ບັງກະລາເທດປະກາດເຄີຟິວ ໃຫ້ທະຫານລົງພື້ນທີ່ຮັກສາຄວາມສະຫງົບຈາກຜູ້ປະທ້ວງ

      ລັດຖະບານບັງກະລາເທດປະກາດເຄີຟິວທົ່ວປະເທດ ທ່າມກາງການປະທ້ວງຕໍ່ຕ້ານການແບ່ງໂກຕ້າວຽກລັດຖະກອນ ແລະ ໃຫ້ທະຫານຊ່ວຍຄວບຄຸມສະຖານະການ.

     ວັນທີ 20 ກໍລະກົດ, ສໍານັກຂ່າວຕ່າງປະເທດລາຍງານວ່າ: ສໍານັກງານເລຂາທິການຄະນະລັດຖະບານບັງກະລາເທດ ອອກຖະແຫລງການວ່າ: ນາຍົກລັດຖະມົນຕີ ຊີກ ຮາສິນາ ມີຄໍາສັ່ງປະກາດເຄີຟິວທົ່ວປະເທດ ເຊິ່ງມີຜົນບັງຄັບໃຊ້ທັນທີ ແລະ ການຂໍການສະໜັບສະໜູນຈາກກອງທັບ ໃນການສົ່ງທະຫານລົງພື້ນທີ່ເພື່ອປະຕິບັດພາລະກິດຮັກສາສະຖຽນລະພາບ ແລະ ຄວາມປອດໄພ.

     ຂະນະທີ່ສໍານັກງານຕໍາຫລຸດນະຄອນຫລວງທາກາປະກາດ ຫ້າມຈັດການຊຸມນຸມ ແລະ ການເດີນຂະບວນທາງການເມືອງທຸກຮູບແບບໃນເມືອງຫລວງ ເຊິ່ງເປັນສູນກາງຂອງການເຄື່ອນໄຫວຕໍ່ຕ້ານລັດຖະບານມາ 1 ເດືອນແລ້ວ ຈາກຄວາມຄຽດແຄ້ນຢ່າງໜັກ ແລະ ຄວາມບໍ່ພໍໃຈສະສົມມາດົນຂອງປະຊາຊົນ ໂດຍສະເພາະກຸ່ມນັກສຶກສາທີ່ມີຕໍ່ລະບົບຈ້າງວຽກຂອງພາກລັດ ເຊິ່ງຍັງເປັນການສະຫງວນໂກຕ້າຕໍາແໜ່ງວຽກລັດຖະກອນປະມານ 30% ໄວ້ໃຫ້ລູກຫລານ ແລະ ທາຍາດຂອງວິລະບູລຸດສົງຄາມ ເຊິ່ງຮ່ວມຮົບ ແລະ ຕໍ່ສູ້ເພື່ອໃຫ້ບັງກະລາເທດເປັນເອກະລາດຈາກປາກິດສະຖານ ໃນປີ 1911.

     ທັງນີ້, ຜູ້ປະທ້ວງເບິ່ງວ່າ: ເປັນການເລືອກປະຕິບັດຢ່າງຮ້າຍແຮງ ແລະ ເປັນອຸປະສັກຕໍ່ການແກ້ໄຂບັນຫາຄວາມທຸກຍາກ ລວມທັງອັດຕາການວ່າງງານທີ່ເພີ່ມສູງ.

     ຄວາມຮຸນແຮງຂອງການປະທ້ວງສົ່ງຜົນເຮັດໃຫ້ມີຜູ້ເສຍຊີວິດເພີ່ມຕໍ່ເນື່ອງ ເປັນຢ່າງໜ້ອຍ 105 ຄົນ ແລະ ມີຜູ້ໄດ້ຮັບບາດເຈັບອີກຫລາຍກວ່າ 1,000 ຄົນ ສ່ວນຫລາຍເປັນນັກສຶກສາ. ສ່ວນເຈົ້າໜ້າທີ່ມີການເສຍຊີວິດ ແລະ ໄດ້ຮັບບາດເຈັບເຊັ່ນກັນ.

     ນອກຈາກນີ້, ຜູ້ປະທ້ວງຫລາຍຮ້ອຍຄົນ ບຸກເຂົ້າໄປພາຍໃນສະຖານີໂທລະພາບ BTV ເຊິ່ງເປັນສະຖານີຂອງລັດ ໃນນະຄອນຫລວງທາກາ ໃນວັນທີ 18 ກໍລະກົດຜ່ານມາ ທໍາລາຍຊັບສິນທີ່ຢູ່ພາຍໃນອາຄານ ແລະ ຈູດໄຟເຜົາພື້ນທີ່ຈົນໄດ້ຮັບຄວາມເສຍຫາຍບາງສ່ວນ ຫລັງຜູ້ນໍາບັງກະລາເທດຖະແຫລງຜ່ານສະຖານີໂທລະພາບແຫ່ງຊາດບ່ອນນີ້ ຮຽກຮ້ອງຜູ້ປະທ້ວງຢຸດການເຄື່ອນໄຫວ.

     ທ່ານ ສເຕຟານ ດູຈາຣິກ ເລຂາທິການສະຫະປະຊາຊາດ (UN) ກ່າວວ່າ: ທ່ານ ອັນໂຕນິໂອ ກູເຕີເຣສ ເລຂາທິການ UN ມີຄວາມກັງວົນຕໍ່ສະຖານະການທີ່ເກີດຂຶ້ນ ແລະ ຮຽກຮ້ອງໃຫ້ຄູ່ກໍລະນີທຸກຝ່າຍຫັນມາເຈລະຈາກັນໂດຍໄວທີ່ສຸດ.

    ເຖິງຢ່າງໃດກໍຕາມ, ກະຊວງໂທລະຄົມມະນາຄົມຂອງບັງກະລາເທດ ປະກາດຕັດສັນຍານອິນເຕີເນັດເກືອບທົ່ວປະເທດ ນັບແຕ່ຕອນຄໍ່າວັນທີ 18 ກໍລະກົດຜ່ານມາ ເພື່ອຄວບຄຸມການເຜີຍແຜ່ຂໍ້ມູນຂ່າວສານທີ່ບໍ່ມີມູນຄວາມຈິງ.