ອິດສະລາແອນໂຈມຕີກາຊາຄັ້ງຫລ້າສຸດ ເສຍຊີວິດຢ່າງໜ້ອຍ 42 ຄົນ
ມີຜູ້ເສຍຊີວິດຢ່າງໜ້ອຍ 42 ຄົນຈາກການໂຈມຕີຂອງ ອິດສະລາແອນ ຢູ່ເຂດຕ່າງໆຂອງເຂດກາຊາ ໃນວັນທີ 22 ມິຖຸນາຜ່ານມາ.
ທ່ານ ອິສມາອິວ ອັລ-ທາວັບຕາ ຜູ້ອໍານວຍການສໍານັກງານສື່ຂອງລັດຖະບານທີ່ບໍລິຫານໂດຍກຸ່ມຮາມັດ ກ່າວຕໍ່ Reuters ວ່າ: ອິດສະລາແອນໂຈມຕີເຮືອນຢູ່ອັລ-ຊາຕີ ເຊິ່ງເປັນ 1 ໃນ 8 ຄ້າຍຜູ້ລີ້ໄພຢູ່ເຂດກາຊາ ສົ່ງຜົນເຮັດໃຫ້ມີຜູ້ເສຍຊີວິດ 24 ຄົນ. ຂະນະທີ່ຊາວປາແລັສຕິນອີກ 18 ຄົນຖືກສັງຫານຈາກການໂຈມຕີເຮືອນຢູ່ເຂດອັລ-ຕຸບຟາ.
ສ່ວນກອງທັບອິດສະລາແອນອອກຖະແຫລງການສັ້ນໆ ລະບຸວ່າ: “ເມື່ອບໍ່ດົນມານີ້ ເຮືອບິນຮົບຂອງກອງກໍາລັງປ້ອງກັນອິດສະລາແອນ (Israel Defense Forces ຫລື IDF) ໄດ້ໂຈມຕີໂຄງລ່າງພື້ນຖານທາງທະຫານຂອງຮາມັດ 2 ແຫ່ງໃນພື້ນທີ່ເມືອງກາຊາ”. ພ້ອມລະບຸວ່າ: ກອງທັບຈະເປີດເຜີຍລາຍລະອຽດເພີ່ມຕື່ມຕໍ່ໄປໃນມໍ່ໆນີ້.
ຮາມັດບໍ່ໄດ້ສະແດງຄວາມເຫັນກ່ຽວກັບການກ່າວອ້າງທີ່ວ່າ: ອິດສະລາແອນໂຈມຕີໂຄງລ່າງພື້ນຖານທາງທະຫານຂອງຮາມັດ, ແຕ່ລະບຸໃນຖະແຫລງການວ່າ: ການໂຈມຕີດັ່ງກ່າວເນັ້ນໃສ່ພົນລະເຮືອນ ແລະ ປະກາດວ່າ: “ຜູ້ຢຶດຄອງ ແລະ ຜູ້ນໍານາຊີຈະຕ້ອງຊົດໃຊ້ສໍາລັບການລະເມີດປະຊາຊົນຂອງເຮົາ”.
ພາບຂ່າວເຜີຍໃຫ້ເຫັນຊາວປາແລັສຕິນຈໍານວນຫລາຍພາກັນຊ່ວຍຄົ້ນຫາຜູ້ເສຍຊີວິດທ່າມກາງບ້ານເຮືອນທີ່ຖືກທໍາລາຍ, ກໍາແພງທີ່ຖືກລະເບີດເປ່ເພເສຍຫາຍ ຕະຫລອດເສດຊາກ ແລະ ຝຸ່ນເຕັມຖະໜົນໃນຄ້າຍຜູ້ລີ້ໄພອັລ-ຊາຕີ.
ການໂຕມຕີທາງພາກພື້ນດິນ ແລະ ທາງອາກາດຂອງອິດສະລາແອນຢູ່ເຂດກາຊາເລີ່ມຕົ້ນຂຶ້ນເມື່ອກຸ່ມຕິດອາວຸດທີ່ນໍາໂດຍຮາມັດບຸກໂຈມຕີທາງຕອນໃຕ້ຂອງອິດສະລາແອນໃນວັນທີ 7 ຕຸລາ. ລາຍງານລະບຸວ່າ: ກວ່າ 8 ເດືອນຫລັງຈາກສົງຄາມເລີ່ມຂຶ້ນ, ອິດສະລາແອນເນັ້ນໂຈມຕີໃສ່ 2 ພື້ນທີ່ສຸດທ້າຍທີ່ກອງກໍາລັງ IDF ຍັງບໍ່ໄດ້ຢຶດຄອງຄື: ຣາຟາ ທາງຕອນໃຕ້ຂອງເຂດກາຊາ ແລະ ພື້ນທີ່ອ້ອມຮອບເດຍ ອັລ-ບາລາ ທາງຕອນກາງຂອງເຂດກາຊາ.
ວັນທີ 21 ມິຖຸນາຜ່ານມາ, ກະຊວງສາທາລະນະສຸກຢູ່ເຂດກາຊາເປີດເຜີຍວ່າ: ຊາວປາແລັສຕິນຢ່າງໜ້ອຍ 25 ຄົນຖືກສັງຫານ ແລະ ອີກ 50 ຄົນໄດ້ຮັບບາດເຈັບຢູ່ເມືອງມາວາຊີ ເຊິ່ງຖືກກໍານົດໃຫ້ເປັນພື້ນທີ່ທາງມະນຸດສະທໍາ ທາງຕາເວັນຕົກຂອງຣາຟາ ຫລັງລູກປືນລົດຖັງຕົກໃສ່ເຕັ້ນ ເຊິ່ງເປັນທີ່ຢູ່ອາໄສຂອງຄອບຄົວຜູ້ພັດຖິ່ນ.
ເຖິງຢ່າງໃດກໍຕາມ, ກອງທັບອິດສະລາແອນອອກຖະແຫລງການລະບຸວ່າ: ຈາກການສອບສວນເບື້ອງຕົ້ນບໍ່ພົບວ່າ: IDF ເປີດປະຕິບັດການໂຈມຕີໃນພື້ນທີ່ຢູ່ອັລ-ມາວາຊີ.
ອ້າງອີງ:
