ມອບລົດຈັກເວບ100 ທີ່ຖືກໂຈນລັກໄປແຕ່ປີ 2023 ຄືນໃຫ້ເຈົ້າຂອງເດີມ

ວັນທີ 24 ມິຖຸນາ 2024, ເຈົ້າໜ້າທີ່ພະແນກຕໍາຫລວດຈະລາຈອນ ຫ້ອງຕໍາຫລວດ ປກສ ແຂວງວຽງຈັນ ນຳໂດຍ ພັທ ພູວັນນີ ຫລິນວັນນະລາດ ຫົວໜ້າພະແນກຕໍາຫລວດຈະລະຈອນ ຫ້ອງຕຳຫລວດ ປກສ ແຂວງໄດ້ມອບລົດຈັກເວບ 100 ສີແດງດຳ 1 ຄັນ ທີ່ຖືກໂຈນລັກໄປແຕ່ປີ 2023 ຄືນໃຫ້ເຈົ້າຂອງຊັບເດີມ. ນີ້ກໍ່ຍ້ອນຄວາມເອົາໃຈໃສ່ຂອງເຈົ້າໜ້າທີ່ຕໍາຫລວດຈະລາຈອນ ລົງປະຕິບັດໜ້າທີ່ວິຊາສະເພາະຢູ່ຕາມຈຸດຕ່າງໆ ຂອງເສັ້ນທາງ ແລະ ໄດ້ກວດພົບເຫັນລົດເປົ້າ ໝາຍທີ່ຕ້ອງສົງໄສ ເປັນລົດຈັກ 1 ຄັນ ບໍ່ມີເອກະສານລົດ ຈຶ່ງໄດ້ກັກລົດຈັກດັ່ງກ່າວ ແລ້ວເອົາມາຮັກສາໄວ້ທີ່ກອງບັນຊາການ ປກສ ແຂວງ ແລະ ໄດ້ອອກແຈ້ງການຫາຜູ້ເປັນເຈົ້າຂອງ ໃຫ້ມາຢັ້ງຢືນເອົາລົດຈັກຄັນດັ່ງກ່າວຄືນ.

ຈົນມາຮອດວັນທີ 24 ມິຖຸນາ 2024ນີ້ ທ່ານ ດິດສະວົງ ຈະເລີນຜົນ ປະຊາຊົນບ້ານໂນນສະຫງ່າ ເມືອງໄຊເຊດຖາ ນະຄອນຫລວງວຽງຈັນ ຜູ້ເປັນເຈົ້າຂອງລົດຈັກໄດ້ນໍາເອກະສານມາຢັ້ງຢືນຕໍ່ເຈົ້າໜ້າທີ່ ແລ້ວຮັບເອົາລົດກັບຄືນ.