ອົງການອະນາໄມໂລກເຜີຍ ໂຄວິດ-19 ຍັງຂ້າຊີວິດຊາວໂລກອາທິດລະ 1,700 ຄົນ

     ອົງການອະນາໄມໂລກ (WHO) ລາຍງານວ່າ: ພະຍາດໂຄວິດ-19 ຍັງຂ້າຊີວິດຄົນທົ່ວໂລກຢ່າງໜ້ອຍອາທິດລະ 1,700 ຄົນ ຈຶ່ງຂໍໃຫ້ລັດຖະບານທຸກປະເທດຍັງເຝົ້າລະວັງ ແລະ ແນະນໍາໃຫ້ປະຊາກອນກຸ່ມສ່ຽງຮັບວັກຊີນ.

     ວັນທີ 12 ກໍລະກົດ, ສໍານັກຂ່າວຕ່າງປະເທດລາຍງານວ່າ: ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອໍານວຍການ WHO ເຕືອນເຖິງການຄວບຄຸມຂອງວັກຊີນທີ່ຫລຸດລົງ ຈໍານວນຜູ້ເສຍຊີວິດຍັງມີຂຶ້ນເລື້ອຍໆ ສະແດງໃຫ້ເຫັນເຖິງການຄວບຄຸມຂອງວັກຊີນຫລຸດລົງໃນບັນດາເຈົ້າໜ້າທີ່ສາທາລະນະສຸກ.

     ທັງນີ້, ບຸກຄົນມີອາຍຸ 60 ປີຂຶ້ນໄປ ເຊິ່ງເປັນ 2 ກຸ່ມມີຄວາມສ່ຽງຫລາຍທີ່ສຸດ WHO ແນະນໍາໃຫ້ປະຊາຊົນທີ່ຢູ່ໃນກຸ່ມສ່ຽງສູງສຸດຮັບວັກຊີນປ້ອງກັນພະຍາດໂຄວິດ-19 ເຂັມກະຕຸ້ນພາຍໃນໄລຍະເວລາ 12 ເດືອນ ນັບຈາກການຮັບວັກຊີນຄັ້ງຫລ້າສຸດ.

     ມີການລາຍງານຜູ້ເສຍຊີວິດຈາກພະຍາດໂຄວິດ-19 ຕາມຂໍ້ມູນຢ່າງເປັນທາງການຂອງ WHO ແລ້ວຫລາຍກວ່າ 7 ລ້ານຄົນ ເຖິງວ່າຈໍານວນຜູ້ເສຍຊີວິດຕົວຈິງຂອງການລະບາດໃຫຍ່ອາດຈະສູງກວ່ານັ້ນກໍຕາມ.

     ນອກຈາກນັ້ນ, ພະຍາດລະບາດໃຫຍ່ດັ່ງກ່າວຍັງທໍາລາຍເສດຖະກິດ ແລະ ລະບົບສຸຂະພາບນໍາອີກ. ກ່ອນໜ້ານີ້ໃນເດືອນພຶດສະພາ 2023 ທ່ານ ເທດຣອສ ປະກາດຢຸດການແຜ່ລະບາດຂອງເຊື້ອໄວຣັສໂຄວິດ-19 ໃນຖານະສະພາບສຸກເສີນດ້ານສາທາລະນະສຸກສາກົນ ຫລັງປະກາດສະພາບສຸກເສີນມາກວ່າ 3 ປີ ນັບແຕ່ກວດພົບຜູ້ຕິດເຊື້ອກຸ່ມທໍາອິດ ຢູ່ເມືອງອູຮັ່ນຂອງຈີນ ໃນທ້າຍປີ 2019.

     ທັງນີ້, WHO ຮຽກຮ້ອງໃຫ້ລັດຖະບານຂອງທຸກປະເທດຍັງເຝົ້າລະວັງ ແລະ ຮັບປະກັນການເຂົ້າເຖິງການກວດ, ປິ່ນປົວ ແລະ ວັກຊີນທີ່ລາຄາບໍ່ແພງ ແລະ ເຊື່ອຖືໄດ້.