ຮອງນາຍົກ ຊີ້ນຳໃຫ້ເລັ່ງແກ້ໄຂບັນຫາອາຊະຍາກໍາ ແລະ ການຕົວະຍົວະຫລອກລວງ ຜ່ານລະບົບອິນເຕີເນັດ

ວັນທີ 25 ມິຖຸນາ 2024, ຄະນະກໍາມະການຄຸ້ມຄອງອິນເຕີເນັດ ແຫ່ງຊາດ (ຄຄອຊ) ໄດ້ຈັດກອງປະຊຸມສະຫລຸບວຽກງານຄະນະກຳມະການຄຸ້ມຄອງອິນເຕີເນັດແຫ່ງຊາດ 6 ເດືອນຕົ້ນປີ 2024 ແລະ ວາງທິດທາງແຜນການໃນຕໍ່ໜ້າ, ມີ ພົອ ວິໄລ ຫລ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ປະທານຄະນະກຳມະການຄຸ້ມຄອງອິນເຕີເນັດ ແຫ່ງຊາດ ເປັນປະທານ.

ໃນກອງປະຊຸມ, ພົອ ວິໄລ ຫລ້າຄຳຟອງ ໄດ້ຊີ້ນຳໃຫ້ຄະນະເລັ່ງແກ້ໄຂບັນຫາຫຍໍ້ທໍ້ຜ່ານທາງລະບົບໂທລະຄົມມະນາຄົມ ແລະ ອິນເຕີເນັດ, ເປັນຕົ້ນແມ່ນ ອາຊະຍາກໍາ ແລະ ການຕົວະຍົວະຫລອກລວງ ຜ່ານລະບົບອິນເຕີເນັດ, ຜ່ານແກ້ງຄອນເຊັນເຕີ; ການຮົ່ວໄຫລເອກະສານ ຂອງພັກ-ລັດ, ການຮົ່ວໄຫລຂໍ້ມູນສ່ວນບຸກຄົນ, ຕິດຕາມກວດກາ ແລະ ກັ່ນຕອງບັນດາສື່ ແລະ ເວັບໄຊ ລາມົກອານາຈານ, ບັນຫາເກມ-ການພະນັນ, ຄາຊີໂນ ອອນລາຍ, ການຄ້າຂາຍ ຫວຍເຖື່ອນ, ການຄ້າປະເວນີ, ການຄ້າຢາເສບຕິດ ຜ່ານທາງອອນລາຍ ແລະ ບັນຫາອື່ນໆອີກ, ເພື່ອເຮັດແນວໃດ ເຮັດໃຫ້ສະພາບແວດລ້ອມອິນເຕີເນັດ ຂອງ ສປປ ລາວ ມີຄວາມປອດໄພ.

ພ້ອມນັ້ນ ຕ້ອງໄດ້ສົມທົບກັບພາກສ່ວນທີ່ກ່ຽວຂ້ອງຢ່າງແໜ້ນແຟ້ນ ແລະ ກົມກຽວເພື່ອເຮັດໃຫ້ອິນເຕີເນັດ ແລະ ເຕັກໂນໂລຊີດີຈີຕອນ ສາມາດປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ຕິດພັນກັບ 2 ວາລະແຫ່ງຊາດ, ໂດຍສະເພາະ ແມ່ນການຊຸກຍູ້ ການສ້າງຕັ້ງ ແລະ ປັບປຸງ ຄະນະກຳມະການຄຸ້ມຄອງອິນເຕີເນັດ ໃນແຕ່ລະຂັ້ນ ເພື່ອສ້າງຄວາມແຂງແຮງ, ຄວາມຄ່ອງຕົວ ໃຫ້ແກ່ສາຍໃຍ ແລະ ຂອດການປະສານງານ ໄດ້ຢ່າງທົ່ວເຖິງໃນທົ່ວປະເທດ, ເພີ່ມທະວີຂອດປະສານງານລະຫວ່າງພາກສ່ວນທີ່ກ່ຽວຂ້ອງ ເພື່ອພ້ອມກັນຄຸ້ມຄອງ, ຕິດຕາມ ກວດກາ, ເຝົ້າລະວັງ ແລະ ຕອບຕ້ານຫາງສຽງບໍ່ດີ, ຂໍ້ມູນຂ່າວສານທີ່ບໍ່ຖືກຕ້ອງເທິງອິນເຕີເນັດ ໃຫ້ມີຄວາມວ່ອງໄວ ທັນການ; ຕ້ອງສ້າງກົນໄກປະສານງານກັບບັນດາຜູ້ໃຫ້ບໍລິການໂທລະຄົມມະນາຄົມ ແລະ ອິນເຕີເນັດ, ສືບຕໍ່ຮ່ວມມືກັບບັນດາປະເທດຢູ່ໃນພາກພື້ນ ແລະ ສາກົນ ເພື່ອສືກສາແລກປ່ຽນ ແລະ ຖອດຖອນບົດຮຽນ ໃນຂົງເຂດການຄຸ້ມຄອງອິນເຕີເນັດ ກໍຄື ວຽກງານການຫັນເປັນດິຈິຕອນຊຶ່ງເປັນວຽກ ລວມຂອງທຸກຂະແໜງການທົ່ວປະເທດ.

ຂໍ້ມູນ: ກະຊວງ ເຕັກໂນໂລຊີ ແລະ ການສື່ສານ