ຜູ້ຕິດເຊື້ອພະຍາດໄຂ້ເລືອດອອກຢູ່ສິງກະໂປປີນີ້ສູງເຖິງ 10,000 ຄົນແລ້ວ ທໍາລາຍສະຖິຕິປີ 2023

     ຈໍານວນຜູ້ຕິດເຊື້ອພະຍາດໄຂ້ເລືອດອອກຢູ່ສິງກະໂປສະສົມມີຢ່າງໜ້ອຍ 10,141 ຄົນ ນັບແຕ່ຕົ້ນປີນີ້ ເຊິ່ງສູງກວ່າຈໍານວນຜູ້ຕິດເຊື້ອໃນປີ 2023.

     ວັນທີ 25 ກໍລະກົດ, ສໍານັກຂ່າວຕ່າງປະເທດລາຍງານວ່າ: ກົມສິ່ງແວດລ້ອມແຫ່ງຊາດສິງກະໂປ (NEA) ພົບວ່າ: ລະຫວ່າງວັນທີ 14-22 ກໍລະກົດຜ່ານມາ ມີຈໍານວນຜູ້ຕິດເຊື້ອພະຍາດໄຂ້ເລືອດອອກສູງເຖິງ 267 ຄົນ ສົ່ງຜົນເຮັດໃຫ້ຈໍານວນຜູ້ຕິດເຊື້ອພາຍໃນປະເທດຂອງປີນີ້ເພີ່ມເປັນຢ່າງໜ້ອຍ 10,141 ຄົນ. ຂະນະທີ່ຈໍານວນຜູ້ຕິດເຊື້ອພະຍາດໄຂ້ເລືອດອອກໃນປີ 2023 ມີ 9,949 ຄົນ ເຊິ່ງຕໍ່າກວ່າຈໍານວນຜູ້ຕິດເຊື້ອ 32,173 ຄົນ ໃນປີ 2022.

     ໃນເດືອນມີນາຜ່ານມາ, NEA ເຕືອນເຖິງການຕິດເຊື້ອພະຍາດໄຂ້ເລືອດອອກທີ່ເພີ່ມຂຶ້ນ ພາຍຫລັງຕົວເລກຜູ້ຕິດເຊື້ອເພີ່ມສູງນອກລະດູພະຍາດໄຂ້ເລືອດອອກ ເຊິ່ງຢູ່ລະຫວ່າງເດືອນພຶດສະພາ-ຕຸລາຂອງທຸກປີ. ພ້ອມລະບຸວ່າ: ຕົວເລກດັ່ງກ່າວອາດເພີ່ມຂຶ້ນອີກ ເນື່ອງຈາກຍຸງລາຍມີປະລິມານຫລາຍ ແລະ ປະຊາກອນສ່ວນຫລາຍບໍ່ມີພູມຕ້ານທານ.

      ທ່ານ ຊູ ຫລີ່ ຢາງ ທີ່ປຶກສາດ້ານພະຍາດຕິດເຊື້ອ ກ່າວວ່າ: ສິງກະໂປອາດກໍາລັງຜະເຊີນການລະບາດຂອງພະຍາດໄຂ້ເລືອດອອກ. ເຖິງຢ່າງໃດກໍດີ, ຕົວເລກຜູ້ຕິດເຊື້ອໃນປີນີ້ຍັງຕໍ່າກວ່າປີ 2020 ເຊິ່ງມີຈໍານວນສູງເຖິງ 35,315 ຄົນ ແລະ ຜູ້ເສຍຊີວິດຢ່າງໜ້ອຍ 32 ຄົນ ເນື່ອງຈາກສະພາບອາກາດທີ່ອົບອຸ່ນ ແລະ ຊຸ່ມ ເອື້ອອໍານວຍຕໍ່ການຢູ່ລອດຂອງຍຸງ ແລະ ການເຮັດວຽກຢູ່ເຮືອນຊ່ວງພະຍາດໂຄວິດ-19 ລະບາດ ສົ່ງຜົນເຮັດໃຫ້ຄົນມີໂອກາດຖືກຍຸງກັດເພີ່ມຂຶ້ນ.

      ທັງນີ້, ປະຊາຊົນທີ່ອາໄສຢູ່ໃນພື້ນທີ່ສ່ຽງພະຍາດເລືອດອອກ ສາມາດປ້ອງກັນພະຍາດໄດ້ດ້ວຍການສີດພົ່ນຢາຂ້າແມງໄມ້ຕາມມຸມມືດອ້ອມເຮືອນ, ທາຢາກັນຍຸງເປັນປະຈໍາ ແລະ ໃສ່ເສື້ອແຂນຍາວ ແລະ ໂສ້ງຂາຍາວ.

     ທ່າອ່ຽງການແຜ່ລະບາດຂອງພະຍາດໄຂ້ເລືອດອອກເພີ່ມຂຶ້ນຢ່າງໜັກໃນໄລຍະ 20 ປີຜ່ານມາ ຕາມການປະເມີນຂອງອົງການອະນາໄມໂລກ (WHO) ແລະ ນັບແຕ່ແຕ່ຕົ້ນປີ 2022 ການແຜ່ລະບາດຂອງພະຍາດໄຂ້ເລືອດອອກທົ່ວໂລກ ສົ່ງຜົນເຮັດໃຫ້ມີຜູ້ຕິດເຊື້ອຫລາຍກວ່າ 5 ລ້ານຄົນ ເຊິ່ງເປັນຈໍານວນທີ່ສູງເກືອບເປັນປະຫວັດສາດ ແລະ ມີຜູ້ເສຍຊີວິດຈາກພະຍາດໄຂ້ເລືອດອອກຫລາຍກວ່າ 5,000 ຄົນ ໃນຫລາຍກວ່າ 80 ປະເທດ.