ການພົບປະ ຄັ້ງທຳອິດໃນຮອບ 24 ປີລະຫວ່າງ ຣັດເຊຍ ແລະ ສປປ ເກົາຫລີ ໄດ້ຕົກລົງການຮ່ວມມືກັນຫລາຍຢ່າງ

ຂ່າວຕ່າງປະເທດຂອງ ສປປ ເກົາຫລີ ລາຍງານວັນທີ 19 ມິຖຸນາ 2024 ວ່າ: ທ່ານ ວາລາດີເມຍ ປູຕິນ (Vladimir Putin), ປະທານາທິບໍດີ ຣັດເຊຍ ໄດ້ພົບປະກັບ ທ່ານ ກິມ ຈອງ ອຸ່ນ (Kim Jong-un), ຜູ້ນຳ ສປປ ເກົາຫລີ ຢູ່ນະຄອນຫລວງ ພຽງຢາງ ຂອງ ສປປ ເກົາຫລີ, ເປັນຄັ້ງທຳອິດໃນຮອບ 24 ປີ.

ການຢ້ຽມຢາມຄັ້ງນີ້ ເຕັມໄປດ້ວຍ ບັນຍາກາດໄມຕີຈິດມິດຕະພາບ ແລະ ເຕັມໄປດ້ວຍບັນຍາກາດກອັນອົບອຸ່ນ, ເພື່ອແນໃສ່ຍົກລະດັບການພົວພັນການຮ່ວມມືຢ່າງແໜ້ນແຟ້ນລະຫວ່າງ ສປປ ເກົາຫຼີ ກັບ ຣັດເຊຍ, ສອງຝ່າຍໄດ້ລົງນາມໃນຂໍ້ຕົກລົງການຮ່ວມມື ແລະ ຄວາມເປັນຄູ່ຮ່ວມຍຸດທະສາດຫລາຍສະບັບ, ລວມທັງການຍົກລະດັບທາງການຄ້າ ແລະ ຄວາມໝັ້ນຄົງຢ່າງເປັນລະບົບໃຫ້ເຂັ້ມແຂງຍິ່ງຂຶ້ນ.

ນອກນີ້ຜູ້ນຳທັງສອງປະເທດ ຍັງໄດ້ປຶກສາຫາລືກັນຫລາຍບັນຫາສຳຄັນ ທີ່ພົ້ນເດັ່ນ ລວມທັງສະພາບການຂອງໂລກທີ່ຍັງເຄັ່ງຮ້ອນ ໂດຍສະເພາະການປົກປ້ອງສິດ, ຜົນປະໂຫຍດ ເຊິ່ງກັນ ແລະ ກັນ ໃນເວທີສາກົນ.