ຈັນຍາບັນຜູ້ຂັບຂີ່ເບິ່ງຄືຖອຍຫລັງ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງທັງຫລາຍ, ຈະຄິດຄືຂ້າພະເຈົ້າບໍ່ ? ປັດຈຸບັນນີ້ສັງເກດເຫັນວ່າ ມາລະຍາດ ແລະ ຈັນຍາບັນຂອງຜູ້ຂັບຂີ່ຢູ່ບ້ານເຮົາເບິ່ງຄືວ່າຖອຍຫລັງ, ຖ້າທຽບໃສ່ໄລຍະກ່ອນນີ້ ຫລາຍປະເທດຢູ່ອ້ອມຂ້າງເຮົາໃຜໆກໍຍົກຍ້ອງວ່າຄົນລາວມີມາລະຍາດການຂັບຂີ່ດີ, ໄປໃສມາໃສກໍບໍ່ໄດ້ຍິນສຽງບີບແກໄລ່ກັນ, ໂວຍວາຍໃສ່ກັນຄືບ້ານເພິ່ນ, ແຕ່ມາຮອດດຽວນີ້ ສິ່ງດັ່ງກ່າວໄດ້ປ່ຽນໄປ ເບິ່ງຄືວ່າຜູ້ຂັບຂີ່ຈຳນວນໜຶ່ງຮອດບໍ່ຮູ້ກົດຈະລາຈອນເລີຍ, ຢາກໄປທາງໃດກໍໄປ, ຢາກຈອດລົດຢູ່ໃສກໍຈອດ ແລະ ຢາກແຊງຊ້າຍ-ແຊງຂວາກໍເອົາຕາມໃຈ ຂໍແຕ່ໄດ້ບືນລົດຕົນເອງຂຶ້ນມາ, ບາງຄັ້ງສົ່ງຜົນໃຫ້ລົດຕິດກັນເປັນແຖວຍາວຢຽດ ແຕ່ເພິ່ນຜູ້ຂາດຈັນຍາບັນການຂັບຂີ່ນັ້ນກໍບໍ່ໄດ້ເອົາຫົວຊາແຕ່ຢ່າງໃດ, ບາງຄັ້ງລົດດາດກັນເລັກໆໜ້ອຍໆກໍລົງມາໂວຍວາຍໃສ່ກັນປານສັດຕູງູພິດ ແລະ ຮ້າຍແຮງໄປກວ່ານັ້ນ ກໍຈົນລົງໄມ້ລົງມືໃສ່ກັນກໍມີ ແລະ ອື່ນໆ, ມີຄັ້ງໜຶ່ງ ທ່ຽງທຳ ພົບເຫັນລົດເກງແບບກະປ໋ອງຄັນໜຶ່ງຈອດຢູ່ກະໂຕເກືອບກາງທາງໃນເຂດທາງຕະຫລາດແລງໜອງດ້ວງ ລົດຫລາຍຄັນທີ່ນຳກັນໄປຕ່າງກໍລໍຖ້າ ແຕ່ກໍບໍ່ເຫັນລົດຄັນຈອດຢູ່ໜ້ານັ້ນຈະຫຍັບໄປ ແລ້ວອົດບໍ່ໄດ້ຕ່າງຄົນກໍບຽດຂຶ້ນຜ່ານໄປຈຶ່ງຫລຽວເຫັນສາວນ້ອຍຄົນໜຶ່ງຜູ້ຂັບລົດດັ່ງກ່າວໃນລັກສະນະທ່າທາງບໍ່ຄ່ອຍສຸພາບປານໃດ ເກົ້າຜົມຈຸກ, ປາກຢ້ຳໝາກຝັ່ງ (ຊິງໂກມ), ມືບີບໂທລະສັບມືຖືຢູ່ຢ່າງບໍ່ເອົາຫົວຊາຕໍ່ໂລກພາຍນອກ ຈົນໃຜຫລຽວເຫັນກໍຕ້ອງໄດ້ແກວ່ງຫົວນຳ ແລະ ອື່ນໆ.
ໃນບົດຂຽນນີ້ ທ່ຽງທຳ ຢາກຂໍເຕືອນວ່າ: ປີທ່ອງທ່ຽວລາວ 2018 ພວກເຮົາໄດ້ພ້ອມກັນເປີດຂຶ້ນແລ້ວຢ່າງຍິ່ງໃຫຍ່ ເພື່ອຄອຍຕ້ອນຮັບແຂກບ້ານແຂກເມືອງຜູ້ມາທ່ຽວ ແລະ ໜຶ່ງໃນປັດໄຈສຳຄັນຂອງການຕ້ອນຮັບນັ້ນກໍແມ່ນມາລະຍາດອັນນິ້ມນວນອ່ອນຫວານຂອງຊາວລາວເຮົາທີ່ມີມູນເຊື້ອມາແຕ່ດຶກດຳບັນນັ້ນຈະຕ້ອງໄດ້ເສີມຂະຫຍາຍ ແລະ ໃນນັ້ນກໍມີທັງມາລະຍາດການຂັບຂີ່, ອັນສຳຄັນທີ່ສຸດເມ່ືອເຫັນແຂກຄົນທີ່ຈະຂ້າມທາງຫລວງ ຜູ້ຂັບຂີ່ມາກໍຈະຕ້ອງໄດ້ຈອດລົດໃຫ້ເພິ່ນຂ້າມສາກ່ອນຈຶ່ງຄ່ອຍໆອອກລົດແລ່ນຕໍ່ໄປ. ດັ່ງພວກເຮົາໄດ້ພົບເຫັນຢູ່ຫລາຍປະເທດທີ່ເພິ່ນພັດທະນາແລ້ວ, ເພິ່ນໄດ້ໃສ່ໃຈຫລາຍຕໍ່ມາລະຍາດການຂັບຂີ່ ແລະ ພ້ອມນັ້ນຢູ່ໂຮງຮຽນສອນຂັບລົດກໍຕ້ອງໄດ້ເອົາໃຈໃສ່ສິດສອນເຖິງມາລະຍາດ ແລະ ຈັນຍາບັນຂອງຜູ້ຂັບຂີ່ຕື່ມອີກ ເພື່ອຄວາມເປັນລະບຽບຮຽບຮ້ອຍ, ມີວັດທະນະທຳ ແລະ ສີວິໄລ.
