ຫວຽດນາມກຽມປິດເຄືອຂ່າຍ 2G ກະຕຸ້ນປະຊາຊົນຫັນມາໃຊ້ສະມາດໂຟນ
ໜ່ວຍງານໂທລະຄົມມະນາຄົມຫວຽດນາມ (VNTA) ພາຍໃຕ້ກະຊວງຂໍ້ມູນຂ່າວສານ ແລະ ການສື່ສານ (MIC) ກຽມປິດຄື້ນຄວາມຖີ່ 2G ນັບແຕ່ວັນທີ 16 ກັນຍາເປັນຕົ້ນໄປ. ຂະນະທີ່ຜູ້ໃຫ້ບໍລິການເຄືອຂ່າຍມີຄວາມພະຍາຍາມກະຕຸ້ນໃຫ້ຜູ້ນຳໃຊ້ຫັນມາໃຊ້ສະມາດໂຟນ ແລະ ແພັກແກັດເຄືອຂ່າຍ 4G ແລະ 5G ເຊິ່ງມີເຕັກໂນໂລຊີທີ່ສູງກວ່າ.
ວັນທີ 8 ກໍລະກົດ, ສໍານັກຂ່າວຕ່າງປະເທດລາຍງານວ່າ: ເຖິງຢ່າງໃດກໍຕາມ, 2G ຈະຍັງໃຫ້ບໍລິການໃນເກາະເຈື່ອນຊາ ແລະ ເກາະຮວ່າງຊາ ໄປຈົນຮອດວັນທີ 15 ກັນຍາ 2026, ແຕ່ MIC ຈະບໍ່ຈ່າຍຄື້ນຄວາມຖີ່ 900 MHz/1800 MHz ອີກ ແລະ ຜູ້ນໍາໃຊ້ທີ່ບໍ່ດໍາເນີນການປ່ຽນຈາກລະບົບ 2G ເປັນ 4G ແລະ 5G ຈະບໍ່ສາມາດນໍາໃຊ້ເຄືອຂ່າຍໄດ້ອີກ.
ທ່ານ ຫງວຽນ ຈ່ອງ ຕິນ ຮອງຜູ້ອໍານວຍການທົ່ວໄປ ຫວຽດເທວ ເທເລຄອມ ລະບຸວ່າ: ການຢຸດເຕັກໂນໂລຊີໂທລະສັບມືຖື 2G ເປັນນະໂຍບາຍທີ່ຖືກຕ້ອງ ເຊິ່ງສອດຄ່ອງກັບຄວາມປາດຖະໜາຂອງຜູ້ໃຫ້ບໍລິການເຄືອຂ່າຍ ແລະ ຄວາມຕ້ອງການຂອງລູກຄ້າ, ບໍລິສັດໄດ້ດໍາເນີນມາດຕະການຕ່າງໆ ເພື່ອສົ່ງເສີມການປ່ຽນຈາກ 2G ເປັນ 4G ໃນໄລຍະ 4 ປີຜ່ານມາ. ຂະນະທີ່ສະມາຊິກທີ່ນໍາໃຊ້ 2G ມີ 16% ຂອງສະມາຊິກທັງໝົດ.
ທັງນີ້, ຫວຽດເທວຈໍາເປັນຕ້ອງຫລຸດຈໍານວນສະມາຊິກ 2G ໃຫ້ໄດ້ຕໍ່າກວ່າ 5% ເພື່ອຈະສາມາດປິດເຄືອຂ່າຍ 2G ໄດ້. ສ່ວນວີນາໂຟນມີສະມາຊິກທີ່ນໍາໃຊ້ 2G ພຽງ 8% ຂອງຈໍານວນສະມາຊິກທັງໝົດ.
ທັງນີ້, MIC ໄດ້ກຽມການປິດຄື້ນຄວາມຖີ່ດັ່ງກ່າວ ຜ່ານການບໍ່ອະນຸຍາດໃຫ້ນໍາເຂົ້າອຸປະກອນທີ່ໃຊ້ 2G ເພື່ອບໍ່ໃຫ້ເກີດຜົນກະທົບຕໍ່ຜູ້ນໍາໃຊ້ ແລະ ຜູ້ໃຫ້ບໍລິການໂທລະຄົມມະນາຄົມຍັງໃຫ້ການສະໜັບສະໜູນທາງການເງິນ ເພື່ອຊ່ວຍໃຫ້ສະມາຊິກສາມາດຊື້ສະມາດໂຟນ, ພ້ອມສະເໜີແພັກແກັດການນໍາໃຊ້ແບບພິເສດສໍາລັບພວກເຂົານໍາອີກ.
