ຈີນກຽມອອກນະໂຍບາຍ ປັບອາຍຸບໍານານຂັ້ນຕໍ່າ ເລັ່ງຕໍ່ສູ້ບັນຫາປະຊາກອນ

     ຈີນເຜ່ຍແຜ່ນະໂຍບາຍ ຂະຫຍາຍອາຍຸບໍານານຕາມກົດໝາຍແບບຄ່ອຍເປັນຄ່ອຍໄປ ເພື່ອໃຫ້ປະຊາຊົນທີ່ມີອາຍຸຫລາຍກວ່າ 60 ປີ ສາມາດເຮັດວຽກໄດ້ດົນຂຶ້ນ ເນື່ອງຈາກປະຊາກອນສູງອາຍຸເພີ່ມຂຶ້ນ ສົ່ງຜົນຕໍ່ງົບປະມານບໍານານມະຫາສານ.

     ວັນທີ 23 ກໍລະກົດ, ສໍານັກຂ່າວຕ່າງປະເທດລາຍງານວ່າ: ຈີນກຽມຂະຫຍາຍອາຍຸບໍານານຕາມກົດໝາຍ ເພື່ອໃຫ້ປະຊາຊົນສາມາດເຮັດວຽກໄດ້ດົນຂຶ້ນ ພາຍຫລັງລັດຖະບານຕ້ອງບັນເທົາຄວາມກົດດັນຕໍ່ງົບປະມານບໍານານທີ່ເພີ່ມສູງຂຶ້ນ ຂະນະທີ່ຫລາຍມົນທົນຜະເຊີນສະພາບງົບປະມານຂາດດຸນ.

     ທັງນີ້, ອາຍຸຄາດສະເລ່ຍຂອງຈີນຈະເພີ່ມຂຶ້ນເປັນ 78 ປີ ພາຍໃນປີ 2011 ຈາກປະມານ 44 ປີໃນປີ 1960 ແຊງອາເມລິກາ ແລະ ຄາດວ່າຈະເພີ່ມເປັນສູງເກີນ 80 ປີ ພາຍໃນປີ 2050.

     ເອກະສານທີ່ເຜີຍແຜ່ໃນວັນທີ 21 ກໍລະກົດຜ່ານມາ ກ່ຽວຂ້ອງກັບແຜນການປັບປຸງຍຸດທະສາດ ເພື່ອຕໍ່ສູ້ກັບອັດຕາການເກີດທີ່ຫລຸດລົງ ແລະ ຈໍານວນປະຊາກອນສູງອາຍຸທີ່ເພີ່ມຂຶ້ນເປັນປີທີສອງຕິດຕໍ່ກັນ ໃນປີ 2023 ແລະ ມີທ່າອ່ຽງຫລຸດລົງຢ່າງຕໍ່ເນື່ອງ ເພື່ອໃຫ້ສອດຄ່ອງກັບຫລັກການມີສ່ວນຮ່ວມໂດຍສະໝັກໃຈ ແລະ ຄວາມຢືດຢຸ່ນທີ່ເໝາະສົມ, ເຮົາຈະເດີນໜ້າປະຕິຮູບໂດຍການທະຍອຍເພີ່ມອາຍຸບໍານານຕາມກົດໝາຍຢ່າງຮອບຄອບ ແລະ ເປັນລະບຽບ. ຖະແຫລງການລະບຸ. ທັງນີ້ ການປະຕິຮູບທີ່ລະບຸໄວ້ໃນເອກະສານ ຄາດວ່າຈະສໍາເລັດພາຍໃນປີ 2029.

      ປັດຈຸບັນ ອາຍຸບໍານານສໍາລັບຜູ້ຊາຍຢູ່ຈີນແມ່ນ 60 ປີ ຕໍ່າກວ່າອາຍຸໃນປະເທດທີ່ພັດທະນາແລ້ວ 5-6 ປີ. ສໍາລັບຜູ້ຍິງທີ່ເຮັດວຽກຫ້ອງການຄື 55 ປີ ແລະ 50 ປີ ສໍາລັບຜູ້ຍິງທີ່ເຮັດວຽກໃຊ້ແຮງງານ.

     ລັດຖະບານປັກກິ່ງໃຫ້ເຫດຜົນວ່າ: ໃນໄລຍະ 2 ປີຜ່ານມາ ພາກລັດມີເປົ້າໝາຍເພີ່ມອາຍຸບໍານານ ແລະ ເປັນຄັ້ງທໍາອິດທີ່ແຮງງານຈະສາມາດເລືອກເຮັດວຽກຕໍ່ໄປໄດ້.

     ສ່ວນຄະນະກົມສຸຂະພາບແຫ່ງຊາດຄາດຄະເນວ່າ: ປະຊາກອນທີ່ມີອາຍຸແຕ່ 60 ປີຂຶ້ນໄປຢູ່ຈີນຈະເພີ່ມຂຶ້ນຈາກ 280 ລ້ານຄົນ ເປັນຫລາຍກວ່າ 400 ລ້ານຄົນພາຍໃນປີ 2035 ຫລື ທຽບເທົ່າກັບຈໍານວນປະຊາກອນປັດຈຸບັນທັງໝົດຂອງອັງກິດ ແລະ ອາເມລິກາລວມກັນ.