ລັດຖະບານຍີ່ປຸ່ນ ຍິນດີຊ່ວຍເຫລືອ ສປປ ລາວ ໃນຫລາຍດ້ານ ລວມທັງການ ເກັບກູ້ລະເບີດບໍ່ທັນແຕກ
ວັນທີ 12 ກໍລະກົດ 2024, ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ ນັດສຶໂອະ ຢາມາກູຈິ (Natsuo YAMAGUCHI) ປະທານພັກໂຄເມໂຕະ ສະມາຊິກສະພາສູງຍີ່ປຸ່ນ ພ້ອມຄະນະ ໃນໂອກາດ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 11-13 ກໍລະກົດ 2024. ທ່ານ ນາງ ໃບຄຳ ຂັດທິຍະ ໄດ້ສະແດງຄວາມຍິນດີຕ້ອນຮັບ ແລະ ລາຍງານກ່ຽວກັບການຮ່ວມມືລະຫວ່າງກະຊວງ ຮສສ ແລະ ລັດຖະບານປະເທດຍີ່ປຸ່ນ ໃນໄລຍະຜ່ານມາໃຫ້ທ່ານ ນັດສຶໂອະ ຢາມາກູຈິ ຮັບຊາບໂດຍສະແມ່ນການ ຊ່ວຍເຫລືອຈາກລັດ ຖະບານຍີ່ປຸ່ນ ຜ່ານການຮ່ວມມືສອງຝ່າຍ ແລະ ຜ່ານອົງການຈັດ ຕັ້ງສາກົນຕ່າງໆ ເປັນຕົ້ນແມ່ນໄດ້ຈັດຕັ້ງປະຕິບັດເນື້ອໃນບົດບັນທຶກການຮ່ວມມື ວ່າດ້ວຍໂຄງການແລກປ່ຽນການຝຶກອົບຮົມດ້ານວິຊາການໃຫ້ແກ່ແຮງງານລາວໄປເຮັດວຽກຢູ່ຍີ່ປຸ່ນລະຫວ່າງກະຊວງ ຮສສ ສປປ ລາວ ແລະ ກະ ຊວງຍຸຕິທຳ, ກະຊວງການຕ່າງປະເທດ ແລະ ກະຊວງສາທາລະນະສຸກ-ແຮງງານ ແລະ ສະ ຫວັດດີການສັງຄົມປະເທດຍີ່ປຸ່ນ ສະບັບເຊັນສັນຍາໃນປີ 2016; ໄດ້ຈັດຕັ້ງປະຕິບັດບົດບັນທຶກການຮ່ວມມືຈັດສົ່ງແຮງງານລາວໄປຝຶກອົບຮົມຢູ່ປະເທດຍີ່ປຸ່ນພາຍໃຕ້ສະຖານະພາບທີ່ຢູ່ອາໄສໃໝ່ທັກສະສີມືແຮງງານສະເພາະລະຫວ່າງ ກະຊວງ ຮສສ ລາວ ຮ່ວມກັບກະຊວງຍຸຕິທຳ, ກະຊວງການຕ່າງປະເທດ, ກະຊວງສາທາລະນະສຸກ-ແຮງງານ ແລະ ສະຫວັດດີການ ປະເທດຍີ່ປຸ່ນ ສະບັບເຊັນໃນເດືອນກໍລະກົດ 2022 ທີ່ນະຄອນຫລວງວຽງຈັນ.
ນອກນັ້ນ, ກໍມີໂຄງການຊ່ວຍເຫລືອໂດຍຜ່ານອົງການຈັດຕັ້ງສາກົນຕ່າງໆ ໃນໄລຍະ 2021-2024, ກະຊວງ ຮສສ ໄດ້ຮັບການຊ່ວຍເຫລືອທາງດ້ານງົບປະມານ ແລະ ເຕັກນິກວິຊາການ ຈາກລັດຖະບານປະເທດຍີ່ປຸ່ນ ໂດຍຜ່ານອົງການຈັດຕັ້ງສາກົນລະຫວ່າງລັດຖະບານ ແລະ ອົງການຈັດຕັ້ງສາກົນຕ່າງໆເປັນຕົ້ນ ອົງການ JICA, ADDP, JMAS, JICS ແລະ AAR ເພື່ອປະກອບສ່ວນເຂົ້າໃນວຽກງານແຮງງານ, ວຽກສະຫວັດດີການສັງຄົມ ແລະ ວຽກງານສໍາຫຼວດ ແລະ ກວດກູ້ບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ຊຶ່ງລວມມີ 6 ໂຄງ ການລວມມູນຄ່າຫຼາຍກວ່າ 12 ລ້ານ 4 ແສນ ໂດລາ.
ທ່ານ ນັດສຶໂອະ ຢາມາກູຈິ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຕໍ່ທ່ານ ລມຕ ກະຊວງ ຮສສ ພ້ອມແຈ້ງໃຫ້ຊາບ ກ່ຽວກັບສະພາບພົ້ນເດັ່ນພາຍໃນພັກໂຄເມໂຕະ ປະເທດຍີ່ປຸ່ນ ໂດຍສະເພາະຜົນສຳເລັດໃນການສ້າງສາ ແລະ ພັດທະນາເສດຖະກິດ-ສັງ ຄົມຂອງຍີ່ປຸ່ນ, ການເຄື່ອນໄຫວຕ່າງປະເທດທີ່ພົ້ນເດັ່ນໃນໄລຍະຜ່ານມາ ແລະ ຍິນດີສືບຕໍ່ຊຸກຍູ້ລັດຖະບານຍີ່ປຸ່ນໃນການຊ່ວຍເຫລືອແກ່ສປປ ລາວ ໃນດ້ານຕ່າງໆໂດຍສະເພາະວຽກງານໄພພິບັດ, ການພັດທະນາ (ODA), ວຽກງານການເກັບກູ້ລະເບີດບໍ່ທັນແຕກ (UXO) ແລະ ອື່ນໆ.
