ກຳປູເຈຍເນລະເທດແກ້ງຮີດໄຖ່ເງິນກັບຈີນ 61 ຄົນ
ຕຳຫລວດກຳປູເຈຍເປີດເຜີຍວ່າ: ໄດ້ເນລະເທດຊາວຈີນ 61 ຄົນກັບຈີນຂໍ້ຫາຖືກສົງໄສຮີດໄຖເງິນທາງອິນເຕີເນັດ ແລະ ໂທລະສັບ, ແຕ່ໄຕ້ຫວັນປະທ້ວງວ່າມີຄົນທີ່ເດີນທາງໄປຈາກໄຕ້ຫວັນລວມຢູ່ນຳ 19 ຄົນ.
ຕຳຫລວດກຳປູເຈຍສົ່ງຮູບຖ່າຍໃຫ້ສຳນັກຂ່າວຣອຍເຕີໃນວັນທີ 28 ຕຸລາ ເປັນຮູບຜູ້ຖືກສົງໄສໃສ່ເສື້ອສີແດງຖືກມັດຂໍ້ມືລວມກັນກ່ອນຖືກເນລະເທດ. ຫົວໜ້າໜ່ວຍສອບສວນ ສຳນັກງານກວດຄົນເຂົ້າເມືອງ ເປີດເຜີຍວ່າ: ຕຳຫລວດຈີນເດີນທາງມາຮັບຜູ້ຖືກສົງໄສ 61 ຄົນ ທີ່ຖືກຈັບໃນໄລຍະທາງການກຳປູເຈຍປະຕິບັດການກວດຄົ້ນຢູ່ນະຄອນຫລວງພະນົມເປັນ, ແຂວງກັນດາວ ແລະ ແຂວງສີໜຸວິວ ລະຫວ່າງວັນທີ 17-21 ຕຸລາ ໃນຈຳນວນນີ້ເປັນຜູ້ຍິງ 13 ຄົນ.
ສ່ວນໄຕ້ຫວັນຂັດແຍ່ງວ່າ: ຜູ້ຖືກສົງໄສເຫລົ່ານີ້ມີຜູ້ທີ່ເດີນທາງໄປຈາກໄຕ້ຫວັນ 19 ຄົນ ແລະ ໄດ້ຍື່ນປະທ້ວງຈີນແລ້ວທີ່ຮັບຕົວກັບໄປຈີນ, ໄຕ້ຫວັນບໍ່ພໍໃຈທີ່ກຳປູເຈຍເນລະເທດຊາວໄຕ້ຫວັນຖືກສົງໄສຮີດໄຖເງິນອອນລາຍໄປຈີນ ແລະ ກ່າວຫາກຳປູເຈຍວ່າເຮັດໄປເພື່ອເອົາໃຈຈີນ.
