ເປີດແລ່ນລົດໄຟ ຂົນສົ່ງຜູ້ໂດຍສານ ລາວ-ໄທ ແຕ່ ສະຖານີຄໍາສະຫວາດ ຫາ ສະຖານີ ກຸງເທບອະພິວັດ

ພິທີເປີດແລ່ນລົດໄຟ ຂົນສົ່ງຜູ້ໂດຍສານ ລາວ-ໄທ ແຕ່ ນະຄອນຫລວງວຽງຈັນ (ສະຖານີຄໍາສະຫວາດ) ຫາ ບາງກອກ (ສະຖານີ ກຸງເທບອະພິວັດ) ໄດ້ຈັດຂຶ້ນໃນວັນທີ 20 ກໍລະກົດ 2024, ໂດຍມີ ທ່ານ ໄຊສົງຄາມ ມະໂນທັມ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ, ທ່ານ ສຸລະພົງ ປີຍະໂຊດ ຮອງລັດຖະມົນຕີ ກະຊວງຄົມມະນາຄົມ ແຫ່ງ ຣາຊະອານາຈັກໄທ, ພ້ອມດ້ວຍຄະນະຜູ້ແທນສອງປະເທດເຂົ້າຮ່ວມ.

ທ່ານ ຫີນເພັດ ຫລ້າຄອນວົງ ຮອງຫົວໜ້າກົມທາງລົດໄຟ ກະຊວງ ໂຍທາທິການ ແລະ ຂົນສົ່ງ ລາຍງານວ່າ: ພິທີເປີດແລ່ນລົດໄຟຂົນສົ່ງຜູ້ໂດຍສານ ລາວ-ໄທ ແຕ່ບ້ານຄໍາສະຫວາດ ນະຄອນຫລວງວຽງຈັນ ຫາ ບາງກອກ ສະຖານີ ກຸງເທບອະພິວັດ, ເປັນໂຄງການກໍ່ສ້າງເສັ້ນທາງລົດໄຟ ລາວ-ໄທ ທ່ານາແລ້ງ-ຄໍາສະຫວາດ ແມ່ນໄດ້ຮັບການສະໜັບສະໜູນຊ່ວຍເຫລືອທາງດ້ານງົບປະມານໃຫ້ແກ່ ສປປ ລາວ ຈາກລັດຖະບານໄທ ຜ່ານອົງການ NEDA ຊຶ່ງນອນໃນແຜນຍຸດທະສາດ ການພັດທະນາເສັ້ນທາງລົດໄຟ ເຊື່ອມຕໍ່ ລາວ-ໄທ ຂອງກະຊວງ ໂຍທາທິການ ແລະ ຂົນສົ່ງ, ທັງເປັນການຊ່ວຍເຫລືອທີ່ມີຄວາມໝາຍຄວາມສຳຄັນ ແລະ ຈະດຶງດູດນັກທ່ອງທ່ຽວເຂົ້າມາທ່ຽວ ສປປ ລາວ ໃຫ້ຫລາຍຂຶ້ນທັງເປັນການພັດທະນາໂຄງລ່າງພື້ນຖານ ຂອງ ສປປ ລາວ, ໂຄງການນີ້ແມ່ນໃຊ້ງົບປະມານທັງໝົດ 1,650 ລ້ານບາດ, ໃນນີ້ເປັນເງິນກູ້ 70% ແລະ ຊວ່ຍເຫລືອ 30% ໂຄງການກໍ່ສ້າງເສັ້ນທາງລົດໄຟ ລາວ-ໄທ ໄລຍະ 2 ຊຶ່ງປະກອບມີການກໍ່ສ້າງສະຖານີວຽງຈັນ (ຄຳສະຫວາດ), ສະຖານີສິນຄ້າ ທ່ານາແລ້ງ ແລະ ການກໍ່ສ້າງລາງລົດໄຟ ແຕ່ສະຖານີທ່ານາແລ້ງ-ສະຖານີວຽງຈັນ, ລວງຍາວ 7,5 ກິໂລແມັດ ແລະ ໄດ້ສໍາເລັດ.

ລົດໄຟຂົນສົ່ງຜູ້ໂດຍສານ ລາວ-ໄທ ແມ່ນໜຶ່ງໃນບັນດາໂຄງການຮວ່ມມື ຂອງສອງລັດຖະບານ ລາວ ແລະ ໄທ ໃນການສ້າງເງື່ອນໄຂອໍານວຍຄວາມສະດວກໃຫ້ແກ່ການສັນຈອນ ໄປ-ມາ ຫາສູ່ກັນຂອງປະຊາຊົນສອງຊາດ ລາວ-ໄທ ແລະ ການຂົນສົ່ງລະຫວ່າງປະເທດ ເພື່ອສົ່ງເສີມດ້ານການຄ້າ-ການລົງທຶນ ແລະ ທ່ອງທ່ຽວ ກໍຄືການນໍາໃຊ້ທີ່ຕັ້ງຍຸດທະສາດອັນສໍາຄັນຂອງສອງປະເທດຢູ່ອະນຸພາກພື້ນລຸ່ມແມ່ນໍ້າຂອງ ແລະ ອາຊີຕາເວັນອອກ-ສ່ຽງໃຕ້ ໃນການເຊື່ອມໂຍງ-ເຊື່ອມຈອດພື້ນຖານໂຄງລ່າງຕາມແລວເສດຖະກິດຕາເວັນອອກ-ຕາເວັນຕົກ, ເໜືອ-ໃຕ້ ຊຶ່ງຈະເປັນການອໍານວຍຄວາມສະດວກ ແລະ ສະໜັບສະໜູນ ການພັດທະນາການເຊື່ອມໂຍງການຂົນສົ່ງໃຫ້ໂລ່ງລ່ຽນ ລະຫວ່າງ ສອງປະເທດ ລາວ-ໄທ ກັບບັນດາປະເທດອະນຸພາກພື້ນໃຫ້ເກີດຜົນປະໂຫຍດສູງສຸດຮ່ວມກັນ.

ຂ່າວ: ປະຊາຊົນ