ທ່ານ ໂຈ ໄບເດັນ ຖອນຕົວຊີງຕຳແໜ່ງປະທານາທິບໍດີ ສະຫະລັດອາເມລິກາ ຍ້ອນບັນຫາສຸຂະພາບ

ຂ່າວຕ່າງປະເທດລາຍງານວ່າ: ວັນທີ 22 ກໍລະກົດ 2024 ນີ້, ທ່ານ ໂຈ ໄບເດັນ ປະທະນາທິບໍດີ ສະຫະລັດອາເມລິກາ ໄດ້ໂພສຈົດໝາຍລົງເຟສບຸກສ່ວນຕົວ ປະກາດຖອນຕົວອອກຈາກການລົງສະໝັກເລືອກຕັ້ງເປັນປະທານາທິບໍດີ ສະໄໝທີ 2, ເປັນການຕັດສິນໃຈ ທີ່ເກີດຂຶ້ນພາຍຫລັງມີກະແສຮຽກຮ້ອງຈາກທັງໃນ ແລະ ນອກ ພັກເດໂມແຄຣັດ ໃຫ້ທ່ານຖອນຕົວ ເນື່ອງຈາກບັນຫາສຸຂະພາບ ປັດຈຸບັນ ທ່ານ ໂຈ ໄບເດັນ ອາຍຸ 81 ປີ ເປັນປະທານາທີບໍດີອາຍຸຫລາຍທີ່ສຸດໃນປະຫວັດສາດຂອງສະຫະລັດອາເມລິກາ.

ທ່ານຂຽນໃນຈົດໝາຍວ່າ: ນັບເປັນກຽດສູງສຸດໃນຊີວິດທີ່ໄດ້ຮັບໃຊ້ໃນຖານະປະທານາທິບໍດີ ເຖິງວ່າທີ່ຜ່ານມາຈະມີຄວາມຕັ້ງໃຈທີ່ຈະລົງສະໝັກເລືອກຕັ້ງຮອບ 2 ແຕ່ເຊື່ອວ່າຈະເປັນເລື່ອງດີກັບພັກ ແລະ ປະເທດຫລາຍທີ່ສຸດ ຫາກຖອນຕົວ ແລະ ເດີນໜ້າເຮັດໜ້າທີ່ປະທານາທິບໍດີໃນໄລຍະເວລາທີ່ເຫລືອຢູ່.

ທ່ານຍັງໄດ້ກ່າວເຖິງຄວາມສຳເລັດ ແລະ ຜົນງານຂອງຕົນເອງໃນຖານະປະທະນາທິບໍດີ ເຊັ່ນ: ເລື່ອງເສດຖະກິດ, ສະຫວັດດີການ, ຄວາມເທົ່າທຽມ, ກົດໝາຍເລື່ອງສະພາບອາກາດ. ທ່ານໄດ້ຂອບໃຈກຸ່ມຄົນທີ່ເຮັດວຽກຢ່າງໜັກ ເພື່ອແຄມເປນເລືອກຕັ້ງຂອງຕົນ ລວມເຖິງຂອບໃຈ ນາງ ກຳມະລາ ແຮຣີສ ຮອງປະທານາທິບໍດີທີ່ເຮັດວຽກຮ່ວມກັນມາ ແລະ ຂອບໃຈຊາວອາເມລິກາທີ່ໄວ້ວາງໃຈ.

ທ່ານ ໂຈ ໄບເດັນ ເຂົ້າຮັບຕຳແໜ່ງປະທາທິບໍດີສະຫະລັດ ອາເມລິກາ ໃນວັນທີ 20 ມັງກອນ 2020 ເປັນປະທາທິບໍດີ ຄົນທີ 46 ຂອງສະຫະລັດອາເມລິກາ, ການປະກາດຖອນຕົວຂອງທ່ານໂຈ ໄບເດັນ ເພື່ອເປັນການເປີດທາງ ແລະ ສະໜັບສະໜູນໃຫ້ ທ່ານນາງ ກຳມະລາ ແຮຣີສ, ຮອງປະທາທິບໍດີ ລົງຮັບສະໝັກເລືອກຕັ້ງເປັນຜູ້ຍິງຜີວດຳຄົນທຳອິດໃນປະຫວັດສາດຂອງສະຫະລັດອາເມລິກາ.