ເຈົ້າຄອງນະຄອນຫລວງ ເນັ້ນໃຫ້ຂະແໜງພາສີ ນວ ຈັດເກັບລາຍຮັບບັນລຸຕາມແຜນການ ແລະ ເກີນແຜນທີ່ຂັ້ນເທິງມອບໝາຍ

ວັນທີ 27 ມິຖຸນາ 2024, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ (ນວ) ພ້ອມດ້ວຍຄະນະໄດ້ລົງໄປຢ້ຽມຢາມ ແລະ ເຮັດວຽກກັບດ່ານພາສີທ່າບົກທ່ານາແລ້ງ ແລະ ຂົວມິດຕະພາບລາວ-ໄທ ແຫ່ງທີ 1 ນວ ພາສີປະຈຳ ນວ ແລະ ສະຖານີວຽງຈັນໃຕ້, ເພື່ອເປັນການຊຸກຍູ້ການຈັດເກັບລາຍຮັບເຂົ້າງົບປະມານຂອງຂະແໜງພາສີປະຈຳດ່ານ. ພ້ອມທັງຮັບຟັງລາຍງານກ່ຽວກັບສະພາບລວມຂອງດ່ານສິນຄ້າທ່າບົກທ່ານາແລ້ງ ການຈັດຕັ້ງປະຕິບັດວຽກງານ 5 ເດືອນຕົ້ນປີຂອງພາສີ ນວ ແລະ ການກະກຽມໃຫ້ເຂົ້າໜ້າທີ່ໄປປະຈຳສະຖານີລົດໄຟຄຳສະຫວາດ ແລະ ການຈັດຕັ້ງປະຕິບັດວຽກງານ 5 ເດືອນຕົ້ນປີຂອງດ່ານພາສີທ່າບົກທ່ານາແລ້ງ ແລະ ຂົວມິດຕະພາບລາວ-ໄທ 1.

ໂອກາດນີ້, ທ່ານເຈົ້າຄອງນະຄອນຫລວງ ໂອ້ລົມຊົມເຊີຍຕໍ່ຂະແໜງພາສີທີ່ ເອົາໃຈໃສ່ສາມາດປະຕິບັດໜ້າທີ່ວຽກງານວິຊາສະເພາະຂອງຕົນຢ່າງຕັ້ງໜ້າມີຜົນສຳເລັດມັນສະແດງໃຫ້ເຫັນການຈັດເກັບລາຍຮັບແຕ່ລະປີເພີ່ມຂຶ້ນທັງໝົດຍ້ອນຄວາມຍົກສູງຂອງສະມາຊິກພັກ ແລະ ພະນັກງານພາສີປະຈຳດ່ານທົ່ວ ນວ ໃນສະພາບທີ່ພວກເຮົາມີຄວາມຫຍຸ້ງຍາກທາງດ້ານເສດຖະກິດ. ພ້ອມທັງເນັ້ນໃຫ້ເອົາໃຈໃສ່ສືບຕໍ່ຈັດເກັບລາຍຮັບໃຫ້ໄດ້ບັນລຸຕາມແຜນການ ແລະ ເກີນແຜນທີ່ຂັ້ນເທິງມອບໝາຍໃຫ້, ດ້ານການບໍລິການໃຫ້ມີຄວາມອ່ອນໂຍນໂດຍອີງໃສ່ກົດໝາຍເປັນຫລັກ, ພະນັກງານບໍ່ຕ້ອງໃຊ້ສິດໃຊ້ອຳນາດນາບຂູ່ປະຊາຊົນ, ສືບຕໍ່ຈັດວາງພະນັກງານປະຈຳແຕ່ລະດ່ານ ແຕ່ລະໜ້າວຽກໃຫ້ມີຄວາມເໝາະສົມຕາມຄວາມຮູ້ຄວາມສາມາດນຳໃຊ້ເຄື່ອງມືທີ່ທັນສະໄໝເຂົ້າໃນການບໍລິການເກັບພາລີ ກວດກາສິນຄ້ານຳເຂົ້າ ແລະ ອື່ນໆ.