ປຶກສາຫາລືວຽກງານການທູດເສດຖະກິດ ທີ່ຕິດພັນກັບແຜນການພັດທະນາເສດຖະກິດ-ສັງຄົມ

ວັນທີ 20 ມິຖຸນາ 2024 ຜ່ານມາ ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມປຶກສາຫາລື “ວຽກງານການທູດເສດຖະກິດ ຮ່ວມກັບບັນດາ 05 ແຂວງພາກກາງ ແລະ 02 ແຂວງພາກເໜືອ” ຂຶ້ນທີ່ ແຂວງສະຫວັນນະເຂດ, ໂດຍການເປັນປະທານຮ່ວມໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ແສນສັກ ສຸລິສັກ, ຮອງເຈົ້າແຂວງ ສະຫວັນນະເຂດ, ພ້ອມດ້ວຍບັນດາຜູ້ຕາງໜ້າຈາກບັນດາພະແນກການຕ່າງໆທີ່ກ່ຽວຂ້ອງ.

ຈຸດປະສົງການຈັດກອງປະຊຸມຄັ້ງນີ້​ ແມ່ນເພື່ອສ້າງຄວາມຮັບຮູ້ ແລະ ເຂົ້າໃຈຕໍ່ກັບບົດບາດ ແລະ ຄວາມສໍາຄັນຂອງວຽກງານການທູດເສດຖະກິດ ທີ່ຕິດພັນກັບແຜນການພັດທະນາເສດຖະກິດ-ສັງຄົມ ຂອງປະເທດເຮົາໃນປັດຈຸບັນ ເພື່ອແນໃສ່ປະກອບສ່ວນເຮັດໃຫ້ມີຄວາມເຂັ້ມແຂງ ແລະ ນຳໃຊ້ທ່າແຮງບົ່ມຊ້ອນຂອງຊາດ ເພື່ອດຶງດູດການລົງທຶນ ລວມທັງສ້າງພື້ນຖານການຜະລິດທີ່ເຂັ້ມແຂງ ເພື່ອເຮັດໃຫ້ວຽກງານການຄ້າຂອງ ສປປ ລາວ ສາມາດແຂ່ງຂັນກັບພາກພື້ນ ແລະ ສາກົນໄດ້. ຄຽງຄູ່ກັນນັ້ນ, ຍັງແນໃສ່ການສ້າງກົນໄກຂອດປະສານງານໃນການເຄື່ອນໄຫວວຽກງານດ້ານການທູດເສດຖະກິດດັ່ງກ່າວ ລະຫວ່າງ ສູນກາງ ແລະ ທ້ອງຖິ່ນ ແລະ ບັນດາສະຖານທູດລາວຢູ່ຕ່າງປະເທດ ໃຫ້ເປັນລະບົບ ເພື່ອຮັບປະກັນໃຫ້ແກ່ການປະສານງານມີຄວາມໂລ່ງລ່ຽນ ແລະ ກົມກຽວດີຍິ່ງຂຶ້ນ.

ໃນໂອກາດກ່າວເປີດກອງປະຊຸມ ທ່ານປະທານກອງປະຊຸມ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນຂອງວຽກງານການທູດເສດຖະກິດ ເຊິ່ງແມ່ນວຽກງານໜຶ່ງທີ່ມີຄວາມສໍາຄັນຈໍາເປັນໃນການຊຸກຍູ້ການພັດທະນາເສດຖະກິດຂອງປະເທດໃນປັດຈຸບັນ ໂດຍແນໃສ່ຍົກລະດັບການຮ່ວມມືດ້ານການຄ້າ, ການລົງທຶນ ແລະ ການເຊື່ອມໂຍງສາກົນຂຶ້ນສູ່ມິຕິໃໝ່. ການໂຄສະນາດຶງດູດການຄ້າ-ການລົງທຶນ, ການທ່ອງທ່ຽວ ລວມທັງການສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການສົ່ງອອກສິນຄ້າຂອງ ສປປ ລາວ ເຂົ້າສູ່ຕະຫຼາດຂອງສາກົນໃນປັດຈຸບັນ ແມ່ນຕັດຂາດບໍ່ໄດ້ຈາກການເຮັດໜ້າທີ່ດ້ານການທູດເສດຖະກິດ, ເນື່ອງຈາກການທູດເສດຖະກິດແມ່ນການຂົນຂວາຍຍາດແຍ່ງການຮ່ວມມືໂດຍກົງທາງດ້ານເສດຖະກິດ ໃນຂອບສອງຝ່າຍ ແລະ ຫຼາຍຝ່າຍ ໂດຍສະເພາະແມ່ນຍຸກເສດຖະກິດໂລກາພິວັດໃນປັດຈຸບັນ.