ເສດຖະກິດສິງກະໂປຂະຫຍາຍຕົວ 2.9% ໃນໄຕມາດສອງຂອງປີນີ້

     ການຄາດຄະເນຢ່າງເປັນທາງການໂດຍລັດຖະບານສິງກະໂປ ເບິ່ງວ່າເສດຖະກິດຂອງປະເທດຈະເຕີບໃຫຍ່ເມື່ອວັດແທກແບບປີຕໍ່ປີ ໃນລະດັບ 2.9% ເມື່ອໄຕມາດສອງ.

      ວັນທີ 12 ກໍລະກົດ, ສໍານັກຂ່າວຊິນຮົວລາຍງານວ່າ: ຕົວເລກປະເມີນການລ່ວງໜ້າ ເຊິ່ງເຜີຍແຜ່ໂດຍກະຊວງການຄ້າ ແລະ ອຸດສາຫະກໍາສິງກະໂປ ລະບຸວ່າ: ເສດຖະກິດຂອງປະເທດຂະຫຍາຍຕົວ 2.9% ເມື່ອທຽບແບບປີຕໍ່ປີໃນໄຕມາດທີສອງ ຫລື ລະຫວ່າງເດືອນເມສາ-ມິຖຸນາຜ່ານມາ ຫລັງຂະຫຍາຍຕົວ 3.0% ໃນໄຕມາດທໍາອິດຂອງປີນີ້.

     ທັງນີ້, ຂະແໜງການກໍ່ສ້າງຂະຫຍາຍຕົວ 4.3% ເມື່ອທຽບໃສ່ແບບປີຕໍ່ປີໃນໄຕມາດສອງ ເພີ່ມຈາກການເຕີບໃຫຍ່ໃນລະດັບ 4.1% ໃນໄຕມາດກ່ອນໜ້າ. ຂະນະທີ່ຂະແໜງການຜະລິດຂະຫຍາຍຕົວ 0.5% ເມື່ອທຽບໃສ່ແບບປີຕໍ່ປີ ລະຫວ່າງເດືອນເມສາ-ມິຖຸນາຜ່ານມາ ເຊິ່ງພິກປີ້ນຈາກການຫົດຕົວໃນລະດັບ 1.7% ໃນໄຕມາດທໍາອິດຂອງປີ.

     ດ້ານການເຕີບໃຫຍ່ຂອງອຸດສາຫະກໍາບໍລິການຫລຸດລົງ ຈາກ 4.3% ໃນໄຕມາດທໍາອິດຂອງປີນີ້ ມາຢູ່ 3.3% ໃນໄຕມາດທີສອງ.