ອິດສະລາແອນໂຈມຕີໂຮງຮຽນ UN ຢູ່ເຂດກາຊາ ມີຜູ້ເສຍຊີວິດແລ້ວ 16 ຄົນ
ມີຜູ້ເສຍຊີວິດຢ່າງໜ້ອຍ 16 ຄົນ ຈາກເຫດການກອງທັບອິດສະລາແອນໂຈມຕີໂຮງຮຽນຂອງສະຫະປະຊາຊາດຢູ່ເຂດພາກກາງຂອງເຂດກາຊາ.
ວັນທີ 7 ກໍລະກົດ, ສໍານັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຢູ່ເຂດກາຊາ ເຊິ່ງບໍລິຫານງານໂດຍກຸ່ມຮາມັດ ລາຍງານວ່າ: ກອງທັບອິດສະລາແອນປະຕິບັດການໂຈມຕີທາງອາກາດ ສ້າງຄວາມເສຍຫາຍຢ່າງໜັກໃຫ້ແກ່ໂຮງຮຽນອັລ-ຈາວນີ ໃນເມືອງນິໄຊຣັດ ທາງຕອນກາງຂອງເຂດກາຊາ ໃນວັນທີ 6 ກໍລະກົດຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 16 ຄົນ ແລະ ມີຜູ້ໄດ້ຮັບບາດເຈັບອີກຫລາຍສິບຄົນ ສ່ວນຫລາຍເປັນປະຊາຊົນທີ່ອາໄສໂຮງຮຽນເປັນສະຖານທີ່ຫລົບໄພ.
ຂະນະທີ່ຖະແຫລງການຂອງກອງທັບອິດສະລາແອນລະບຸວ່າ: ປະຕິບັດການໂຈມຕີໂຮງຮຽນແຫ່ງດັ່ງກ່າວ ເພື່ອທໍາລາຍໂຄງສ້າງທາງທະຫານຂອງກຸ່ມຮາມັດ ທີ່ຊຸກຊ້ອນຢູ່ພາຍໃນອານາເຂດຂອງໂຮງຮຽນແຫ່ງນີ້.
ໂຮງຮຽນອີກແຫ່ງໜຶ່ງຢູ່ເມືອງນູໄຊຣັດ ຕົກເປັນເປົ້າໝາຍຂອງການໂຈມຕີໂດຍອິດສະລາແອນ ໃນເດືອນມິຖຸນາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 35 ຄົນ.
ສ່ວນສໍານັກງານບັນເທົາທຸກ ແລະ ຈັດຫາງານຂອງສະຫະປະຊາຊາດ ສໍາລັບຜູ້ລີ້ໄພປາແລັສຕິນຢູ່ຕາເວັນອອກໃກ້ (UNRWA) ກ່າວວ່າ: ນັບແຕ່ສົງຄາມຢູ່ເຂດກາຊາເລີ່ມຂຶ້ນ ໃນວັນທີ 7 ຕຸລາປີຜ່ານມາ ຫລາຍກວ່າເຄິ່ງຂອງສະຖານທີ່ ທີ່ຢູ່ພາຍໃຕ້ການເບິ່ງແຍງຂອງ UNRWA ລວມທັງໂຮງຮຽນທີ່ຕອນນີ້ກາຍເປັນສະຖານທີ່ລີ້ໄພຂອງປະຊາຊົນ ເປັນເປົ້າໝາຍຂອງການໂຈມຕີທາງທະຫານ ແລະ ສົ່ງຜົນເຮັດໃຫ້ເຈົ້າໜ້າທີ່ຂອງ UNRWA ເສຍຊີວິດແລ້ວ 194 ຄົນ.
