ອົງການອະນາໄມໂລກ ເຕືອນວ່າ ພະຍາດໝາກສຸກລີງ ຍັງເປັນໄພຄຸກຄາມດ້ານສຸຂະພາບທົ່ວໂລກ
ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອໍານວຍການອົງການອະນາໄມໂລກ (WHO) ເຕືອນວ່າ: ພະຍາດໝາກສຸກລີງ (MPOX) ຍັງເປັນໄພຄຸກຄາມດ້ານສຸຂະພາບທົ່ວໂລກ, ພ້ອມສະແດງຄວາມກັງວົນຕໍ່ສະຖານະການການລະບາດຂອງເຊື້ອສາຍພັນໃໝ່ໃນຄອງໂກ.
ວັນທີ 15 ກໍລະກົດ, ສໍານັກຂ່າວຕ່າງປະເທດລາຍງານວ່າ: ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອໍານວຍການ WHO ເຕືອນວ່າ: ພະຍາດໝາກສຸກລີງຍັງເປັນໄພຄຸກຄາມດ້ານສຸຂະພາບທົ່ວໂລກ ຫລັງມີລາຍງານຜູ້ຕິດເຊື້ອເພີ່ມຈາກ 26 ປະເທດ ໃນເດືອນມິຖຸນາຜ່ານມາພຽງເດືອນດຽວ ແລະ ການລະບາດຂອງເຊື້ອໄວຣັສ MPOX ສາຍພັນໃໝ່ ໃນຄອງໂກ.
ເມື່ອບໍ່ດົນມານີ້, ມີລາຍງານຜູ້ຕິດເຊື້ອຢູ່ອາຟຣິກາໃຕ້ແລ້ວ 20 ຄົນ ລວມທັງຜູ້ເສຍຊີວິດຢ່າງໜ້ອຍ 3 ຄົນ ຖືເປັນຜູ້ເສຍຊີວິດກຸ່ມທໍາອິດໃນປະເທດ ນັບແຕ່ປີ 2022. ຍິ່ງໄປກວ່ານັ້ນ ບໍ່ມີຜູ້ຕິດເຊື້ອຄົນໃດມີປະຫວັດການເດີນທາງຂ້າມປະເທດ. ຂະນະທີ່ການແຜ່ເຊື້ອໃນຊຸມຊົນຍັງດໍາເນີນຢູ່.
ສ່ວນພື້ນທີ່ຕ້ອງເຝົ້າລະວັງເປັນພິເສດ ຕາມລາຍງານຂອງອົງການອະນາໄມໂລກ ໃນເວລານີ້ໄດ້ແກ່ ຄອງໂກ ເນື່ອງຈາກເຊື້ອໄວຣັສໝາກສຸກລີງສາຍພັນໃໝ່ແຜ່ລະບາດນັບແຕ່ເດືອນກັນຍາປີຜ່ານມາ.
ທ່ານ ເທດຣອສ ກ່າວວ່າ: ການລະບາດດັ່ງກ່າວຍັງບໍ່ມີສັນຍານຂອງການຕິດເຊື້ອຊ້າລົງ. ພ້ອມກ່າວວ່າ: ສະເພາະໃນປີນີ້ມີລາຍງານຜູ້ຕິດເຊື້ອສະສົມແລ້ວ 11,000 ຄົນ ແລະ ຜູ້ເສຍຊີວິດຢ່າງໜ້ອຍ 445 ຄົນ ໂດຍເດັກນ້ອຍໄດ້ຮັບຜົນກະທົບຫລາຍທີ່ສຸດ.
ຂະນະທີ່, ທ່ານ ນາງ ໂຣຊາມັນ ລູວິສ ຜູ້ນໍາດ້ານເຕັກນິກກ່ຽວກັບພະຍາດໝາກສຸກລີງຂອງ WHO ກ່າວວ່າ: ພະຍາດໝາກສຸກລີງມີຄວາມສ່ຽງແຜ່ລະບາດຂ້າມປະເທດ ເນື່ອງຈາກການໄປມາຫາສູ່ລະຫວ່າງຊາຍແດນປະເທດໃກ້ຄຽງ.
ພະຍາດໝາກສຸກລີງໄດ້ຮັບການຄົ້ນພົບຄັ້ງທໍາໃນມະນຸດ ຢູ່ຄອງໂກ ໃນປີ 1970 ເປັນການແຜ່ລະບາດຂອງເຊື້ອສາຍພັນເຄດ 1 ເຊິ່ງສ່ວນຫລາຍຈໍາກັດສະເພາະໃນປະເທດຕາເວັນຕົກ ແລະ ອາຟຣິກາກາງບາງປະເທດ, ຜູ້ຕິດເຊື້ອສ່ວນຫລາຍຈະຕິດເຊື້ອຈາກສັດທີ່ບໍ່ສະບາຍ ໂດຍສະເພາະເມື່ອຮັບປະທານຊີ້ນສັດປ່າ.
ສໍາລັບການຕິດເຊື້ອໄວຣັສໝາກສຸກລີງ ເຊິ່ງເພີ່ມສູງຂຶ້ນທົ່ວໂລກໃນເດືອນພຶດສະພາ 2022 ສົ່ງຜົນກະທົບຕໍ່ກຸ່ມເກ ແລະ ໄບເຊັກຊວລ ເປັນການລະບາດຂອງເຊື້ອສາຍພັນເຄດ 2. ເຖິງຢ່າງໃດກໍຕາມ, ນັບແຕ່ເດືອນກັນຍາປີຜ່ານມາ ເຊື້ອໝາກສຸກລີງໄດ້ກາຍພັນ ແລະ ແຜ່ລະບາດຢູ່ຄອງໂກ ຜ່ານການມີເພດສໍາພັນ ລວມທັງບັນດາຄົນຮັກຕ່າງເພດ ເຊື້ອນີ້ມີຊື່ເອີ້ນວ່າ: ສາຍພັນເຄດ 1ບີ.
