ກະເປົານ້ອຍໆຢູ່ນໍາໂສ້ງຢີນມີເອົາໄວ້ເຮັດຫຍັງ ?

     ກະເປົານ້ອຍໆທີ່ໃສ່ໄດ້ພຽງຫລຽນນ້ອຍໆຂອງໂສ້ງຢີນ ເຊິ່ງຖືກອອກແບບມາແຕ່ອະດີດເມື່ອປີ 1873 ຄວາມຈິງແລ້ວມີເອົາໄວ້ເຮັດຫຍັງ ?

     ໂສ້ງຢີນຖືເປັນເຄື່ອງແຕ່ງກາຍຍອດນິຍົມຂອງຄົນທົ່ວໂລກ, ບາງຄົນໃສ່ໂສ້ງຢີນເກືອບທຸກວັນ, ແຕ່ທ່ານເຄີຍສັງເກດຫລືບໍ່ວ່າ: ໂສ້ງຢີນຈະມີກະເປົານ້ອຍໆທີ່ຢູ່ສູງກວ່າກະເປົາໂສ້ງຢີນອີກເທື່ອໜຶ່ງ ເຊິ່ງເບິ່ງເປັນກະເປົາທີ່ບໍ່ມີປະໂຫຍດຫຍັງ ນອກຈາກເອົາໄວ້ໃສ່ຫລຽນໄດ້, ທ່ານຮູ້ຫລືບໍ່ວ່າ ຄວາມຈິງແລ້ວກະເປົານ້ອຍໆນີ້ມີເອົາໄວ້ເຮັດຫຍັງ ?

      ຢ້ອນກັບໄປໃນປີ 1873 ກະເປົານ້ອຍໆນີ້ເລີ່ມຖືກຫຍິບເຂົ້າກັບໂສ້ງຢີນ Levi ຄິດຄົ້ນຂຶ້ນມາໂດຍຜູ້ສ້າງຕັ້ງ ລີວາຍ ສເຕຣາສ ທີ່ຮ່ວມມືກັບຊ່າງຫຍິບເສື້ອຜ້າຊາວອາເມລິກາ ຈາຄ໊ອບ ເດວິສ. ກະເປົານ້ອຍໆອອກແບບເອົາໄວ້ເພື່ອອໍານວຍຄວາມສະດວກໃຫ້ຄົນໃສ່ໂມງແບບພົກພາ ຖືເປັນຈຸດເດັ່ນໃນຊຸດອ້ຽມລຸ້ນທໍາອິດຂອງ Levi ໂດຍໃນຍຸກນັ້ນ ໂມງໃສ່ແຂນເປັນທີ່ນິຍົມສະເພາະຜູ້ຍິງ, ຜູ້ຊາຍຈະໃສ່ໂມງໜ່ວຍນ້ອຍໆ ຫລື Pocket Watch ເພື່ອເອົາໄວ້ເບິ່ງເວລາ, ແຕ່ໃນຍຸກປັດຈຸບັນ ບໍ່ມີໃຜພົກພາໂມງໜ່ວຍນ້ອຍໆແບບນັ້ນອີກແລ້ວ ທຸກຄົນເບິ່ງເວລາຜ່ານສະມາດໂຟນ ຫລື ໂມງໃສ່ແຂນ ຫລື ສະມາດວອດ ບໍ່ມີໃຜເອົາໂມງໄປໃສ່ໄວ້ໃນກະເປົານ້ອຍໆຢູ່ໂສ້ງຢີນອີກຕໍ່ໄປ.

      ເຖິງຢ່າງໃດກໍດີ, ໂສ້ງຢີນ Levi ຍັງຢຶດການອອກແບບທີ່ມີກະເປົານ້ອຍໆນີ້ ເພື່ອຮັກສາຄວາມຄາສສິກເອົາໄວ້ ເຊັ່ນດຽວກັບໂສ້ງຢີນຍີ່ຫໍ້ອື່ນໆ ເຖິງວ່າຄົນລຸ້ນປັດຈຸບັນສ່ວນຫລາຍຈະບໍ່ມີໃຜຮູ້ວ່າ: ກະເປົານ້ອຍໆນີ້ມີເອົາໄວ້ເຮັດຫຍັງ, ແຕ່ບໍ່ໄດ້ລໍາຄານ ຫລື ຢາກຕັດມັນຖິ້ມອອກໄປແຕ່ຢ່າງໃດ.