ວັນທີ 21 ກໍລະກົດ 2024 ເປັນມື້ຮ້ອນທີ່ສຸດໃນປະຫວັດສາດ ອຸນຫະພູມສະເລ່ຍໂລກສູງເຖິງ 17.09 ອົງສາ

     Copernicus Climate Change Service (C3S) ໜ່ວຍງານຕິດຕາມການປ່ຽນແປງສະພາບອາກາດຂອງສະຫະພາບເອີຣົບ ລາຍງານວ່າ: ວັນທີ 21 ກໍລະກົດຜ່ານມາ ຖືເປັນວັນທີ່ຮ້ອນທີ່ສຸດໃນປະຫວັດສາດໂລກ ນັບແຕ່ມີການບັນທຶກຂໍ້ມູນໃນປີ 1940 ໂດຍອຸນຫະພູມອາກາດພື້ນຜິວສະເລ່ຍທົ່ວໂລກເພີ່ມສູງເຖິງ 17.09 ອົງສາ ເຊິ່ງສູງກວ່າສະຖິຕິກ່ອນໜ້າຄື 17.08 ອົງສາ ທີ່ບັນທຶກໄວ້ໃນເດືອນກໍລະກົດປີຜ່ານມາ.

     ຈາກຂໍ້ມູນເບື້ອງຕົ້ນພົບວ່າ: ປັດໄຈທີ່ສົ່ງຜົນເຮັດໃຫ້ອຸນຫະພູມສະເລ່ຍທົ່ວໂລກສູງຂຶ້ນຕໍ່ເນື່ອງເປັນປີທີ 2 ເນື່ອງຈາກຄື້ນຄວາມຮ້ອນທີ່ຮຸນແຮງ ແລະ ປົກຄຸມພື້ນທີ່ຂະໜາດໃຫຍ່ຂອງອາເມລິກາ, ເອີຣົບ ແລະ ຣັດເຊຍ.

     Carlo Buontempo ຜູ້ອໍານວຍການ Copernicus Climate Change Service ຊີ້ວ່າ: ຍັງມີຄວາມເປັນໄປໄດ້ທີ່ຕົ້ນອາທິດນີ້ ອຸນຫະພູມສະເລ່ຍທົ່ວໂລກອາດສູງທຸບສະຖິຕິ ເນື່ອງຈາກຄື້ນຄວາມຮ້ອນທີ່ຍັງແຜ່ປົກຄຸມທົ່ວໂລກ.

     ໂດຍໃນປີຜ່ານມາ, ອຸນຫະພູມສະເລ່ຍທົ່ວໂລກເພີ່ມສູງທໍາລາຍສະຖິຕິຕິດຕໍ່ກັນເຖິງ 4 ວັນ ນັບແຕ່ວັນທີ 3-6 ກໍລະກົດ ເນື່ອງຈາກສະພາບໂລກລວນທີ່ມີປັດໄຈຕົ້ນຕໍມາຈາກການເຜົາໄໝ້ຂອງເຊື້ອໄຟຟໍຊິວ ເຊິ່ງສົ່ງຜົນເຮັດໃຫ້ເກີດຄວາມຮ້ອນຮຸນແຮງທົ່ວຂົ້ວໂລກເໜືອ.

     ຂະນະທີ່ນັກວິທະຍາສາດບາງທ່ານຊີ້ວ່າ: ປີ 2024 ອາດເປັນປີຮ້ອນທີ່ສຸດ ທຸບສະຖິຕິປີ 2023 ເຊິ່ງລະດັບອຸນຫະພູມສູງທໍາລາຍສະຖິຕິຕໍ່ເນື່ອງທຸກເດືອນນັບແຕ່ເດືອນມິຖຸນາ 2023.

ອ້າງອີງ:

• https://climate.copernicus.eu/new-record-daily-global-average-temperature-reached-july-2024
• https://www.reuters.com/world/world-registers-hottest-day-ever-recorded-july-21-monitor-says-2024-07-23/
• https://edition.cnn.com/2024/07/23/climate/hottest-day-global-record/index.html