ກໍາປູເຈຍຢືນຢັນຜູ້ຕິດເຊື້ອໄຂ້ຫວັດສັດປີກຄົນທີ 7 ຂອງປີນີ້ ເປັນເດັກນ້ອຍເພດຍິງອາຍຸ 5 ປີ
ໜ່ວຍງານສາທາລະນະສຸກຂອງກໍາປູເຈຍ ພົບຜູ້ຕິດເຊື້ອໄວຣັສໄຂ້ຫວັດສັດປີກສະສົມຢ່າງໜ້ອຍ 7 ຄົນແລ້ວໃນປີນີ້ ໂດຍຜູ້ຕິດເຊື້ອຄົນຫລ້າສຸດເປັນເດັກນ້ອຍເພດຍິງອາຍຸພຽງ 5 ປີ.
ວັນທີ 10 ກໍລະກົດ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກກໍາປູເຈຍອອກຖະແຫລງການວ່າ: ເດັກຍິງອາຍຸ 5 ປີ ອາໄສຢູ່ແຂວງຕາແກ້ວ ທາງຕາເວັນອອກສຽງໃຕ້ຂອງປະເທດ ມີຜົນກວດເຊື້ອໄວຣັສໄຂ້ຫວັດສັດປີກສາຍພັນ H5N1 “ເປັນບວກ” ຖືເປັນຄົນເຈັບທີ່ຢືນຢັນຈາກພະຍາດດັ່ງກ່າວຄົນທີ 7 ແລ້ວໃນປີນີ້.
ນອກຈາກນັ້ນ, ການຢືນຢັນຜູ້ຕິດເຊື້ອຈາກພະຍາດໄຂ້ຫວັດສັດປີກຄົນທີ 7 ຂອງກໍາປູເຈຍ ເກີດຂຶ້ນພຽງບໍ່ເທົ່າໃດວັນ ຫລັງການຢືນຢັນຜູ້ຕິດເຊື້ອຄົນທີ 6 ເປັນເດັກນ້ອຍເພດຊາຍອາຍຸ 3 ປີ ອາໄສຢູ່ແຂວງຕາແກ້ວເຊັ່ນກັນ.
ໃນບັນດາຜູ້ຕິດເຊື້ອຈາກໄວຣັສໄຂ້ຫວັດສັດປີກ H5N1 ທີ່ກໍາປູເຈຍຢືນຢັນຢ່າງໜ້ອຍ 7 ຄົນແລ້ວໃນປີນີ້ນັ້ນ ເປັນເດັກນ້ອຍ 6 ຄົນ ແລະ ຜູ້ໃຫຍ່ 1 ຄົນ ໂດຍມີຜູ້ຕິດເຊື້ອເປັນເດັກນ້ອຍເສຍຊີວິດແລ້ວ 1 ຄົນ ແລະ ຜູ້ຕິດເຊື້ອທຸກຄົນມີປະຫວັດການສໍາຜັດຊາກສັດປີກ ຫລື ສັດປີກທີ່ກໍາລັງຕິດເຊື້ອ.
ນັບແຕ່ປີ 2003 ຈົນຮອດປັດຈຸບັນ ກໍາປູເຈຍຢືນຢັນຜູ້ຕິດເຊື້ອຈາກໄວຣັສໄຂ້ຫວັດສັດປີກ H5N1 ສະສົມຢ່າງໜ້ອຍ 69 ຄົນ ລວມທັງເດັກຍິງອາຍຸ 5 ປີ ເຊິ່ງເປັນຜູ້ຕິດເຊື້ອຄົນຫລ້າສຸດ ໃນຈໍານວນນີ້ເສຍຊີວິດແລ້ວ 42 ຄົນ.
