ຝົນຕົກຍາມໃດນໍ້າຖ້ວມຍາມນັ້ນ ສ່ວນງົບປະມານແກ້ໄຂຍັງໄກເກີນເອື້ອມ

ໂດຍ: ທິດກໍ່າ

ເວົ້າສະເພາະນະຄອນຫລວງວຽງຈັນເຮົາ ໃນສະພາບປັດຈຸບັນເຫັນວ່າຝົນຕົກມາຍາມໃດ ນໍ້າກໍຖ້ວມອັ່ງຂັງຍາມນັ້ນ ເຮັດໃຫ້ເສັ້ນທາງຫລາຍເສັ້ນຫລາຍສາຍເປັນອໍາມະພາດສ້າງຄວາມລໍາຄານໃຫ້ຄົນຈໍານວນຫລວງຫລາຍທີ່ພວມໄປວຽກໄປງານໃນຍາມເຊົ້າຕ້ອງລຸຍນໍ້າຖ້ວມຢ່າງທໍລະຫົດອົດທົນ, ລົດຈັກລົດເກັງຂອງຫລາຍໆຄົນກໍຖືກຈັກລົດດັບມອດຕາຍຟູມນໍ້າ, ບໍ່ສາມາດເດີນທາງເຖິງຈຸດທີ່ໝາຍ, ບາງຄົນກໍຕັດສິນໃຈລ້ຽວລົດກັບຄືນບ້ານ ລໍຖ້າໃຫ້ນໍ້າລົງແລ້ວຈຶ່ງວ່າກັນໃໝ່ໃນຊົ່ວໂມງໜ້າ ຫລື ມື້ໜ້າ. ເທົ່າທີ່ເຫັນສະພາບຄວາມເປັນຈິງແລ້ວ ຢູ່ນະຄອນຫລວງວຽງຈັນເຮົາ ເວລາເກີດມີຝົນຕົກໜັກປາກົດວ່າມີນໍ້າຖ້ວມອັ່ງຂັງຖ້ວມເຮືອນຊານບ້ານຊ່ອງ, ຖ້ວມຖະໜົນຫົນທາງ, ພື້ນຖານການຜະລິດ, ຖ້ວມໜອງປາແຕກສະລຸຜຸຜາຍ ຍ້ອນຟ້າຝົນຊົນລະທາມາອາລະວາດໃນຍາມວິກິດເຂົ້າຍາມໝາກແພງ.

ຢ່າງໃດກໍດີ, ຫາກຕັ້ງໂຈດກັນວ່າ ດ້ວຍສາເຫດໃດເມື່ອມີຝົນຕົກໜັກມາຍາມໃດ ມີນໍ້າອັ່ງຂັງຖ້ວມທະລຸໄປທົ່ວທີບ. ຄໍາຕອບໂຈດມັນກໍມີຫລາຍປັດໄຈ ໂດຍທິດກໍ່າສັງລວມແບບສັ້ນສັ້ນ 3 ຢ່າງຄື: ອັນທີໜຶ່ງ ເນື້ອທີ່ດິນນັບມື້ຖືກທັບຖົມຍ້ອນການພັດທະນາບຸກເບີກທີ່ດິນ, ຖົມຫ້ວຍຮ່ອງຄອງບຶງເກົ່າແກ່ອັດຕັນແລວນໍ້າທີ່ມີມາແຕ່ກ່ອນ. ອັນສອງມາ ຕະຄອງຮ່ອງນໍ້າຕາມຖະໜົນຫົນທາງບາງບ່ອນບໍ່ໄດ້ມາດຕະຖານ, ຊໍ້າບໍ່ໜໍາຍາມຝົນຕົກມາມີຂີ້ເຫຍື້ອຂີ້ຕົມໄຫລໄປອັດຕັນຮ່ອງລະບາຍນໍ້າ. ອັນທີສາມ ບັນຫາໃຫຍ່ໆຄືຂາດການວາງຜັງພັດທະນາຕົວເມືອງ ໂດຍສະເພາະແມ່ນຂາດການວາງຄອງຫລວງທີ່ມາດຕະຖານ.

