້ງທໍາອິດຂອງໂລກຢ່າງເປັນທາງການ.

      ວັນທີ 26 ກໍລະກົດ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກເບຣຊິນອອກຖະແຫລງການກ່ຽວກັບການພົບຜູ້ຍິງສອງຄົນໃນລັດບາເຢີຍ ຕັ້ງຢູ່ທາງຕາເວັນອອກສຽງເໜືອຂອງປະເທດ ເສຍຊີວິດຈາກການຕິດເຊື້ອໄວຣັສໂອໂຣເປຊູ (Oropouche virus) ໂດຍຜູ້ເສຍຊີວິດທັງສອງມີອາຍຸບໍ່ຮອດ 30 ປີ ແລະ ບໍ່ມີພະຍາດປະຈໍາຕົວ, ແຕ່ອາການທີ່ເກີດຂຶ້ນລະຫວ່າງມີອາການປ່ວຍນັ້ນທຽບເທົ່າກັບໄຂ້ເລືອດອອກລະດັບຮຸນແຮງ.

     ທັງນີ້, ການຕິດເຊື້ອໄວຣັສໂອໂຣປູເຊ ຫລື ໄຂ້ໄອໂຣປູເຊ ມີຍຸງເປັນພາຫະ. ນັບແຕ່ຕົ້ນປີນີ້ ໜ່ວຍງານສາທາລະນະສຸກເບຣຊິນຢືນຢັນຜູ້ຕິດເຊື້ອສະສົມແລ້ວ 7,236 ຄົນ.

     ຂະນະດຽວກັນ, ພະຍາດດັ່ງກ່າວບໍ່ແມ່ນພະຍາດເກີດຂຶ້ນໃໝ່ ມີການຢືນຢັນຜູ້ຕິດເຊື້ອຄັ້ງທໍາອິດຢູ່ເບຣຊິນ ໃນປີ 1960 ແລະ ພົບຢູ່ບາງພື້ນທີ່ຂອງໂບລິເວຍ, ໂກລົມບີ, ເປຣູ ແລະ ກູບາ, ແຕ່ກ່ອນໜ້ານັ້ນຍັງບໍ່ເຄີຍມີການຢືນຢັນຜູ້ເສຍຊີວິດມາກ່ອນ. ຜູ້ເສຍຊີວິດທັງສອງທີ່ລັດຖະບານເບຣຊິນຢືນຢັນໃນອາທິດນີ້ ຈຶ່ງຖືເປັນຄັ້ງທໍາອິດຢ່າງເປັນທາງການ.

     ຂໍ້ມູນໂດຍສູນຄວບຄຸມ ແລະ ປ້ອງກັນພະຍາດອາເມລິກາ (CDC) ລະບຸວ່າ: ອາການທີ່ເປັນຜົນມາຈາກການຕິດເຊື້ອໄວຣັສໂອໂຣປູເຊ ຈະເກີດຂຶ້ນພາຍໃນ 4-8 ວັນ ພາຍຫລັງຖືກສັດທີ່ເປັນພາຫະກັດ ສ່ວນຫລາຍຄືພະຍາດໄຂ້ເລືອດອອກ ບໍ່ວ່າຈະ ເປັນໄຂ້, ປວດເມື່ອຍກ້າມຊີ້ນ, ປວດຕາມຂໍ້, ເຈັບຫົວ, ຖອກທ້ອງ, ປວດຮາກ, ໜາວສັ່ນ ແລະ ມີຄວາມຮູ້ສຶກໄວຕໍ່ແສງ ຖ້າມີອາການວິກິດອາດເຖິງຂັ້ນມີພະຍາດເຍື່ອຫຸ້ມສະໝອງອັກເສບນໍາ ແລະ ສົ່ງຜົນເຮັດໃຫ້ເສຍຊີວິດ.