ທ່ານ ຊູແນັກ ລາອອກຈາກຜູ້ນໍາພັກອະນຸລັກນິຍົມ ຍິນດີທ່ານ ສຕາຣເມີ ດໍາລົງຕໍາແໜ່ງນາຍົກລັດຖະມົນຕີ

     ທ່ານ ຣິຊີ ຊູແນັກ ລາອອກຈາກຕໍາແໜ່ງຫົວໜ້າພັກອະນຸລັກນິຍົມ ຫລັງເສຍໄຊຄັ້ງປະຫວັດສາດໃຫ້ພັກແຮງງານໃນການເລືອກຕັ້ງທົ່ວໄປຜ່ານມາເມື່ອມໍ່ໆນີ້ ແລະ ສະແດງຄວາມຍິນດີຕໍ່ທ່ານ ເຊີ ເຄຍ ສຕາຣເມີ ຫົວໜ້າພັກແຮງງານ ເຊິ່ງຈະເປັນນາຍົກລັດຖະມົນຕີຄົນໃໝ່ຂອງອັງກິດ.

      ວັນທີ 5 ກໍລະກົດ, ສໍານັກຂ່າວຕ່າງປະເທດລາຍງານວ່າ: ນາຍົກລັດຖະມົນຕີ ຣິຊີ ຊູແນັກ ຖະແຫລງລາອອກຈາກຕໍາແໜ່ງຫົວໜ້າພັກອະນຸລັກນິຍົມ, ແຕ່ຍັງປະຕິບັດໜ້າທີ່ຮັກສາການຈົນກວ່າຈະມີການຄົ້ນຫາຜູ້ດໍາລົງຕໍາແໜ່ງຄົນໃໝ່ໄດ້.

     ຂະນະດຽວກັນ, ທ່ານ ຊູແນັກ ກ່າວຂໍໂທດປະຊາຊົນ ແລະ ຍອມຮັບວ່າ: ຜົນການເລືອກຕັ້ງທົ່ວໄປທີ່ອອກມາສະທ້ອນ “ຄວາມຜິດຫວັງ ແລະ ຄວາມຄຽດຂອງປະຊາຊົນ” ຕໍ່ການບໍລິຫານງານຂອງລັດຖະບານໃນໄລຍະເວລາຜ່ານມາ ເຊິ່ງທ່ານ ແລະ ພັກອະນຸລັກນິຍົມຍອມຮັບແບບບໍ່ມີເງື່ອນໄຂ ແລະ ກ່າວວ່າ: ເປັນກຽດຢ່າງສູງສຸດໃນຊີວິດທີ່ໄດ້ປະຕິບັດໜ້າທີ່ນາຍົກລັດຖະມົນຕີ ໃນໄລຍະເວລາເກືອບ 2 ປີຜ່ານມາ.

      ນອກຈາກນີ້, ທ່ານ ຊູແນັກ ກ່າວເຖິງທ່ານ ເຊີ ເຄຍ ສຕຣາເມີ ຫົວໜ້າພັກແຮງງານ ເຊິ່ງຈະຮັບຕໍາແໜ່ງນາຍົກລັດຖະມົນຕີຄົນຕໍ່ໄປຫລັງຊະນະການເລືອກຕັ້ງວ່າ: ເຖິງວ່າການແຂ່ງຂັນ ແລະ ຂັບຂ້ຽວກັນທາງການເມືອງ ແຕ່ບົນພື້ນຖານຂອງຄວາມເປັນຈິງ, ທ່ານຊື່ນຊົມ, ຍົກຍ້ອງ ແລະ ເຄົາລົບການເຮັດວຽກຂອງອີກຝ່າຍ.

      ທັງນີ້, ຜົນບໍ່ເປັນທາງການຂອງການເລືອກຕັ້ງທົ່ວໄປຂອງອັງກິດ ໃນວັນທີ 4 ກໍລະກົດຜ່ານມາ ຫລັງທ່ານ ຊູແນັກ ຍຸບສະພາ ໃນທ້າຍເດືອນພຶດສະພາ ນັບຄະແນນໄປແລ້ວ 99% ປາກົດວ່າ: ພັກແຮງງານໄດ້ຮັບການເລືອກຕັ້ງຢ່າງໜ້ອຍ 412 ບ່ອນນັ່ງ ຈາກທັງໝົດ 650 ບ່ອນນັ່ງ ໃນສະພາສາມັນ ຄຽງສຽງສ່ວນຫລາຍຢ່າງເດັດຂາດ ແລະ ພຽງພໍຈັດຕັ້ງລັດຖະບານພັກດຽວ.

      ສ່ວນພັກອະນຸລັກນິຍົມໄດ້ຮັບການເລືອກຕັ້ງຢ່າງໜ້ອຍ 121 ບ່ອນນັ່ງ ຮ້າຍແຮງທີ່ສຸດໃນປະຫວັດສາດຂອງພັກ ແລະ ສົ່ງຜົນເຮັດໃຫ້ເກີດການປ່ຽນຂົ້ວການເມືອງໃນຮອບ 14 ປີຂອງອັງກິດ ໂດຍພັກແຮງງານກັບມາເປັນລັດຖະບານຄັ້ງທໍາອິດນັບແຕ່ສິ້ນສຸດຍຸກລັດຖະບານຂອງທ່ານ ກໍດອນ ບຣາວ ໃນປີ 2010.