ອິນໂດເນເຊຍສະໜັບສະໜູນຊາວກະສິກອນໃຊ້ກາບໝາກພ້າວຜະລິດເຊື້ອໄຟຊີວະພາບ

     ອິນໂດເນເຊຍໃຫ້ຄວາມສໍາຄັນຕໍ່ການໃຊ້ປະໂຫຍດຈາກກາບໝາກພ້າວມາຜະລິດເປັນເຊື້ອໄຟຊີວະພາບ ເຊິ່ງເປັນສ່ວນໜຶ່ງຂອງຄວາມພະຍາຍາມເດີນໜ້າເສດຖະກິດສີຂຽວເປັນມິດຕໍ່ສິ່ງແວດລ້ອມ.

     ວັນທີ 23 ກໍລະກົດ, ສໍານັກຂ່າວຊິນຮົວລາຍງານວ່າ: ປະທານາທິບໍດີ ໂຈໂຄ ວິໂດໂດ ຜູ້ນໍາອິນໂດເນເຊຍ ກ່າວລະຫວ່າງເຂົ້າຮ່ວມກອງປະຊຸມໂຄໂຄເທັກສາກົນ (International Cocotech Conference and Exhibition) ຄັ້ງທີ 51 ຢູ່ເມືອງສຸຣາບາຢາ ແຂວງຊະວາຕາເວັນອອກ ວ່າ: ການແປຮູບກາບໝາກພ້າວຈໍານວນຫລາຍເປັນເຊື້ອໄຟຊີວະພາບ ມີຄວາມສໍາຄັນຕໍ່ການພັດທະນາເພີ່ມຂຶ້ນ.

      ຜູ້ນໍາອິນໂດເນເຊຍອະທິບາຍວ່າ: ຂະບວນການປາຍນໍ້ານີ້ຈະໃຊ້ປະໂຫຍດຈາກເຕັກໂນໂລຊີຍຸກປັດຈຸບັນ ມາຮັບຮອງວ່າຜະລິດຕະພັນຕ່າງໆຕອບສະໜອງຄວາມຕ້ອງການຂອງຕະຫລາດ ແລະ ເປັນສິ່ງຕ້ອງການສູງໃນປະເທດຕ່າງໆ ໂດຍອິນໂດເນເຊຍສາມາດເພີ່ມປະສິດທິພາບເສດຖະກິດສີຂຽວເຖິງຈຸດສູງສຸດ ດ້ວຍການພັດທະນາອຸດສາຫະກໍາສິນຄ້າຈາກໝາກພ້າວ ຄຽງຄູ່ກັບສິນຄ້າອື່ນໆເຊັ່ນ: ວານິລາ, ໂກໂກ້, ກາເຟ ແລະ ໝາກເຜັດ.

      ປັດຈຸບັນ, ອິນໂດເນເຊຍມີເນື້ອທີ່ປູກໝາກພ້າວ 3.8 ລ້ານເຮັກຕາ ເຮັດໃຫ້ເປັນຜູ້ຜະລິດສິນຄ້າຈາກໝາກພ້າວລາຍໃຫຍ່ອັນດັບສອງຂອງໂລກ ດ້ວຍປະລິມານການຜະລິດປະມານ 2.8 ລ້ານໂຕນຕໍ່ປີ.