ສະພາແຫ່ງຊາດຮັບຮອງເອົາກົດໝາຍວ່າດ້ວຍການປົກປ້ອງຜູ້ຜະລິດທີ່ໄດ້ຮັບຜົນກະທົບຈາກການນຳເຂົ້າສິນຄ້າ

ຜ່ານການສະເໜີຮ່າງກົດໝາຍວ່າດ້ວຍການປົກປ້ອງຜູ້ຜະລິດທີ່ໄດ້ຮັບຜົນຜົນກະທົບຈາກການນຳເຂົ້າສິນຄ້າ ທີ່ປະກອບມີ 7 ພາກ, 7 ໝວດ ແລະ 52 ມາດຕາ, ຂອງທ່ານນາງ ເຂັມມະນີ ລັດຖະມົນຕີກະຊວງອຸດສາຫະກຳ ແລະ ການຄ້າ, ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII, ໃນວັນທີ 30 ຕຸລານີ້, ທີ່ນະຄອນຫລວງວຽງຈັນ, ຜົນປະກົດວ່າ: ປະທານ ແລະ ຮອງປະທານສະພາແຫ່ງຊາດ ພ້ອມດ້ວຍສະມາຊິກສະພາແຫ່ງຊາດເຂດເລືອກຕັ້ງຕ່າງໆໃນຂອບເຂດທົ່ວປະເທດ ໄດ້ເປັນເອກະພາບກັນຮັບຮອງເອົາຮ່າງກົດໝາຍດັ່ງກ່າວດ້ວຍຄະແນນສຽງສ່ວນຫລາຍ.
ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ສະເໜີຕໍ່ທີ່ປະຊຸມວ່າ: ການສ້າງຮ່າງກົດໝາຍດັ່ງກ່າວ ແມ່ນເປັນການແກ້ໄຂການຫລຸດພາສີນຳເຂົ້າສິນຄ້າ ຕາມສັນຍາຂອງອົງການການຄ້າໂລກ, ສັນຍາການຄ້າເສລີອາຊຽນ ແລະ ສັນຍາການຄ້າອື່ນໆເປັນຈຳນວນຫລາຍນັ້ນ, ອາດເຮັດໃຫ້ຜູ້ຜະລິດພາຍໃນໄດ້ຮັບຄວາມເສຍຫາຍຢ່າງຮ້າຍແຮງ, ເນື່ອງຈາກບໍ່ສາມາດແຂ່ງຂັນກັບສິນຄ້ານຳເຂົ້າທີ່ເພີ່ມຂຶ້ນ, ນອກນີ້ ປະເທດສະມາຊິກຂອງອົງການການຄ້າໂລກ ບໍ່ສາມາດອອກມາດຕະການຫ້າມນຳເຂົ້າສິນຄ້າປະເພດໃດໜຶ່ງໄດ້, ນອກຈາກສິນຄ້າທີ່ນອນໃນບັນຊີປົກປ້ອງທີ່ຖືກຮັບຮອງເອົາໃນເວລາເຈລະຈາເຂົ້າເປັນສະມາຊິກຂອງອົງການດັ່ງກ່າວ, ດັ່ງນັ້ນ ຈຶ່ງມີຄວາມຈຳເປັນຕ້ອງມີມາດຕະການແກ້ໄຂຜົນກະທົບທາງລົບຕໍ່ຜູ້ຜະລິດສິນຄ້າຢູ່ພາຍໃນປະເທດ, ຕິດພັນກັບບັນຫານີ້, ອົງການການຄ້າໂລກແມ່ນອະນຸຍາດໃຫ້ປະເທດສະມາຊິກ ນຳໃຊ້ມາດຕະການປົກປ້ອງໃນໄລຍະເວລາໃດໜຶ່ງ ພາຍໃຕ້ຮູບແບບການເກັບພາສີສິນຄ້ານຳເຂົ້າເພີ່ມຂຶ້ນ ແລະ ການຈຳກັດປະລິມານສິນຄ້າ ເພື່ອສະກັດກັ້ນບໍ່ໃຫ້ເກີດຄວາມເສຍຫາຍຕໍ່ອຸດສາຫະກຳພາຍໃນຈາກການເປີດຕະຫລາດເສລີແຕ່ຕ້ອງມີນິຕິກຳພາຍໃນປະເທດຮອງຮັບ ຈຶ່ງສາມາດນຳໃຊ້ມາດຕະການດັ່ງກ່າວໄດ້.
ເມື່ອກົດໝາຍດັ່ງກ່າວ ຖືກປະກາດໃຊ້ຢ່າງເປັນທາງການ ຈະເຮັດໃຫ້ນັກລົງທຶນທັງພາຍໃນ ແລະ ຕ່າງປະເທດ ມີຄວາມເຊື່ອໝັ້ນໃນການລົງທຶນດຳເນີນທຸລະກິດການຜະລິດຢູ່ລາວ, ໂດຍສະເພາະແມ່ນວິສາຫະກິດຂະໜາດນ້ອຍ ແລະ ກາງ ທີ່ມີຄວາມສາມາດແຂ່ງຂັນກັບສິນຄ້າ ນຳເຂົ້າຍັງບໍ່ສູງ, ເຮັດໃຫ້ຜູ້ຜະລິດສິນຄ້າພາຍໃນ ໄດ້ຮັບການປົກປ້ອງຈາກລະບຽບກົດໝາຍໃນເວລາຕົນເອງໄດ້ຮັບຜົນກະທົບຈາກການນຳເຂົ້າສິນຄ້າ, ຍ້ອນເງື່ອນໄຂການເຊື່ອມໂຍງເສດຖະກິດກັບສາກົນ, ພ້ອມນີ້ ກໍເຮັດໃຫ້ຜູ້ຜະລິດພາຍໃນ ຕ້ອງບຸກບືນ ແລະ ພັດທະນາຕົນເອງ ໃຫ້ເຂັ້ມແຂງຍິ່ງຂຶ້ນ, ເຮັດໃຫ້ສິນຄ້າທີ່ຜະລິດຢູ່ພາຍໃນລາວ ໄດ້ຮັບການພັດທະນາສາມາດແຂ່ງຂັນກັບສິນຄ້ານຳເຂົ້າ ແລະ ສາມາດສົ່ງອອກສິນຄ້າໄປສູ່ຕະຫລາດສາກົນ ແລະ ພາກພື້ນໄດ້, ທີ່ສຳຄັນ ຍັງຈະເປັນປະໂຫຍດໂດຍລວມແກ່ການຮັກສາສະຖຽນລະພາບທາງດ້ານເສດຖະກິດ, ເຮັດໃຫ້ໜໍ່ແໜງການຜະລິດພາຍໃນມີການຂະຫຍາຍຕົວ, ສົ່ງເສີມສີມືແຮງງານ ກໍຄືການນຳໃຊ້ນະວັດຕະກຳໃໝ່ເຂົ້າໃນການຜະລິດອີກດ້ວຍ.