ອິດສະລາແອນຖະຫລົ່ມເມືອງທ່າຢູ່ເຢເມນ ເອົາຄືນຮູຕິສົ່ງໂດຣນໂຈມຕີເມືອງເທວອາວີບ

     ເຮືອບິນຮົບຂອງອິດສະລາແອນໂຈມຕີເມືອງໂຮໄດດາຂອງເຢເມນ ຕອບໂຕ້ທີ່ກອງກໍາລັງຮູຕິສົ່ງໂດຣນມານະຄອນຫລວງເທວອາວີບ ແລະ ສັງຫານຊາວອິດສະລາແອນເສຍຊີວິດ 1 ຄົນ.

     ວັນທີ 21 ກໍລະກົດ, ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນຢືນຢັນ ການສົ່ງເຮືອບິນຮົບໄປປະຕິບັດການໂຈມຕີທ່າເຮືອ ຢູ່ເມືອງໂຮໄດດາ ເຊິ່ງເປັນເມືອງທ່າແຫ່ງສໍາຄັນ ແລະ ເປັນເມືອງໃຫຍ່ອັນດັບ 4 ຕັ້ງຢູ່ແຄມທະເລແດງ ໃນວັນທີ 20 ກໍລະກົດຜ່ານມາ ເພື່ອທໍາລາຍຖານທີ່ໝັ້ນຂອງກອງກໍາລັງຮູຕິ ແລະ ລະບຸອີກວ່າ: ກຸ່ມຮູຕິໃຊ້ທ່າເຮືອແຫ່ງນີ້ເປັນເສັ້ນທາງຫລັກ ໃນການລໍາລຽງອາວຸດທີ່ໄດ້ຮັບການສະໜັບສະໜູນຈາກອີຣານ.

     ກະຊວງສາທາລະນະສຸກຂອງກຸ່ມຮູຕິອອກຖະແຫລງການວ່າ: ການໂຈມຕີດັ່ງກ່າວສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 3 ຄົນ ແລະ ມີຜູ້ໄດ້ຮັບບາດເຈັບອີກ 87 ຄົນ ໂດຍຜູ້ເສຍຊີວິດ ແລະ ຜູ້ໄດ້ຮັບບາດເຈັບສ່ວນຫລາຍມີບາດແຜນຈາກໄຟໄໝ້ ແລະ ການໂຈມຕີຂອງອິດສະລາແອນເນັ້ນທໍາລາຍໂຮງໄຟຟ້າຢູ່ເມືອງໂຮໄດດາ.

     ຂະນະທີ່ນາຍົກລັດຖະມົນຕີ ເບນຈາມິນ ເນທັນຢາຮູ ຜູ້ນໍາອິດສະລາແອນ ກ່າວວ່າ: ໃຜກໍຕາມທີ່ເຂັ່ນຂ້າພົນລະເມືອງອິດສະລາແອນ ຕ້ອງໄດ້ຮັບຜົນຕອບແທນຢ່າງສາສົມ. ສ່ວນທ່ານ ໂຢອາບ ກັລລັນ ລັດຖະມົນຕີປ້ອງກັນປະເທດອິດສະລາແອນ ກ່າວວ່າ: ກອງທັບບໍ່ລັງເລທີ່ຈະປະຕິບັດການອີກ ຖ້າກຸ່ມຮູຕິຍັງບໍ່ຢຸດໂຈມຕີອິດສະລາແອນ.

     ທັງນີ້, ກອງກໍາລັງຮູຕິອ້າງເປັນຜູ້ສົ່ງຍົນໄຮ້ຄົນຂັບຂະໜາດໃຫຍ່ ເຊິ່ງເດີນທາງໄດ້ໄກເຖິງນະຄອນຫລວງເທວອາວີບ ແລະ ໂຈມຕີອາຄານທີ່ພັກອາໄສແຫ່ງໜຶ່ງ ສົ່ງຜົນເຮັດໃຫ້ມີຜູ້ເສຍຊີວິດ 1 ຄົນ ໃນວັນທີ 19 ກໍລະກົດຜ່ານມາ.

    ປະຕິບັດການທາງທະຫານຂອງອິດສະລາແອນຄັ້ງນີ້ ຖືເປັນຄັ້ງທໍາອິດຢ່າງເປັນທາງການທີ່ອິດສະລາແອນຢືນຢັນ ເປັນຝ່າຍໂຈມຕີເປົ້າໝາຍຢູ່ເຢເມນ ທີ່ຢູ່ຫ່າງອອກໄປໄກເຖິງ 2,000 ກິໂລແມັດ.