ກຳປູເຈຍ ຈູດທຳລາຍຢາເສບຕິດ ຫລາຍກວ່າ 4 ໂຕນ ມູນຄ່າປະມານ 22,7 ລ້ານໂດລາ
June 14, 2024 - 5:58 PM
ຂ່າວຕ່າງປະເທດ ກຳປູເຈຍ ລາຍງານວັນທີ 14 ມິຖຸນາ 2024 ວ່າ: ເຈົ້າໜ້າທີ່ກຳປູເຈຍໄດ້ຈູດທຳລາຍຢາເສບຕິດທີ່ຢຶດໄດ້ໃນຄະດີຢາເສບຕິດຕ່າງໆ ລວມນ້ຳໜັກ ຫລາຍກວ່າ 4 ໂຕນ, ໂດຍມີພິທີຈູດທຳລາຍຢູ່ນະຄອນຫລວງພະນົມເປັນ.
ການຈູດທຳລາຍຢາເສບຕິດຄັ້ງນີ້, ກ່ອນວັນຕ້ານຢາເສບຕິດໂລກ ວັນທີ 26 ມິຖຸນາ ຂອງທຸກໆປີ ຕາມການປະກາດຂອງສະມັດຊາຊາດໃຫຍ່. ຢາເສບຕິດທີ່ນຳມາທຳລາຍແມ່ນຢຶດໄວ້ເມື່ອ 3 ປີກ່ອນ ໂດຍມີ ຢາໂຄເຄນ ແລະ ກັນຊາແຫ້ງ ປະກອບຢູ່ນຳ, ໃນນັ້ນ, ມີການລັກລອບນໍາເຂົ້າຈາກທາງຫລວງບໍລິເວນສາມຫລ່ຽມທອງຄຳ ເຊິ່ງເປັນແຫລ່ງຜະລິດຢາເສບຕິດລາຍໃຫຍ່ ທີ່ຊາຍແດນຕິດຈອດສາມປະເທດຄື: ມຽນມາ, ໄທ ແລະ ລາວ.
ເຈົ້າໜ້າທີ່ປາບປາມຢາເສບຕິດ ກຳປູເຈຍ ກ່າວວ່າ: ຢາເສບຕິດ ທີ່ຈູດທຳລາຍນີ້ ມີນໍ້າໜັກ 4 ໂຕນ ແລະ 100 ກິໂລກຣາມ, ຄິດເປັນມູນຄ່າປະມານ 22,7 ລ້ານໂດລາ.
