ຫວຽດນາມຄາດຄະເນເສດຖະກິດປະເທດຂະຫຍາຍຕົວໄວ ອາດສູງເຖິງ 7% ໃນປີນີ້
ລັດຖະບານຫວຽດນາມ ຄາດຄະເນເສດຖະກິດຂອງປະເທດປີນີ້ອາດເຕີບໃຫຍ່ເຖິງ 7% ຫລາຍກວ່າທີ່ມີການປະເມີນໄວ້ກ່ອນໜ້ານີ້.
ວັນທີ 6 ກໍລະກົດ, ສໍານັກຂ່າວຕ່າງປະເທດລາຍງານວ່າ: ກະຊວງການວາງແຜນ ແລະ ການລົງທຶນຂອງຫວຽດນາມເຜີຍແຜ່ລາຍງານ ຄາດຄະເນວ່າ: ເສດຖະກິດຂອງຫວຽດນາມຈະເຕີບໃຫຍ່ຢ່າງວ່ອງໄວ ແລະ ຕໍ່ເນື່ອງເຖິງລະດັບ 6.5% ຕາມເປົ້າໝາຍໃນປີນີ້ ແລະ ມີທ່າອ່ຽງເຕີບໃຫຍ່ເຖິງ 7% ເນື່ອງຈາກການລົງທຶນຂະແໜງອຸດສາຫະກໍາ ແລະ ການກໍ່ສ້າງຂະຫຍາຍຕົວ.
ທັງນີ້, ຂໍ້ມູນຈາກສໍານັກງານສະຖິຕິແຫ່ງຊາດຫວຽດນາມ ເຊິ່ງເຜີຍແຜ່ເມື່ອບໍ່ດົນມານີ້ ລະບຸວ່າ: ອັດຕາການເຕີບໃຫຍ່ທາງເສດຖະກິດຂອງປະເທດ ໃນໄລຍະ 6 ເດືອນຜ່ານມາ ຫລື ລະຫວ່າງເດືອນມັງກອນ-ມິຖຸນາ ຢູ່ລະດັບ 6.4% ເພີ່ມຂຶ້ນຫລາຍເມື່ອທຽບໃສ່ສະຖິຕິການຂະຫຍາຍຕົວທາງເສດຖະກິດ 3.7% ເມື່ອໄລຍະເວລາດຽວກັນຂອງປີ 2023.
ການຂະຫຍາຍຕົວຢ່າງຕໍ່ເນື່ອງຂອງເສດຖະກິດຫວຽດນາມເປັນຜົນມາຈາກປັດໄຈຫລາຍປະການ ລວມທັງການລົງທຶນສາທາລະນະ ແລະ ຕະຫລາດແລກປ່ຽນທີ່ມີການປະຕິຮູບຢ່າງຕໍ່ເນື່ອງ ເຊິ່ງສ້າງສະຖຽນລະພາບໃຫ້ຕ່ອງໂສ້ອຸປະທານນໍາອີກ.
ຜົນຜະລິດອຸດສາຫະກໍາເພີ່ມຂຶ້ນ 7.5% ແລະ ການລົງທຶນຈາກຕ່າງປະເທດເພີ່ມຂຶ້ນ 8.2% ໃນໄລຍະເວລາດຽວກັນ. ຂະນະທີ່ຜູ້ສັນທັດກໍລະນີເບິ່ງວ່າ: ລັດຖະບານຫວຽດນາມຍັງຕ້ອງໃຫ້ຄວາມສໍາຄັນຕໍ່ການເດີນໜ້າພັດທະນາໂຄງສ້າງທີ່ສໍາຄັນຂອງພາກສ່ວນການຜະລິດ, ການປະມວນຜົນ, ການຂົນສົ່ງ ແລະ ການບໍລິການ.
ຂະນະທີ່ລາຍໄດ້ຈາກການສົ່ງອອກສິນຄ້າຂອງຫວຽດນາມ ມີມູນຄ່າ 190,000 ລ້ານໂດລາສະຫະລັດ ໄລຍະເວລາ 6 ເດືອນທໍາອິດຂອງປີນີ້ ເພີ່ມຂຶ້ນ 14.5% ເມື່ອທຽບໃສ່ໄລຍະເວລາດຽວກັນຂອງປີຜ່ານມາ ໂດຍມີອາເມລິກາຄອງຕໍາແໜ່ງປະເທດຄູ່ຄ້າລາຍໃຫຍ່ທີ່ສຸດຂອງຫວຽດນາມໃນໄລຍະເວລາດັ່ງກ່າວ.
