ສານຂັ້ນຕົ້ນແຂວງອຸດົມໄຊ ຕັດສິນລົງໂທດປະຫານຊີວິດ 2 ຈໍາເລີຍ ຮ່ວມກັນຄ້າຂາຍຢາເສບຕິດ
ຂ່າວໜັງສືພິມ ປ້ອງກັນຄວາມສະຫງົບລາຍງານວ່າ: ວັນທີ 28 ມິຖຸນາ 2024 ຜ່ານມາ ຄະນະສານອາຍາຂັ້ນຕົ້ນ ສານປະຊາຊົນ ແຂວງອຸດົມໄຊ ຕັດສິນລົງໂທດປະຫານຊີວິດ ທັງ 2 ຈໍາເລີຍ ທ້າວ ຮາວັນແທັງ ອາຍຸ 52 ປີ ສັນຊາດຫວຽດນາມ ແລະ ທ້າວ ສຸລິຍົງ ຫຼື ບຸນຍົງ ອາຍຸ 52 ປີ ສັນຊາດລາວ ຂໍ້ຫາຄ້າຂາຍຢາເສບຕິດ ປະເພດຢາບ້າ 186.000 ເມັດ ນໍ້າໜັກ 22 ກິໂລ.
ສໍານວນຄະດີ ອົງການໄອຍະການປະຊາຊົນ ແຂວງອຸດົມໄຊ ໄດ້ຖະແຫຼງລາຍລະອຽດວ່າ: ທ້າວ ຮາວັນແທັງ ຖືກເຈົ້າໜ້າທີ່ຕໍາຫຼວດໜ່ວຍສະເພາະກິດ ປກສ ແຂວງ ຈັບເວລາ 11 ໂມງຂອງວັນທີ 7 ມີນາ 2022 ຢູ່ຈຸດກວດກາຫຼັກ 44 (ເສັ້ນທາງແຂວງ ອຸດົມໄຊ ຫາ ແຂວງ ຫຼວງພະບາງ) ພ້ອມກັບທ້າວ ແທງລໍວັນ ທັງສອງໃຊ້ HYUNDAI ສີຟ້າ ໝາຍເລກທະບຽນ ກຳແພງນະຄອນ ກນ 1847 ຂົນຢາບ້າ 93 ມັດ ມີ 186.000 ເມັດ ນໍ້າໜັກ 22 ກິໂລກຣາມ ໂດຍການຊຸກເຊື່ອງຢູ່ຝາຂ້າງຫ້ອງແຄັບ, ຖັງນໍ້າມັນ ຈໍານວນ 5 ຖັງ, ບັ້ງແກັດ ຈຳນວນ 2 ບັ້ງ, ຈັກສີດຢາຂ້າຫຍ້າ ຈໍານວນ 1 ເຄື່ອງ, ຜ້າເສື່ອ ຈຳນວນ 3 ຜືນ, ຜ້າຮົ່ມ ຈໍານວນ 3 ເປົາ, ໝອນ ແລະ ຜ້າປູ ຈຳນວນ 1 ເປົາ ແລະອື່ນໆ.
ຜ່ານການສອບສວນ ທ້າວ ຮາວັນແທັງ ຮັບສາລະພາບວ່າ: ຕົນ ແລະ ທ້າວ ແທງລໍວັນ ຈະໄປຊອກຮັບຈ້າງໄຖສວນກາເຟຢູ່ເມືອງ ປາກຊ່ອງ ແຂວງຈຳປາສັກ ແລ້ວຈະເອົາຢາບ້າໄປຊອກຂາຍນໍາ ຕົນຈຶ່ງສັ່ງຊື້ຢາບ້າ ນໍາທ້າວ ສຸລິຍົງ ຫຼື ບຸນຍົງ ຢູ່ບ້ານ ນາປົວ, ເມືອງ ໃໝ່, ແຂວງ ຜົ້ງສາລີ; ມາຮອດເວລາປະມານ 10 ໂມງ ຂອງວັນທີ 9 ມີນາ 2022 ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ອຸດົມໄຊ ໄດ້ສົມທົບ ກັບເຈົ້າໜ້າທີ່ຕໍາຫຼວດ ປກສ ເມືອງ ໃໝ່ ແຂວງ ຜົ້ງສາລີ ເຂົ້າຈັບຕົວທ້າວ ສຸລິຍົງ ຫຼື ບຸນຍົງ, ຜ່ານການກວດຄົ້ນໄດ້ພົບເຫັນຢາບ້າ ຈຳນວນ 2 ເມັດ ນໍ້າໜັກ 0,2 ກຣາມ ແລະ ເຄື່ອງຂອງອື່ນໆ.
ທ້າວ ສຸລິຍົງ ຫຼື ບຸນຍົງ ຮັບສາລະພາບວ່າ: ຕົນຂາຍຢາບ້າໃຫ້ກັບທ້າວ ຮາວັນແທັງ ແທ້ ແຕ່ຂາຍໃຫ້ພຽງແຕ່ 9 ມັດເທົ່ານັ້ນ, ສ່ວນທີ່ເຫຼືອແມ່ນບໍ່ຮູ້ວ່າ ທ້າວ ຮາວັນແທັງ ເອົາມາແຕ່ໃສ.
ຜ່ານການຄົ້ນຄວ້າ, ກວດກາບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີຢູ່ໃນສໍານວນຄະດີຢ່າງລະອຽດ ຄົບຖ້ວນ, ຮອບດ້ານ, ພາວະວິໄສ ແລ້ວ: ເຫັນວ່າ: ການກະທໍາຂອງທ້າວ ຮາວັນແທງ (ຈໍາເລີຍ 1) ແລະ ທ້າວ ສຸລິຍົງ ຫຼື ບຸນຍົງ (ຈໍາເລີຍ 2 ) ມີຄວາມຜິດຕາມຂໍ້ກ່າວຫາແທ້ ສານຈຶ່ງຕັດສິນລົງໂທດປະຫານຊີວິດ ທັງ 2 ຈໍາເລີຍ; ສ່ວນທ້າວ ແທັງລໍວັນ ໄດ້ເອົາຕົວຫລົບຈາກສະທີ່ຄຸມຂັງ ເຈົ້າໜ້າທີ່ວິຊາສະເພາະຍັງສືບຕໍ່ຈັບຕົວມາດໍາເນີນຄະດີຕາມລະບຽບກົດໝາຍໃນຂັ້ນຕອນຕໍ່ໄປ.
