ເຄືອຂ່າຍລົດໄຟຢູ່ຝຣັ່ງຢຸດສະງັກ ພາຍຫລັງເຫດໂຈມຕີ-ວາງເພີງ ກະທົບຜູ້ໂດຍສານ 8 ແສນຄົນ ບໍ່ເທົ່າໃດຊົ່ວໂມງກ່ອນເປີດໂອລິມປິກ
ເຄືອຂ່າຍລົດໄຟຂອງຝຣັ່ງ ລວມທັງລົດໄຟຄວາມໄວສູງໃນຫລາຍເສັ້ນທາງ ແລະ ຂະບວນລົດໄຟຢູໂຣສ ຕ້ອງຍົກເລີກ ຫລື ເລື່ອນໃຫ້ບໍລິການ ພາຍຫລັງເກີດເຫດການໂຈມຕີຄັ້ງໃຫຍ່ ລວມທັງການລັກລອບວາງເພີງຢູ່ບໍລິເວນທາງລົດໄຟຫລາຍຈຸດ ເຊິ່ງຄາດວ່າຕັ້ງເປົ້າເຮັດໃຫ້ເຄືອຂ່າຍລົດໄຟເສັ້ນຕ່າງໆຢຸດສະງັກກ່ອນຈະມີພິທີເປີດການແຂ່ງຂັນໂອລິມປິກເກມ ປາຣີສ 2024.
ເບື້ອງຕົ້ນບໍລິສັດ SNCF ຜູ້ໃຫ້ບໍລິການລົດໄຟທົ່ວຝຣັ່ງ ເປີດເຜີຍວ່າ: ມີຜູ້ໂດຍສານໄດ້ຮັບຜົນກະທົບຈາກເຫດການທີ່ເກີດຂຶ້ນ 8 ແສນກວ່າຄົນ ເຊິ່ງຄາດວ່າຜົນກະທົບຂອງຄວາມຂັດຂ້ອງນີ້ຈະຕໍ່ເນື່ອງໄປຈົນຮອດທ້າຍອາທິດນີ້ ໂດຍບໍລິສັດໄດ້ລະດົມກໍາລັງເຈົ້າໜ້າທີ່ຫລາຍຮ້ອຍຄົນເພື່ອເລັ່ງແກ້ໄຂບັນຫາທີ່ເກີດຂຶ້ນແລ້ວ. ພ້ອມແຈ້ງເຖິງຜູ້ໂດຍສານໃຫ້ເລື່ອນການເດີນທາງ ແລະ ແນະນໍາບໍ່ໃຫ້ໄປສະຖານີລົດໄຟ.
ທັງນີ້, ລັດຖະມົນຕີຄົມມະນາຄົມຂອງຝຣັ່ງເຊື່ອວ່າ: ເຫດການໂຈມຕີ ແລະ ລັກລອບວາງເພີງທີ່ເກີດຂຶ້ນໃນຫລາຍຈຸດເປັນການກະທໍາມຸ້ງຮ້າຍທີ່ມີການປະສານງານກັນ.
ໂດຍລາຍງານຈາກສື່ທ້ອງຖິ່ນພົບວ່າ: ການວາງເພີງເລີ່ມຕົ້ນໃນ 3 ຈຸດຂອງທາງລົດໄຟສາຍຕາເວັນຕົກ, ເໜືອ ແລະ ຕາເວັນອອກ ຂອງນະຄອນຫລວງປາຣີສ ເຊິ່ງຮອດຕອນນີ້ຍັງບໍ່ມີກຸ່ມ ຫລື ບຸກຄົນໃດອອກມາສະແດງຄວາມຮັບຜິດຊອບ. ຂະນະທີ່ເປັນໄປໄດ້ສູງວ່າການກໍ່ເຫດຄັ້ງນີ້ອາດຈະຕັ້ງເປົ້າໃສ່ການຈັດການແຂ່ງຂັນໂອລິມປິກເກມ ປາຣີສ 2024.
ອ້າງອີງ:
