ສຶກສາຫາຄວາມຮູ້ ແລະ ສ້າງອາຊີບໃສ່ຕົນເອງ ຄືບາດກ້າວສູ່ຄວາມເປັນຜູ້ໃຫຍ່

 ໂດຍ: ຜາຕຸງ

ການທີ່ເຮົາຮຽນຕໍ່ຈາກມັດທະຍົມຕອນຕົ້ນກ້າວສູ່ມັດທະຍົມຕອນປາຍ ຫຼື ຈົບຈາກມັດທະຍົມຕອນປາຍ ກ້າເຂົ້າສູ່ ວິທະຍາໄລ, ມະຫາວິທະຍາໄລ, ສະຖາບັນວິຊາຊີບໃດໜຶ່ງ ລວມທັງການໄປຮຽນຕໍ່ຢູ່ຕ່າງປະເທດ ຂອງຜູ້ທີ່ມີເງື່ອນໄຂ ລ້ວນແລ້ວແຕ່ ເປັນການດີທີ່ຊອກສະແຫວງຫາຄວາມຮູ້ຄວາມສາມາດເພື່ອມາພັດທະນາຕົນເອງ ຄອບຄົວ ກໍຄືປະເທດຊາດໃຫ້ຈະເລີນກ້າວໜ້າ ຍັງດີກວ່າຈະປະຖິ້ມເວລາຖິ້ມໂອກາດໃນການພັດທະນາຕົນເອງໄປໂດຍບໍ່ມີປະໂຫຍດ ດີກວ່າການຫຼີ້ນກິນຟຸມເຟືອຍ, ເຂົ້າຮ້ານເຫຼົ້າ, ຮ້ານເບຍເຮຮາສະໜຸກສະໜານ ອາໄສພໍ່ແມ່ຜູ້ປົກຄອງໄປແຕ່ລະມື້ແຕ່ລະວັນ ສຸດທ້າຍມາກໍສ້າງພາລະໃຫ້ຄອບຄົວ ໃຫ້ສັງຄົມເປັນຜູ້ແກ່ໄຂ.

ຫາກພວກເຮົາຕັ້ງບັນຫານຳກັນວ່າ ໄລຍະພັກສິ້ນປີຮຽນນີ້ຈະເຮັດຫຍັງ ຈະທຳຫຍັງເພື່ອຕົນເອງ ແລະ ຄອບຄົວ ແລະ ທາງອອກໃນການຕອບໂຈດນີ້ກໍມີຫລາຍໆທາງ ເຊັ່ນ ສຳລັບຜູ້ທີ່ມີເງື່ອນໄຂສາມາດອອກແຮງງານໄດ້ ກໍຄວນໄປຊອກວຽກເຮັດງານທຳ, ຊອກເບ້ຍຫາເງິນເພື່ອຫຼຸດຜ່ອນພາລະການໃຊ້ຈ່າຍຂອງພໍ່ແມ່ຜູ້ປົກຄອງ ເພາະປະຈຸບັນມີຫຼາຍບໍລິສັດ ຫຼາຍຫົວໜ່ວຍທຸລະກິດມີຄວາມຕ້ອງການແລະໄດ້ປະກາດຮັບສະມັກເພື່ອນຮວມງານເປັນຈຳນວນຫຼາຍ ແລະການອອກແຮງງານກໍຄວນຊອກໃຫ້ເໝາະສົມກັບສະພາບຄວາເປັນຈິງຂອງຕົວເຮົາເອງ ຫຼື ບໍ່ກໍຊອກຮຽນບຳລຸງໃນວິຊາໃດທີ່ເຫັນວ່າຕົນເອງບໍ່ທັນເກັ່ງບໍ່ທັນເຂົ້າໃຈເພື່ອກຽມໂຕໃນສົກຮຽນໃໝ່.

ສຳລັບ ນັກຮຽນນັກສຶກສາທີ່ຈົບ ມ7 ແລ້ວ ຖືວ່າອ່າວເປັນຜູ້ໃຫຍ່ຮູ້ຈັກຮັບຜິດຊອບຊົ່ວດີແລ້ວ ຄິດວ່າ ພາຍຫຼັງເສັງຈົບຊັ້ນມັດທະຍົມສຶກສາຕອນປາຍ ຫຼື ມ7 ແລ້ວຄວນໄດ້ຄຳນຶງວ່າ ອະນາຄົດຕົນເອງຕ້ອງການເຮັດຫຍັງ ຊິຮຽນຫຍັງ ຕ້ອງໄດ້ກະກຽມຄວາມພ້ອມແຕ່ດຽວນີ້ໄປ ແລະ ຕັດສິນໃຈສອບເສັງເຂົ້າຮຽນໃນໂຮງຮຽນທີ່ຕົນມັກ ຫຼື ບໍ່ກໍສອບເສັງເຂົ້າຮຽນວິຊາຊີບຕ່າງໆ, ເວົ້າເລື່ອງການຊອກຫາວິຊາຊີບໃນຍຸກຫົວລ້ຽວຫົວຕໍ່ຄືສູ່ມື້ນີ້ ມັນກໍມີຫລາຍທາງອອກສຳລັບຜູ້ທີ່ມີຄວາມບຸກບືນຕັ້ງໜ້າສະແຫວງຫາວິຊາຄວາມຮູ້ຕິດຕົວເຊັ່ນ: ຫັນໄປຮຽນເລື່ອງການກະເສດ, ປູກຝັງລ້ຽງສັດ, ຮຽນວິຊາການໂຮງແຮມ, ຮ້ານອາຫານ, ຊ່າງສ້ອມແປງກົນຈັກ, ສ້ອມແປງເອເລັກໂຕຣນິກ ແລະ ຂະແໜງວິຊາຊີບອື່ນໆ ເມື່ອຮຽນຈົບມາແລ້ວກໍມີວິຊາສະເພາະຕິດຕົວ, ມີວຽກເຮັດງານທຳ ທັງຕົ້ນທຶນຕໍ່າ ຂໍພຽງແຕ່ເຮົາຂະຫຍັນ ແລະ ດຸໝັ່ນ ແລ້ວຜົນໄດ້ຮັບມັນກໍມາຫາເຮົາ. ທັງໝົດນີ້ແມ່ນຂຶ້ນກັບຄວາມຕັດສິນໃຈຂອງຕົນເອງ ແລະ ການປຸກລະດົມຊຸກຍູ້ຈາກຄອບຄົວເພື່ອໃຫ້ໂອກາດທີ່ດີແກ່ລູກຫຼານ,

ການສຶກສາຮໍ່າຮຽນທຸກໆຂະແໜງການ ຕ້ອງເບິ່ງສະຖານະການສັງຄົມ, ຄວາມມັກ ຢ່າເຫີ່ຮຽນໄປຕາມກະແສ ໃຝ່ຝັນຫາຮຽນແຕ່ການເງິນ, ທະນາ ຄານ, ບໍລິຫານທຸລະກິດ ຢ່າຫວັງວ່າຮຽນຈົບມາໄດ້ເປັນເຈົ້າເປັນນາຍ, ຢາກສະໜຸກສະບາຍນັ່ງຢູ່ຫ້ອງແອ ເພາະຜ່ານມາເຫີນຫ່າງຈາກການຜະລິດ ມັກແຕ່ໄປຊື້ເຂົາ ບໍ່ມັກເຮັດການຜະລິດ ມີຊັບໃນດິນສິນໃນນ້ຳມະຫາສານ ແຕ່ພັດລ້ຽງກັນບໍ່ກຸ້ມ. ນີ້ຄືບົດຮຽນອັນມະຫາສານທີ່ພວກເຮົາຕ້ອງພ້ອມກັນຄິດ ແລະ ພ້ອມກັນແກ້ເພື່ອຄວາມຢູ່ດີກິນດີ ແລະ ຮັ່ງມີຂອງຊາດ.