ບັງກະລາເທດປະທ້ວງ ຮຽກຮ້ອງໃຫ້ຢຸດການໃຊ້ເສັ້ນສາຍໃນລະບົບລັດ

      ນັກສຶກສາຈາກມະຫາວິທະຍາໄລຕ່າງໆຢູ່ບັງກະລາເທດ ລວມກັນປະທ້ວງຕໍ່ຕ້ານລະບົບໂກຕ້າຮັບລັດຖະກອນຂອງລັດ ເຊິ່ງສໍາຮອງຕໍາແໜ່ງໄວ້ໃຫ້ລູກຫລານຂອງຜູ້ສະໜັບສະໜູນທ່ານ ຊິກ ມູຈິບູ ເຣາະມານ ຜູ້ສ້າງຕັ້ງປະເທດ ແລະ ຜູ້ນໍາຄົນທໍາອິດຂອງບັງກະລາເທດ, ແຕ່ນັກສຶກສາທົ່ວໄປພັດຕ້ອງຜະເຊີນວິກິດການຈ້າງວຽກ.

      ວັນທີ 8 ກໍລະກົດ, ສໍານັກຂ່າວຕ່າງປະເທດລາຍງານວ່າ: ນັກສຶກສາມະຫາວິທະຍາໄລຫລາຍພັນຄົນດຶກສິ່ງຂອງ ແລະ ຕັ້ງແນວຮົ້ວກີດຂວາງຖະໜົນເສັ້ນສໍາຄັນໃນນະຄອນຫລວງທາກາ ຮຽກຮ້ອງໃຫ້ຢຸດໂກຕ້າ “ເລືອກປະຕິບັດ” ສໍາລັບວຽກຂອງລັດ ລວມທັງການສໍາຮອງຕໍາແໜ່ງວຽກສະເພາະສໍາລັບລູກຫລານຂອງວິລະບູລຸດທີ່ຕໍ່ສູ້ເພື່ອເອກະລາດ.

      ນັກສຶກສາໃນມະຫາວິທະຍາໄລໃຫຍ່ໆເກືອບທຸກແຫ່ງຢູ່ບັງກະລາເທດ ເຂົ້າຮ່ວມການປະທ້ວງເພື່ອຮຽກຮ້ອງລະບົບວຽກລັດທີ່ມີຄຸນນະທໍາ “ມັນເປັນສະຖານະການທີ່ຕ້ອງເຮັດ ຫລື ຕາຍສໍາລັບເຮົາ” ທ້າວ ນາຮິດຸລ ອິສລາມ ຜູ້ປະສານງານການປະທ້ວງ ກ່າວລະຫວ່າງການເດີນຂະບວນ “ໂກຕ້າຄືລະບົບການເລືອກປະຕິບັດ ມັນຕ້ອງຖືກປະຕິຮູບ”.

      ປັດຈຸບັນ, ລະບົບໂກຕ້າວຽກຢູ່ບັງກະລາເທດ “ຫລາຍກວ່າເຄິ່ງໜຶ່ງມີການຈັດສັນໄວ້ແລ້ວ” ລວມທັງວຽກລັດຫລາຍແສນຕໍາແໜ່ງ ໂດຍ 30% ສະຫງວນໄວ້ສໍາລັບລູກຫລານຂອງທ່ານ ຊີກ ມູຈິບູ ເຣາະມານ ພໍ່ຜູ້ສ້າງປະເທດ ໃນປີ 1971, 10% ສໍາລັບຜູ້ຍິງ ແລະ 10% ຈັດສັນໄວ້ສໍາລັບແຕ່ລະເຂດ. ເຖິງຢ່າງໃດກໍດີ, ຫລາຍຝ່າຍເບິ່ງວ່າ: ໂກຕ້າ 6% ສໍາລັບກຸ່ມຊາດພັນ ແລະ ຜູ້ພິການຄວນມີໄວ້ຕໍ່ໄປ.

     ນັກວິຈານອ້າງວ່າ: ລະບົບດັ່ງກ່າວເກື້ອໜູນຕໍ່ລູກຫລານຂອງຜູ້ສະໜັບສະໜູນລັດຖະບານ ແລະ ນາຍົກລັດຖະມົນຕີ ນາງ ຊີກ ຮາສິນາ ລູກສາວຂອງທ່ານ ຊີກ ມູຈິບູ ເຣາະມານ ປະທານາທິບໍດີຄົນທໍາອິດ ແລະ ຜູ້ສ້າງຕັ້ງປະເທດບັງກະລາເທດ.

      ທັງນີ້, ນາງ ຮາສິນາ ຊະນະການເລືອກຕັ້ງທົ່ວໄປເປັນຄັ້ງທີ 4 ຕິດຕໍ່ກັນໃນເດືອນມັງກອນຜ່ານມາ, ແຕ່ຝ່າຍຄ້ານລວມກັນຂວ້ຳບາດ ແລະ ການປາບປາມຝ່າຍກົງກັນຂ້າມທາງການເມືອງຄັ້ງໃຫຍ່. ກ່ອນໜ້ານີ້ ລະບົບດັ່ງກ່າວຖືກຍົກເລີກຫລັງຈາກການປະທ້ວງຂອງນັກສຶກສາທີ່ຍາວນານຫລາຍອາທິດໃນປີ 2018, ແຕ່ໃນເດືອນມິຖຸນາຜ່ານມາ ສານສູງນະຄອນຫລວງທາກາໄດ້ກັບຄໍາຕັດສິນ ຈູດສະນວນການປະທ້ວງຄັ້ງຫລ້າສຸດ ເລີ່ມຂຶ້ນໃນເດືອນຕົ້ນກໍລະກົດນີ້ ແລະ ຂະຫຍາຍວົງກວ້າງໄປອີກຫລາຍແຫ່ງໃນປະເທດ.