ລັດຖະບານຄອງໂກເຜີຍ ຈໍານວນຜູ້ຕິດເຊື້ອພະຍາດໝາກສຸກລີງເພີ່ມຂຶ້ນຫລາຍ
ລັດຖະບານຄອງໂກ ລະບຸວ່າ: ຈໍານວນຜູ້ຕິດເຊື້ອພະຍາດໝາກສຸກລີງພາຍໃນປະເທດເພີ່ມຂຶ້ນຫລາຍ ແລະ ວ່ອງໄວ.
ວັນທີ 21 ກໍລະກົດ, ສໍານັກຂ່າວຕ່າງປະເທດລາຍງານວ່າ: ທ່ານ ແພດຣິກ ມູຢາຢາ ໂຄສົກລັດຖະບານຄອງໂກ ກ່າວວ່າ: ຈໍານວນຜູ້ຕິດເຊື້ອຕ້ອງສົງໄສເພີ່ມຂຶ້ນເປັນ 11,166 ຄົນ ລວມທັງຜູ້ເສຍຊີວິດ 450 ຄົນ ຫລື ອັດຕາການເສຍຊີວິດ 4%.
ຂະນະທີ່ລາຍງານຂອງກະຊວງສາທາລະນະສຸກຄອງໂກ ເຜີຍໃຫ້ເຫັນວ່າ: ຈໍານວນຜູ້ຕິດເຊື້ອເພີ່ມຂຶ້ນຢ່າງວ່ອງໄວ ແລະ ແຂວງເອກາເຕີ ທາງຕາເວັນຕົກຂອງປະເທດ ເປັນພື້ນທີ່ໄດ້ຮັບຜົນກະທົບໜັກທີ່ສຸດ.
ນອກຈາກນີ້, ລາຍງານຍັງລະບຸວ່າ: ລັດຖະບານກໍາລັງດໍາເນີນມາດຕະການຕ່າງໆ ເພື່ອຕໍ່ສູ້ພະຍາດນີ້ ໂດຍສະເພາະການເບິ່ງແຍງທາງການແພດ, ການຕິດຕາມການຕິດຕໍ່ເຂດສຸຂະພາບທີ່ກ່ຽວຂ້ອງ ແລະ ການສົ່ງເສີມການເຝົ້າລະວັງໃນທ້ອງຖິ່ນ.
ລາຍງານດັ່ງກ່າວມີຂຶ້ນພຽງບໍ່ເທົ່າໃດວັນ ພາຍຫລັງອົງການອະນາໄມໂລກ (WHO) ເຕືອນເຖິງໄພຄຸກຄາມດ້ານສຸຂະພາບລະດັບໂລກ ອັນເກີດຈາກພະຍາດໝາກສຸກລີງ ທ່າມກາງຄວາມກັງວົນກ່ຽວກັບການລະບາດຂອງເຊື້ອໄວຣັສ MPOX ສາຍພັນໃໝ່ທີ່ອັນຕະລາຍກວ່າເກົ່າຢູ່ຄອງໂກ.
ການລະບາດຄັ້ງຫລ້າສຸດ ບໍ່ມີທ່າທີວ່າຈະຢຸດລົງ. ທ່ານ ເທດຣອສ ແອດຮານອມ ເກເບເຢຊຸສ ຜູ້ອໍານວຍການ WHO ກ່າວອີກວ່າ: ປັດຈຸບັນມີລາຍງານພົບຜູ້ຕິດເຊື້ອແລ້ວ 11,000 ຄົນ ແລະ ຜູ້ເສຍຊີວິດອີກ 445 ຄົນ ເຊິ່ງເດັກນ້ອຍເປັນກຸ່ມໄດ້ຮັບຜົນກະທົບຫລາຍທີ່ສຸດ.
