ADB ທຸ້ມງົບຊ່ວຍກໍາປູເຈຍ 1,260 ລ້ານໂດລາ ຄວບຄຸມ 5 ປີ

    ທະນາຄານພັດທະນາອາຊີ (ADB) ເປີດສໍານັກງານຜູ້ແທນແຫ່ງໃໝ່ຢູ່ນະຄອນຫລວງພະນົມເປັນ ຂອງກໍາປູເຈຍ ແລະ ປະກາດແຜນທຸ້ມງົບ ປະມານ 1,260 ລ້ານໂດລາ ເພື່ອສະໜັບສະໜູນການດໍາເນີນງານຂອງລັດຖະບານກໍາປູເຈຍ ລະຫວ່າງປີ 2024-2028.

     ວັນທີ 17 ມິຖຸນາ, ສໍານັກຂ່າວຊິນຮົວລາຍງານວ່າ: ທ່ານ ມາຊັດສຶກຸ ອາຊາກາວະ ປະທານ ADB ກ່າວວ່າ: ການມອບເງິນສະໜັບສະໜູນຄັ້ງນີ້ ເປັນໄປຕາມແຜນຍຸດທະສາດຫຸ້ນສ່ວນປະເທດໃໝ່ຂອງ ADB ຄວບຄຸມໄລຍະເວລາລະຫວ່າງປີ 2024-2028 ເຊິ່ງມີການປັບໃຫ້ກົງຕາມຄວາມຕ້ອງການການພັດທະນາຂອງກໍາປູເຈຍ ໂດຍເນັ້ນໃຫ້ຄວາມສໍາຄັນຕໍ່ຄວາມຫລາກຫລາຍທາງເສດຖະກິດ, ການພັດທະນາທຶນມະນຸດ ແລະ ການຮັບມືການປ່ຽນແປງຂອງສະພາບອາກາດ.

      ຂະນະທີ່ທ່ານ ອູນ ພັນມຸນີຣັດ ຮອງນາຍົກລັດຖະມົນຕີ ແລະ ລັດຖະມົນຕີກະຊວງເສດຖະກິດ ແລະ ການເງິນກໍາປູເຈຍ ກ່າວວ່າ: ADB ເປັນພັນທະມິດທີ່ໄວ້ວາງໃຈໄດ້ໃນດ້ານການພັດທະນາຂອງກໍາປູເຈຍມາຢ່າງຍາວນານ ເຊິ່ງມີສ່ວນສໍາຄັນຕໍ່ການພັດທະນາປະເທດ ແລະ ຍຸດທະສາດດັ່ງກ່າວຈະຊ່ວຍເລັ່ງການພັດທະນາຂອງກໍາປູເຈຍ ເພື່ອບັນລຸເປົ້າໝາຍໃນການເປັນປະເທດທີ່ມີລາຍໄດ້ປານກາງລະດັບສູງ ພາຍໃນປີ 2030 ແລະ ເປັນປະເທດທີ່ມີລາຍໄດ້ສູງພາຍໃນປີ 2050.