ອາກາດຈະເຢັນລົງ, ພ້ອມມີໝອກບາງປົກຫຸ້ມຫລາຍຂຶ້ນ
ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ນັບແຕ່ວັນທີ 26-29 ຕຸລານີ້, ບໍລິເວນຄວາມກົດດັນອາກາດສູງຈະມີກຳລັງແຮງເພີ່ມຂຶ້ນແຜ່ລົງມາປົກຄຸມຢູ່ທົ່ວທຸກພາກຂອງລາວ, ພ້ອມນີ້ ກະແສລົມຕາເວັນອອກສ່ຽງເໜືອຈະມີກຳລັງແຮງພັດປົກຄຸມ, ຊຶ່ງຈະເຮັດໃຫ້ອາກາດເຢັນລົງພ້ອມມີໝອກບາງປົກຫຸ້ມຫລາຍຂຶ້ນໃນຕອນເຊົ້າ ແລະ ມີລົມພັດແຮງຢູ່ບາງທ້ອງຖິ່ນໃນແຕ່ລະພາກ. ພາກເໜືອດ້ານຕາເວັນອອກ: ສະພາບຝົນຈະຫລຸດລົງ ແລະ ອາກາດຈະເຢັນລົງ, ພ້ອມມີໝອກບາງປົກຫຸ້ມຫລາຍຂຶ້ນ, ອຸນຫະພູມຕໍ່າສຸດ 16-18 ອົງສາ ແລະ ສູງສຸດ 26-28 ອົງສາ; ພາກເໜືອດ້ານຕາເວັນຕົກ: ອາກາດຈະເຢັນລົງ ແລະ ມີໝອກບາງປົກຫຸ້ມໃນຕອນເຊົ້າ, ອຸນຫະພູມຕໍ່າສຸດ 21-23 ອົງສາ ແລະ ສູງສຸດ 30-32 ອົງສາ; ພາກກາງ: ສະພາບຝົນຈະຫລຸດລົງ ແລະ ອາກາດຈະເຢັນລົງ, ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນທາງດ້ານຕາເວັນອອກຂອງພາກ, ອຸນຫະພູມຕໍ່າສຸດ 20-22 ອົງສາ ແລະ ສູງສຸດ 30-32 ອົງສາ; ພາກໃຕ້: ຈະມີຝົນຕົກກະຈາຍຢູ່ບາງທ້ອງຖິ່ນ ແລະ ອາກາດຈະເຢັນລົງ, ພ້ອມມີລົມພັດແຮງເປັນບາງໂອກາດ, ອຸນຫະພູມຕໍ່າສຸດ 21-23 ອົງສາ ແລະ ສູງສຸດ 31-33 ອົງສາ; ນະຄອນຫລວງວຽງຈັນ: ອາກາດຈະເຢັນ, ພ້ອມມີໝອກບາງໃນຕອນເຊົ້າ, ອຸນຫະພູມຕ່ຳສຸດ 22-24 ອົງສາ ແລະ ສູງສຸດ 30-32 ອົງສາ.
