ສິງກະໂປກຽມຢຸດຈົດທະບຽນລົດໃຊ້ນໍ້າມັນກາຊວນຄັນໃໝ່ໃນປີ 2025

     ໜ່ວຍງານການຂົນສົ່ງທາງບົກຂອງສິງກະໂປ ກ່າວວ່າ: ຈະຢຸດການຈົດທະບຽນລົດຍົນ ແລະ ລົດແທັກຊີຄັນໃໝ່ ທີ່ໃຊ້ນໍ້າມັນກາຊວນ ນັບແຕ່ປີ 2025 ເພື່ອສະໜັບສະໜູນວິໄສທັດດ້ານພະລັງງານສະອາດ.

     ວັນທີ 12 ກໍລະກົດ, ສໍານັກຂ່າວຊິນຮົວລາຍງານວ່າ: ເຈົ້າຂອງລົດໃຊ້ນໍ້າມັນກາຊວນ ເຊິ່ງເຄີຍຈົດທະບຽນແລ້ວ ສາມາດຕໍ່ອາຍຸໃບຮັບຮອງການຈົດທະບຽນໄດ້ ແຕ່ຕ້ອງເສຍພາສີການໃຊ້ຖະໜົນທີ່ສູງຂຶ້ນ ເພື່ອກີດກັ້ນການຕໍ່ອາຍຸ.

     ລາຍງານໂດຍສໍານັກງານຂົນສົ່ງທາງບົກສິງກະໂປ ລະບຸວ່າ: ຂໍ້ຈໍາກັດດັ່ງກ່າວຈະບໍ່ມີຜົນຕໍ່ການນໍາເຂົ້າ ແລະ ການຈົດທະບຽນລົດພາຍໃຕ້ໂຄງການລົດຄາສສິກ ແລະ ໂຄງການລົດບູຮານ.

     ທັງນີ້, ສິງກະໂປຕັ້ງເປົ້າບັນລຸເປົ້າໝາຍປ່ອຍແກັສເຮືອນແກ້ວສຸດທິເປັນສູນພາຍໃນປີ 2050 ເພື່ອຮັບມືການປ່ຽນແປງສະພາບອາກາດ.