ເທົ່າທີ່ເຫັນຜ່ານມາ ຢູ່ນະຄອນຫລວງວຽງຈັນເຮົາມີຄອງນໍ້າບໍ່ພໍເທົ່າໃດແຫ່ງເຊັ່ນ: ຈາກເຂດບ້ານຮ່ອງງົວມາຕໍ່ໃສ່ໜອງທາໂພນຕ້ອງຮ່ອງໄກ່ແກ້ວ ໂພນເຄັງວຽງຈະເລີນຕົກໃສ່ຄອງບຶງທາດຫລວງ. ສາຍທີສອງຈາກຂົວຂາວລົງມາໃສ່ໜອງຈັນຮ່ອງແກຕົກໃສ່ຄອງໃຫຍ່ບຶງທາດຫລວງ. ນອກນັ້ນ ກໍມີຄອງເລັກຄອງນ້ອຍໄຫລຕົກໃສ່ຄອງໃຫຍ່ບຶງທາດຫລວງ ໄຫລຜ່ານບ້ານຮ່ອງສຸພາບຂາມງອຍ, ນາຄວາຍລົງໄປຮອດນາໄຫນາໂນຊອດໃສ່ຫ້ວຍໝາກຮຽວ. ໃນແຕ່ລະຄອງທີ່ວ່ານີ້ ບາງບ່ອນມັນແໜ້ນອັ່ງອໍໄປດ້ວຍຜັກຕົບ ນໍ້າໄຫລພໍອື້ງຕື້ງບໍ່ສະດວກຈໍາເປັນມັນກໍລົ້ນອັ່ງໄຫລໄປຫາບ່ອນຕໍ່າທົ່ວທີບ.

ແຕ່ສຳລັບທິດກໍ່າເຫັນວ່າວິທີແກ້ໄຂນັ້ນ, ຕ້ອງສ້າງຄອງຫລວງພ້ອມສາຂາຍ່ອຍບ່ອນທີ່ຈໍາເປັນໃຫ້ເຊື່ອມຈອດເຂົ້າກັນໃນທົ່ວຂອບເຂດນະຄອນຫລວງຈຶ່ງຈະສາມາດຮອງຮັບໄດ້. ບົດຮຽນຈາກປະເທດທີ່ເຂົາຈະເລີນສະໄໝທິດກໍ່າໄປອະດີດສະຫະພາບໂຊວຽດ ຄອງຫລວງເຂົາເຮັດຈົນເຮືອຂະໜາດໃຫຍ່ແລ່ນຜ່ານໄດ້ກາຍເປັນແຫລ່ງທ່ອງທ່ຽວສາມາດຂີ່ເຮືອເລາະຊົມພາບວິວທິວທັດຕົວເມືອງ, ມີຮອດຕະຫລາດນໍ້າ, ຕຶກຫ້າງຮ້ານເລາະຕາມຄອງຫລວງ, ກາງຄືນມາມີສະຖານທີ່ພັກຜ່ອນຍາມລາຕີການ ຍາມຝົນຕົກມາຈ້າງມັນກໍບໍ່ຖ້ວມ.

ສໍາລັບຢູ່ນະຄອນຫລວງວຽງຈັນເຮົາກໍໄດ້ຍິນຂ່າວມາຫລາຍປີແລ້ວວ່າຈະສ້າງ ແລະ ຂະຫຍາຍຮ່ອງບຶງທາດຫລວງໃຫ້ກວ້າງອອກ, ສ້າງເປັນແຫລ່ງທ່ອງທ່ຽວໃຫ້ມີຕະຫລາດນໍ້າ ແຕ່ລໍຄອຍມານີ້ກໍໄດ້ຫລາຍປີແລ້ວຍັງບໍ່ເກີດ ມັນເປັນພຽງທິດສະດີນໍ້າເຕົ້າເປົ່າ ເວົ້າສຸດຄວາມກໍຫັນຫລັງກິນເຂົ້າຈໍ້າແຈ່ວປາແດກ. ປັດຈຸບັນຍິ່ງເກີດສະພາບວິກິດທາງດ້ານເສດຖະກິດ-ການເງິນພວມຂົ່ມຂູ່ຊາຕາກໍາຂອງປະເທດຊາດ ຈະຫາເງິນຈໍານວນມະຫາສານມາສ້າງຄືທີ່ເວົ້າມານັ້ນມັນຍັງຢູ່ໄກເກີນເອື້ອມ.