ໝົດຍຸກຂອງເກົ່າ ! ຍີ່ປຸ່ນປະກາດຍົກເລີກການໃຊ້ ຟອບປີດິສ ໃນໜ່ວຍງານລັດທົ່ວປະເທດ

      ທາງການຍີ່ປຸ່ນປະກາດຍົກເລີກກົດລະບຽບທັງໝົດທີ່ກໍານົດໃຫ້ໃຊ້ ຟອບປີດິສ ເພື່ອຈຸດປະສົງດ້ານການບໍລິຫານ. ຖືເປັນການປິດຄວາມພະຍາຍາມຂອງລັດຖະບານໂຕກຽວ ທີ່ຈະຍົກເລີກການໃຊ້ອຸປະກອນເກັບຂໍ້ມູນແບບເກົ່າ ເຊິ່ງຖືກຜະລິດຄັ້ງສຸດທ້າຍເມື່ອ 13 ປີກ່ອນ.

     ວັນທີ 7 ກໍລະກົດ, ສໍານັກຂ່າວຕ່າງປະເທດລາຍງານວ່າ: ຟອບປີດິສ ເຊິ່ງຖືກຄິດຄົ້ນໃນປີ 1970 ເຄີຍເປັນສ່ວນໜຶ່ງຂອງລະບົບຄອມພິວເຕີທົ່ວໂລກ ໂດຍມັນເປັນໜ່ວຍຄວາມຈໍາຮູບແບບໜຶ່ງ ກ່ອນອຸປະກອນເກັບຂໍ້ມູນແຟລໄດຣ ແລະ ການເກັບຂໍ້ມູນຜ່ານລະບົບຄລາວໃນອິນເຕີເນັດ ຈະເຂົ້າມາແທນທີ່.

     ຍີ່ປຸ່ນມີຊື່ສຽງກ່ຽວກັບບໍລິສັດຍັກໃຫຍ່ດ້ານເອເລັກໂຕຣນິກ, ຫຸ່ນຍົນ ແລະ ເຄືອຂ່າຍບອດແບນໄວທີ່ສຸດໃນໂລກ, ແຕ່ທຸລະກິດຕ່າງໆຂອງປະເທດເຊັ່ນ: ບໍ່ແຮ່, ບໍລິສັດນໍ້າມັນ, ຜູ້ຄ້າຍ່ອຍ, ຮ້ານຂາຍແອລກໍຮໍ ແລະ ສູນການຄ້າ ຍັງຜູກມັດນໍາກົດລະບຽບທີ່ກໍານົດໃຫ້ຕ້ອງສົ່ງເອກະສານໄປຫາໜ່ວຍງານເບິ່ງແຍງ ໂດຍໃຊ້ຟອບປີດິສ.

     ເຖິງວ່າບໍລິສັດ ໂຊນີ ເຊິ່ງເຄີຍເປັນຜູ້ຜະລິດຟອບປີດິສລາຍໃຫຍ່ທີ່ສຸດໃນຕະຫລາດຍີ່ປຸ່ນ ຢຸດຜະລິດແຜ່ນດິສດັ່ງກ່າວໃນປີ 2011, ແຕ່ກົດໝາຍ, ຂໍ້ກໍານົດ ແລະ ຄໍາສັ່ງລວມຫລາຍກວ່າ 1,000 ສະບັບ ກຽວກັບຟອບປີດິສ ຍັງມີຜົນບັງຄັບໃຊ້ຕໍ່ຈາກນັ້ນ.

      ທັງນີ້, ຍີ່ປຸ່ນເລີ່ມຖອຍຫ່າງຈາກການໃຊ້ຟອບປີດິສເມື່ອ 2 ປີກ່ອນ ຫລັງທ່ານ ທາໂຣະ ໂຄໂນະ ລັດຖະມົນຕີດິຈີຕອນຍີ່ປຸ່ນ ປະກາດສົງຄາມກັບຟອບປີດິສ ແລະ ເມື່ອບໍ່ດົນມານີ້, ທ່ານກ່າວວ່າ: ກົດລະບຽບທັງໝົດກ່ຽວກັບຟອບປີດິສ ໄດ້ຮັບການກວດສອບໂດຍສະມາຊິກສະພານິຕິບັນຍັດ, ຜ່ານການຮັບຟັງຄວາມຄິດເຫັນຈາກສາທາລະນະ ແລະ ໄດ້ຮັບການລົງມະຕິຍົກເລີກຮຽບຮ້ອຍແລ້ວ.

     ເຖິງຢ່າງໃດກໍຕາມ, ບາງພາກສ່ວນນອກລັດຖະບານຍີ່ປຸ່ນ ຍັງບໍ່ພ້ອມຈະຍົກເລີກການໃຊ້ຟອບປີດິສທັນທີ ໂດຍໜ່ວຍງານບາງແຫ່ງລະບຸວ່າ: ຟອບປີດິສບໍ່ມີຄວາມສ່ຽງຈະຖືກແຮັກ. ຂະນະທີ່ການປ່ຽນໄປໃຊ້ລະບົບຈັດເກັບຂໍ້ມູນໃນຍຸກປັດຈຸບັນ ເຮັດໃຫ້ພວກເຂົາຕ້ອງມີຄວາມລະມັດລະວັງເພີ່ມຂຶ້ນເລື່ອງຄວາມປອດໄພຂອງຂໍ້ມູນ.