ປະທານສະພາການຄ້າ ສະເໜີ 6 ບັນຫາໃຫ້ລັດຖະບານຄົ້ນຄວ້າພິຈາລະນາ
ໃນກອງປະຊຸມພົບປະລະຫວ່າງພາກລັດ ແລະ ພາກທຸລະກິດ ທີ່ໄດ້ຈັດຂຶ້ນໃນວັນທີ 26 ຕຸລານີ້, ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ, ໂດຍການໃຫ້ກຽດເຂົ້າຮ່ວມຂອງທ່ານ ຄຳພັນ ພົມມະທັດ ເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ, ມີທ່ານປະທານ, ຮອງປະທານ ແລະ ພະນັກງານສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ພາກທຸລະກິດເຂົ້າຮ່ວມ.
ກອງປະຊຸມດັ່ງກ່າວ ໄດ້ຮັບຟັງ ແລະ ເຊື່ອມຊຶມມະຕິຂອງກອງປະຊຸມຄະນະບໍລິຫານງານສູນກາງພັກຄັ້ງທີ 10 ແລະ ແຜນພັດທະນາເສດຖະກິດ-ສັງຄົມ ຄັ້ງທີ 8 ແຕ່ປີ 2016-2020 ຈາກທ່ານຫົວໜ້າຫ້ອງວ່າການສູນກາງພັກ, ຊຶ່ງທ່ານໄດ້ຊີ້ໃຫ້ເຫັນເຖິງຄວາມສຳຄັນຕໍ່ພາກທຸລະກິດໃນໂຄງປະກອບເສດຖະກິດຂອງຊາດ ແລະ ເຫັນຄວາມສຳຄັນໃນການບຸກທະລຸ ເພື່ອປ່ຽນແປງລະບອບການຄຸ້ມຄອງມະຫາພາກໄປສູ່ການຄຸ້ມຄອງທີ່ສົ່ງເສີມການຜະລິດແຫ່ງຊາດໄປຕາມເສດຖະກິດຕະຫລາດ ແລະ ມີຄວາມໂປ່ງໃສ.
ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ລາຍງານສະພາບການດຳເນີນທຸລະກິດໃນປັດຈຸບັນຢູ່ລາວ ແລະ ໄດ້ລາຍງານ 4 ໜ້າວຽກຈຸດສຸມທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ສ້າງຄວາມເຂັ້ມແຂງໃຫ້ພາກທຸລະກິດ, ພ້ອມນີ້ ກໍໄດ້ນໍາສະເໜີ 6 ບັນຫາສຳຄັນ ເພື່ອໃຫ້ພາກລັດຖະບານ ໄດ້ຄົ້ນຄວ້າພິຈາລະນາຄື: 1. ນະໂຍບາຍສົ່ງເສີມທຸລະກິດຂະໜາດນ້ອຍ ແລະ ກາງ; 2. ການເສີມສ້າງຄວາມເຂັ້ມແຂງຂອງສະພາການຄ້າ ແລະ ອຸດສາຫະກຳ, ສະມາຄົມ ແລະ ກຸ່ມທຸລະກິດ; 3. ການປັບປຸງກົນໄກການສ້າງຕັ້ງ ວິສາຫະກິດໃຫ້ກະທັດຮັດ, ໃຊ້ເວລານ້ອຍແຕ່ເພີ່ມກົນໄກການກວດກາຕິດຕາມການເຄື່ອນໄຫວຂອງວິສາຫະກິດຢ່າງເປັນລະບົບ; 4. ການກວດກາຄືນ ແລະ ລົບລ້າງຄຳສັ່ງທີ່ສະກັດກັ້ນການເຄື່ອນຍ້າຍຈໍລະຈອນສິນຄ້າ ແລະ ການດຳເນີນທຸລະກິດ; 5. ການໃຫ້ການຍ້ອງຍໍ ແລະ ການມອບລາງວັນໃຫ້ວິສາຫະກິດດີເດັ່ນ, SME ດີເດັ່ນ, ຜູ້ລົງທຶນຕ່າງປະເທດດີເດັ່ນ ເພື່ອເພີ່ມທະວີທັດສະນະແຂ່ງຂັນໃນວົງທຸລະກິດຢູ່ລາວ ແລະ 6. ການນຳໃຊ້ Hotline ຂອງບັນດາກະຊວງໃຫ້ໄດ້ດີກວ່າເກົ່າ.
ໃນຕອນຄ່ຳຂອງວັນດັ່ງກ່າວ, ຍັງໄດ້ມີພິທີມອບລາງວັນທຸລະກິດ SME ດີເດັ່ນຂອງສະພາການຄ້າ ແລະ ອຸດສາຫະກຳແຫ່ງຊາດລາວ ປະຈຳປີ 2017 ເພື່ອໃຫ້ເປັນຂວັນກຳລັງໃຈ ໃຫ້ຜູ້ທີ່ມີຜົນງານດີເດັ່ນ ໄດ້ສືບຕໍ່ສ້າງຜົນງານຂອງຕົນໃຫ້ດີຂຶ້ນກວ່າເກົ່າ.
