ປະກາດແຕ່ງຕັ້ງ ພົນຕີ ສາຍໃຈ ກົມມະສິດ ເປັນຮອງເລຂາພັກແຂວງ, ຮອງເຈົ້າແຂວງໆບໍ່ແກ້ວ

ວັນທີ 18 ກໍລະກົດ 2024, ຫ້ອງວ່າການແຂວງບໍ່ແກ້ວ ໄດ້ຈັດພິທີປະກາດແຕ່ງຕັ້ງຮອງເລຂາພັກແຂວງ, ຮອງເຈົ້າແຂວງໆບໍ່ແກ້ວ ໂດຍການເຂົ້າຮ່ວມຂອງ ພົນເອກ ວິໄລ ຫລ້າຄໍາຟອງ ກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ.

ພິທີປະກາດແຕ່ງຕັ້ງຄັ້ງນີ້, ອີງຕາມຄໍາສັ່ງ ເລກທີ 154/ກລສພ, ຄໍາສັ່ງເລກທີ 08/ນຍ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ໂດຍເຫັນດີແຕ່ງຕັ້ງ ພົນຕີ ສາຍໃຈ ກົມມະສິດ ກໍາມະການປະຈໍາພັກ ຮອງລັດຖະມົນຕີ ກະຊວງປ້ອງກັນປະເທດ ໄປຮັບໜ້າທີ່ໃໝ່ ເປັນຮອງເລຂາພັກແຂວງ, ເປັນຮອງເຈົ້າແຂວງບໍ່ແກ້ວ ເພີ່ມອີກ 1 ສະຫາຍ.

ໂອກາດນີ້, ພົນເອກ ວິໄລ ຫລ້າຄໍາຟອງ ໄດ້ຊີ້ນໍາໃຫ້ເອົາໃຈໃສ່ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ, ປັບປຸງກໍ່ສ້າງວຽກງານຂອງພັກ ໃຫ້ມີຄວາມປອດໄພ ເຂັ້ມແຂງ ແລະ ໜັກ  ແໜ້ນ, ການພັດທະນາທ່າແຮງທີ່ບົ່ມຊ້ອນ ຕ້ອງສໍາຫລວດ, ຈັດສັນ ແລະ ຄຸ້ມຄອງຄືນໃໝ່, ວາງແຜນຍຸດທະສາດດ້ວຍການພັດທະນາ ແລະ ວາງນະໂຍບາຍໃຫ້ສອດຄ່ອງ, ເໝາະສົມກັບທ້ອງຖິ່ນ, ຖືກຕາມມະຕິຂອງສູນກາງພັກວາງອອກ, ໃນນັ້ນຕ້ອງຈັດສັນເຂດດິນທໍາການຜະລິດໃຫ້ມີຄວາມເໝາະສົມ ສາມາດຂາຍອອກສູ່ທ່ອງຕະຫລາດ ຄຽງຄູ່ກັບການພັດທະນາແຫລງທ່ຽວທ່ຽວ ໃຫ້ກາຍເປັນເຂດເສດຖະກິດໃໝ່ ເພື່ອດຶງດູດນັກທ່ອງທ່ຽວເຂົ້່າມາທ່ຽວ, ຄຸ້ມຄອງລະບົບທີ່ດິນ ແລະ ຈັດເກັບລາຍຮັບໃຫ້ໄດ້ຕາມແຜນທີ່ກໍາກົດໄວ້.