ບັງກະລາເທດສັ່ງປິດໂຮງຮຽນທົ່ວປະເທດ ຫລັງນັກສຶກສາ 6 ຄົນ ເສຍຊີວິດໃນການປະທ້ວງ
ລັດຖະບານບັງກະເທດ ສັ່ງປິດໂຮງຮຽນ ແລະ ມະຫາວິທະຍາໄລທົ່ວປະເທດແບບບໍ່ມີກໍານົດ ພາຍຫລັງມີນັກສຶກສາ 6 ຄົນ ເສຍຊີວິດໃນການປະທ້ວງທີ່ລຸກລາມ ເຊິ່ງມີການລະດົມກອງກໍາລັງເຄິ່ງທະຫານ ເພື່ອຮັກສາຄວາມສະຫງົບຮຽບຮ້ອຍ.
ວັນທີ 17 ກໍລະກົດ, ສໍານັກຂ່າວຕ່າງປະເທດລາຍງານວ່າ: ໂຮງຮຽນລະດັບມັດທະຍົມສຶກສາ, ມະຫາວິທະຍາໄລ ແລະ ໂຮງຮຽນສອນສາສະໜາອິດສະລາມທຸກແຫ່ງໃນບັງກະລາເທດ ໄດ້ຮັບຄໍາສັ່ງໃຫ້ປິດຈົນກວ່າຈະມີປະກາດເພີ່ມຕື່ມ ພາຍຫລັງເກີດການປະທ້ວງຕໍ່ຕ້ານລະບົບໂກຕ້າຮັບລັດຖະກອນຂອງລັດຖະບານເປັນເວລາຫລາຍອາທິດ.
ໃນວັນທີ 16 ກໍລະກົດຜ່ານມາ, ການປະທ້ວງທະວີຄວາມຮຸນແຮງ ເມື່ອຜູ້ປະທ້ວງ ແລະ ກຸ່ມນັກສຶກສາທີ່ສະໜັບສະໜູນລັດຖະບານໂຈມຕີອີກຝ່າຍດ້ວຍການດຶກກ້ອນຫີນ ແລະ ໄມ້ໄຜ່ ຂະນະທີ່ຕໍາຫລວດສະຫລາຍການຊຸມນຸມດ້ວຍແກັສນໍ້າຕາ ແລະ ລູກປືນຢາງ.
ທ່ານ ເອັມ ເອ ຄາອີ ໂຄສົກກະຊວງສຶກສາທິການບັງກະລາເທດ ກ່າວວ່າ: ລັດຖະບານອອກຄໍາສັ່ງປິດສະຖາບັນການສຶກສາທຸກແຫ່ງ ເພື່ອຄວາມປອດໄພຂອງນັກຮຽນ ເຊິ່ງມີຜົນຄວບຄຸມໄປເຖິງມະຫາວິທະຍາໄລຕ່າງໆນໍາອີກ.
ຄວາມຮຸນແຮງຄັ້ງຫລ້າສຸດ ເຮັດໃຫ້ມີຜູ້ໄດ້ຮັບບາດເຈັບຫລາຍກວ່າ 400 ຄົນ ແລະ ມີຜູ້ເສຍຊີວິດຢ່າງໜ້ອຍ 6 ຄົນ. ເຖິງຢ່າງໃດກໍຕາມ, ກຸ່ມຜູ້ປະທ້ວງຍັງລວມຕົວຊຸມນຸມຢູ່ເມືອງຕ່າງໆທົ່ວປະເທດ ແລະ ຝ່າຝືນຄໍາຮ້ອງຂໍກ່ອນໜ້ານີ້ຂອງນາຍົກລັດຖະມົນຕີ ຊີກ ຮາສິນາ ຜູ້ນໍາບັງກະລາເທດ ແລະ ສານດີກາບັງກະລາເທດ ທີ່ຕ້ອງການໃຫ້ນັກສຶກສາຢຸດການປະທ້ວງ ແລະ ແຍກຍ້າຍກັບເຂົ້າຫ້ອງຮຽນ.
ຂະນະດຽວກັນ, ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ (UN) ຮຽກຮ້ອງໃຫ້ລັດຖະບານບັງກະລາເທດ ປົກປ້ອງຜູ້ປະທ້ວງຈາກໄພຄຸກຄາມ ຫລື ຄວາມຮຸນແຮງທຸກຮູບແບບ ເນື່ອງຈາກການປະທ້ວງຢ່າງສັນຕິ ຖືເປັນສິດທິມະນຸດຂັ້ນພື້ນຖານ ແລະ ລັດຖະບານຄວນປົກປ້ອງສິດເຫລົ່ານັ້ນ.
ທັງນີ້, ນັກສຶກສາຈໍານວນຫລາຍຢູ່ບັງກະລາເທດ ລວມຕົວປະທ້ວງເພື່ອຮຽກຮ້ອງໃຫ້ລັດຖະບານຢຸດໂກຕ້າເລືອກປະຕິບັດສໍາລັບວຽກພາກລັດ ລວມທັງການສໍາຮອງຕໍາແໜ່ງວຽກລັດຖະກອນ ສະເພາະສໍາລັບລູກຫລານຂອງວິລະບູລຸດທີ່ຕໍ່ສູ້ເພື່ອເອກະລາດ ເຊິ່ງນັກວິຈານຫລາຍຄົນກ່າວວ່າ: ລະດົບດັ່ງກ່າວເອື້ອຜົນປະໂຫຍດຕໍ່ລູກຫລານຂອງກຸ່ມຜູ້ສະໜັບສະໜູນລັດຖະບານ.
