ມີຜູ້ເສຍຊີວິດ 900 ກວ່າຄົນ ໃນພິທີ ຖືສິນອົດ ທີ່ນະຄອນເມກກະ ຍ້ອນສະພາບອາກາດຮ້ອນ

ສຳນັກຂ່າວ AFP ຕ່າງປະເທດລາຍງານວ່າ ວັນທີ 20 ມິຖຸນາ 2024ນີ້ ມີຜູ້ເສຍຊີວິດ ຢ່າງໜ້ອຍ 922 ຄົນ ໃນຂະນະປະກອບພິທີ ຖືສິນອົດ ເຊິ່ງເປັນພິທີ ສັກສິດຂອງຊາວມຸດສະລິມ ໃນນະຄອນ ເມກກະ ປະເທດ ອາຣະບີຊາອຸດິ ທີ່ຈັດຂຶ້ນ ໃນລະຫວ່າງວັນທີ 15-19 ມິຖຸນາຂອງທຸກໆປີ.

ສາເຫດການເສຍຊີວິດແມ່ນຍ້ອນສະພາບອາກາດຮ້ອນຢ່າງຕໍ່ເນື່ອງ  ຊຶ່ງຄວາມຮ້ອນແທກໄດ້ 51.8 ອົງສາ, ບວກກັບຄວາມແອອັດຂອງຜູ້ຄົນທີ່ເດີນທາງມາຮ່ວມສະແຫວງບຸນ ຈາກທົ່ວທຸກມຸມໂລກ ທີ່ມີຫລາຍກວ່າ 1.8 ລ້ານຄົນ, ເຖິງແມ່ນວ່າພາກລັດໄດ້ມີແຈ້ງເຕືອນສະພາບອາກາດຮ້ອນແລ້ວກໍຕາມ.

ເຈົ້າໜ້າທີ່ອີຢິບ ທີ່ປະຈໍາການໃນສະຖານທີ່ດັ່ງກ່າວລາຍງານຕໍ່ສຳນັກຂ່າວ AFP ວ່າ ພຽງເວລາ 1 ມື້ ສາສະນິກະຊົນອີຢິບທີ່ເສຍຊີວິດໃນພິທີດັ່ງກ່າວເພີ່ມຈາກ 300 ເປັນ 600 ຄົນ ແລະ ມີຜູ້ສູນຫາຍອີກ 1,400 ຄົນ ຖ້າທຽບໃສ່ຂໍ້ມູນ ປີ 2023 ມີຜູ້ເສຍຊີວິດ 2000 ເຫັນວ່າປີນີ້ມີຈຳນວນເພີ່ມຂຶ້ນສູງຫລາຍ.