CrowdStrike ຂໍໂທດທົ່ວໂລກພາຍຫລັງລະບົບຫລົ່ມ ກະທົບລະບົບຂົນສົ່ງ ແລະ ທະນາຄານ ຢືນຢັນສ້ອມແປງແລ້ວ ແຕ່ຕ້ອງໃຊ້ເວລາ
ຜູ້ບໍລິຫານລະດັບສູງຂອງບໍລິສັດຊັອບແວຄວາມປອດໄພ CrowdStrike ຂໍອະໄພປະຊາຊົນທົ່ວໂລກ ພາຍຫລັງເກີດເຫດຂັດຂ້ອງຄັ້ງໃຫຍ່ ໂດຍຢືນຢັນແກ້ໄຂແລ້ວ ແຕ່ຕ້ອງໃຊ້ເວລາກວ່າສະຖານະການຈະກັບມາເປັນປົກກະຕິ.
ວັນທີ 20 ກໍລະກົດ, ສໍານັກຂ່າວຕ່າງປະເທດລາຍງານວ່າ: ບໍລິສັດ CrowdStrike ເຜີຍແຜ່ຖະແຫລງການສະບັບໃໝ່ຂອງທ່ານ ຈອດ ຄົວ ປະທານຄະນະເຈົ້າໜ້າທີ່ບໍລິຫານ (CEO) ຂໍໂທດເຖິງບໍລິສັດທຸກແຫ່ງທົ່ວໂລກ ແລະ ປະຊາຊົນທຸກຄົນ ທີ່ໄດ້ຮັບຜົນກະທົບຈາກຄວາມຂັດຂ້ອງທີ່ເກີດຂຶ້ນລະຫວ່າງການອັບເດດຊັອບແວຂອງບໍລິສັດ ທີ່ເຮັດໜ້າທີ່ຮັກສາຄວາມປອດໄພທາງດິຈິຕອນໃຫ້ບໍລິສັດໄມໂຄຣຊັອບ ສົ່ງຜົນເຮັດໃຫ້ລະບົບຫລົ້ມເປັນວົງກວ້າງທົ່ວໂລກ.
ທັງນີ້, CEO ຂອງ CrowdStrike ຢືນຢັນວ່າ: ແກ້ໄຂບັນຫາທັງໝົດແລ້ວ, ແຕ່ອາດຕ້ອງໃຊ້ເວລາອີກໄລຍະໜຶ່ງຈົນກວ່າເຄືອຂ່າຍທັງໝົດ ເຊິ່ງມີຂະໜາດໃຫຍ່ ແລະ ຊັບຊ້ອນຈະກັບມາເຮັດວຽກໄດ້ຕາມປົກກະຕິ.
ຖະແຫລງການຂອງໄມໂຄຣຊັອບໃຫ້ຂໍ້ມູນວ່າ: ບັນຫາເລີ່ມເກີດຂຶ້ນເມື່ອເວລາ 19:00 ໂມງ ຕາມເວລາມາດຕະຖານຂອງສາກົນຂອງວັນທີ 18 ກໍລະກົດຜ່ານມາ (02:00 ໂມງ ວັນທີ 19 ກໍລະກົດ ຕາມເວລາປະເທດລາວ) ສົ່ງຜົນກະທົບຕໍ່ລູກຄ້າທັງໝົດຂອງ CrowdStrike ທີ່ໃຊ້ຊັອບແວ ຄຣາວສໄຕຣ ຟັລຄອນ ແລະ ທຸກຝ່າຍພະຍາຍາມແກ້ໄຂສະຖານະການນັບແຕ່ຕອນນັ້ນ ແຕ່ວ່າສະຖານະການລຸກລາມຂະຫຍາຍວົງກວ້າງ ໃນວັນທີ 19 ກໍລະກົດຜ່ານມາ.
ຂະນະດຽວກັນ, ໄມໂຄຣຊັອບກ່າວວ່າ: ຄອມພິວເຕີທີ່ໄດ້ຮັບຜົນກະທົບອາດຕ້ອງໄດ້ຮັບການຣີບູດຫລາຍຄັ້ງ ເພື່ອໃຫ້ລະບົບການເຮັດວຽກຂອງອຸປະກອນກັບມາເປັນປົກກະຕິ.
ສ່ວນບັນຍາກາດຂອງບໍລິການທີ່ໄດ້ຮັບຜົນກະທົບນັ້ນ ໃນພາບລວມມີການລາຍງານເຂົ້າມາຢ່າງຕໍ່ເນື່ອງວ່າເລີ່ມກັບເປັນປົກກະຕິ, ແຕ່ບໍລິສັດທຸກແຫ່ງ ບໍ່ວ່າຈະເປັນສາຍການບິນ, ລະບົບຂົນສົ່ງມວນຊົນ, ທະນາຄານ, ໂຮງແຮມ, ຮ້ານຄ້າຂະໜາດໃຫຍ່ ແລະ ຜູ້ໃຫ້ບໍລິການໂທລະຄົມມະນາຄົມ ເຕືອນຜູ້ຮັບບໍລິການວ່າ: ການໃຫ້ບໍລິການອາດຍັງມີຄວາມຊັກຊ້າໃນບາງຂັ້ນຕອນ ແລະ ຂໍໃຫ້ປະຊາຊົນເຜື່ອເວລາເພື່ອຮັບການບໍລິການ.
